ت ج رەجيمىن بۇزۋ، ىشىمدىك ءىشۋ، جالعان حابار تاراتۋ - تاسقىن كەزىندە پوليتسيا كىمدەردى قۇرىقتادى
استانا. KAZINFORM - توتەنشە جاعداي مەن جاپپاي تارتىپسىزدىك كەزىندە قىلمىس جاساۋ جاۋاپكەرشىلىكتى ەداۋىر اۋىرلاتادى. بۇل تۋرالى ق ر ىشكى ىستەر مينيسترلىگى اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ ايتىپ بەردى.
«جالعان اقپاراتتىڭ تارالۋىنا جول بەرمەۋ ءۇشىن ىشكى ىستەر ورگاندارى اقپاراتتىق كەڭىستىككە مونيتورينگ جۇرگىزۋدە. مىسالى، جاڭاوزەن قالاسىنىڭ تۇرعىنى سۋ تاسقىنى سالدارىنان قالادا جول جابىلدى دەپ جالعان اقپارات تاراتىپ، جاۋاپقا تارتىلدى. سونداي-اق، قاراتومار سۋ قويماسىنداعى جارىقشاق تۋرالى جالعان اقپارات تاراتقانى ءۇشىن قوستاناي تۇرعىنىنا قاتىستى تاعى ءبىر اكىمشىلىك ماتەريال جينالدى. سوتقا جىبەرۋدى جوسپارلاپ وتىرمىز. وسى ورايدا، جالعان اقپارات تاراتۋشىلار جاۋاپكەرشىلىككە تارتىلاتىنىن ەسكەرتەمىز»، - دەدى ق. سۇلتانبايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ال قوستانايدا سۋ باسقان ايماققا كىرۋگە تىيىم سالۋ تۋرالى پوليتسيا قىزمەتكەرلەرىنىڭ زاڭدى تالاپتارىنا باعىنباعانى ءۇشىن 4 ادام جاۋاپقا تارتىلعان.
6-ساۋىردە تۇنگى ۋاقىتتا قوستانايدا تەرەڭدىگى ءبىر مەترگە دەيىن جەتەتىن سۋ باسقان ايماققا وتپەك بولعان ماس ادامدار توقتاتىلدى.
ۇستاۋ كەزىندە ولار پوليتسيا قىزمەتكەرلەرىنە قارسىلىق كورسەتىپ، تالاپتارىنا باعىنباعان.
وعان قوسا، قوعامدىق ورىندا ماس بولىپ جۇرگەنى جانە توتەنشە جاعداي رەجيمىن بۇزعانى ءۇشىن جاۋاپقا تارتىلعان.
«ەلىمىزدىڭ زاڭناماسىنا سايكەس توتەنشە جاعداي مەن جاپپاي تارتىپسىزدىك كەزىندە قىلمىستىق قۇقىق بۇزۋشىلىق جاساۋ جاۋاپتىلىق پەن جازانى اۋىرلاتاتىن ءمان-جايلار دەپ تانىلادى. مىسالى، كىسى ءولتىرۋ، دەنساۋلىققا قاساقانا اۋىر زيان كەلتىرۋ، زورلاۋ، جىنىستىق سيپاتتاعى زورلىق-زومبىلىق ارەكەتتەرى ءۇشىن جازا كۇشەيتىلدى. وسى كەزدە ادەيى جالعان اقپارات تاراتۋ، بيلىك وكىلىنە باعىنباۋ، وعان قاتىستى قورقىتۋ نەمەسە زورلىق-زومبىلىق جاساۋ جاۋاپكەرشىلىكتى اۋىرلاتادى»، - دەپ ءتۇسىندىردى سپيكەر.
سونىمەن قاتار، زاڭعا سايكەس توتەنشە جاعداي كەزىندە لاۋازىمدى تۇلعالاردىڭ دا جاۋاپكەرشىلىگى ارتادى.
قىزمەت بارىسىنداعى ارەكەتسىزدىك، قۇقىق قورعاۋ ورگانى قىزمەتكەرىنىڭ ءوز مىندەتتەرىن ورىنداۋدان جالتارۋى قىلمىستىق جاۋاپتى اۋىرلاتادى.
قاۋىپسىزدىكتى قامتاماسىز ەتۋ بويىنشا قىزمەت اتقارۋ قاعيدالارىن بۇزعان، ازاماتتارعا، عيماراتتارعا شابۋىل جاساۋ مەن مۇلىكتى قاۋىپتى تاسىلمەن جويۋعا قارسى شارالار قابىلداماعان باستىقتىڭ ارەكەتسىزدىگى ءۇشىن جاۋاپكەرشىلىك كۇشەيەدى.
