ت. سۇلەيمەنوۆ بانكتەردىڭ مەملەكەتتەن العان كومەكتى قايتارۋ مەرزىمى تۋرالى: بۇل دۇرىس ەمەس
استانا. KAZINFORM - ەكىنشى دەڭگەيلى 5 بانكتىڭ مەملەكەتتەن العان كومەكتى قايتارۋ مەرزىمى تىم ۇزارتىلىپ بەلگىلەنگەن. ۇلتتىق بانك ءتوراعاسى تيمۋر سۇلەيمەنوۆ بازالىق مولشەرلەمەگە ارنالعان باسپا ءسوز ءماسليحاتىندا وسىنداي پىكىر ءبىلدىردى.
- نەگىزىنەن بۇل ۇلتتىق بانكتىڭ اقشاسى. سوندىقتان ءبىز جۇمىس ىستەپ جاتىرمىز. بۇل وتە نازىك ماسەلە بولعاندىقتان، ناتيجەلەرىن كەيىنىرەك باياندايمىز، - دەدى ۇلتتىق بانك ءتوراعاسى. شاتاسپاسام، بىزدەگى بانكتەردىڭ بالانسىندا 1,4 تريلليون تەڭگە كولەمىندە مەملەكەت كومەگى بار. ول كومەكتەر ءار ۋاقىتتا ءارتۇرلى باعىتتا بەرىلگەن. ۇلتتىق بانككە ەنشىلەس قازاقستان تۇراقتىلىق قورىنىڭ باعدارلاماسى بولعان. «بايتەرەك» پەن «سامۇرىق-قازىنا» وتە ۇزاق مەرزىمگە جانە ۇلكەن جەڭىلدىكپەن شىعارىلعان وبليگاتسيالاردى ساتىپ الدى. ونىڭ ءبارى بانكتەر مەن وزگە ۇيىمدار اراسىنداعى ءتيىستى كەلىسىمدەردە كورسەتىلگەن. ودان بەرى كوپ وزگەرىس بولدى، - دەپ ەسكە الدى ول.
ايتۋىنشا، بۇل شارا بانكتەردىڭ دامۋىنا جاعىمدى اسەر ەتكەن.
- بانكتەر تەڭگەرىمىن ايتارلىقتاي نىعايتتى، ولار قوماقتى پايدا تابا باستادى. قيسىنعا سالساق، مەملەكەتتىڭ كومەگى بىرتە-بىرتە قايتارىلۋ كەرەك. كەلىسىمشارتتاردا قايتارۋ مەرزىمدەرى ءتىپتى 2040-جىلدارعا دەيىن دەپ تە كورسەتىلگەن. 2030-جىلدار دا بولۋى مۇمكىن. بۇل دۇرىس ەمەس، وزگەرتۋ كەرەك شىعار. ءبىز دە، قارجى نارىعىن رەتتەۋ جانە دامىتۋ اگەنتتىگى دە شارالار عانا قابىلداي الامىز. بۇل جەردە ىنتالاندىرۋ شارالارى دەپ اتاۋعا بولادى. ول شارالار بانكتەردى مەملەكەتتەن العان كومەكتى قايتارۋعا ىنتالاندىرادى، - دەدى تيمۋر سۇلەيمەنوۆ.
ۇلتتىق بانك باسشىسىنىڭ ايتۋىنشا، بازالىق مولشەرلەمە ءالى دە كوتەرىلۋى مۇمكىن.
