ەت قاۋىپسىزدىگى: وتاندىق تەست اۋرۋدى 15-20 مينۋتتا انىقتاۋعا مۇمكىندىك بەرەدى

بۇل تۋرالى س. سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ قاۋىمداستىرىلعان پروفەسسورى وركەن اكىبەكوۆ Jibek Joly تەلەارناسىنىڭ «بۇگىن. LIVE» باعدارلاماسىندا ايتتى.

تريحينەللەز - پارازيت تۋدىراتىن اۋرۋ. ول ادامعا پارازيت دەرناسىلدەرى بار ەتتى جەتكىلىكتى تەرميالىق وڭدەۋسىز تۇتىنعان كەزدە جۇعۋى مۇمكىن. اۋرۋ ءۇي جانۋارلارى مەن جابايى جىرتقىش اڭدار اراسىندا كەزدەسەدى.

عالىمنىڭ ايتۋىنشا، قازاقستاندا بۇل اۋرۋدى انىقتاۋ ءۇشىن بۇرىننان ءداستۇرلى زەرتتەۋ ادىستەرى قولدانىلىپ كەلەدى. ونىڭ ءبىرى - ەت ۇلگىسىن ميكروسكوپپەن تەكسەرۋ. الايدا مۇنداي زەرتتەۋ كوپ ۋاقىت الۋى مۇمكىن، ال كەي جاعدايدا ناتيجەنى انىقتاۋ قيىنعا سوعادى.

- بۇرىن ەتتىڭ ءبىر بولىگىن الىپ، ميكروسكوپ ارقىلى زەرتتەيتىن. بۇل ۇزاق ۋاقىتتى قاجەت ەتەدى، كەيدە ناتيجە دە دۇرىس بولماۋى مۇمكىن. قازىر ءبىز جەدەل انىقتاۋعا ارنالعان جاڭا ءادىستى ازىرلەپ جاتىرمىز. تەست ارنايى جولاقشا تۇرىندە بولادى. ەتتەن الىنعان ۇلگىنى سول جولاقشاعا تامىزۋ ارقىلى اۋرۋدىڭ بار-جوعىن انىقتاۋعا بولادى. ناتيجەنى 15-20 مينۋتتا كورۋگە مۇمكىندىك بار، - دەدى وركەن اكىبەكوۆ.

ماماننىڭ ايتۋىنشا، قازاقستاندا تريحينەللەز كوبىنە جابايى جانۋارلاردان كەزدەسەدى. ال شوشقا شارۋاشىلىعى جاقسى دامىعان ەۋروپا ەلدەرىندە پارازيت شوشقالاردان دا انىقتالىپ جاتادى. سوندىقتان اڭشىلىقپەن اينالىساتىن ادامدار ءۇشىن ەتتىڭ قاۋىپسىزدىگىن تەكسەرۋ ەرەكشە ماڭىزدى.

قازىر جابايى اڭنىڭ ەتىنەن كاۋاپ دايىنداپ، ونى تاعامعا پايدالانۋ كەزدەسەدى. الايدا ەتتىڭ سىرتقى كورىنىسىنە قاراپ، ونىڭ قاۋىپسىز ەكەنىن انىقتاۋ مۇمكىن ەمەس. وسىعان بايلانىستى عالىمدار جەدەل تەستىنى زەرتحاناعا بارماي-اق قولدانۋعا بولاتىن قۇرال رەتىندە ازىرلەۋدى كوزدەپ وتىر.

زەرتتەۋشىلەر جاڭا ءادىستىڭ دالدىگىن دە تەكسەرىپ جاتىر. تەست جۇيەسى تولىق ازىرلەنىپ، قاجەتتى سىناقتاردان وتكەننەن كەيىن ونى تاجىريبەدە قولدانۋ مۇمكىندىگى قاراستىرىلادى.

مامان ەت تۇتىنعاندا قاۋىپسىزدىك تالاپتارىن ساقتاۋعا كەڭەس بەرەدى. ەتتى ۆەتەريناريالىق باقىلاۋدان وتكەن جەردەن ساتىپ الىپ، ونىڭ قاۋىپسىزدىگىن راستايتىن قۇجاتتارعا نازار اۋدارۋ قاجەت. اسىرەسە اڭشىلىقتان كەيىن الىنعان ەتتى تەكسەرۋسىز تۇتىنباعان ءجون.

ەتتى قايناتۋ نەمەسە قۋىرۋ كەزىندە پارازيتتەر جويىلۋى مۇمكىن. دەگەنمەن ەتتىڭ بارلىق بولىگىن قاجەتتى تەمپەراتۋراعا دەيىن جەتكىزىپ ءپىسىرۋ ماڭىزدى. ال مۇزداتۋ، تۇزداۋ نەمەسە ىستاۋ پارازيتتەردەن تولىق قورعايدى دەپ سەنۋگە بولمايدى.

عالىمداردىڭ ماقساتى - ەت قاۋىپسىزدىگىن تەكسەرۋدى جەڭىلدەتىپ، اۋرۋدى ەرتە انىقتاۋعا مۇمكىندىك بەرەتىن وتاندىق تەست جۇيەسىن قولدانىسقا ەنگىزۋ. بۇل اسىرەسە جابايى اڭ ەتىن تۇتىناتىن ادامدار ءۇشىن ماڭىزدى.

ەسكە سالايىق، بۇعان دەيىن ەلىمىزدە ەت ونىمدەرىنىڭ قۇرامىن انىقتايتىن پ ت ر- تەست ازىرلەنگەنىن جازعانبىز.