ت ج م ەسكەرتەدى: قاتتى اياز تەحنوگەندىك ءورتتىڭ كوبەيۋىنە ىقپال ەتۋى مۇمكىن

  «قازگيدرومەت» ر م ك بولجامىنا سايكەس جەلتوقسان ايىندا اۋا رايىنىڭ ءجيى وزگەرۋى كۇتىلۋدە، دەپ حابارلايدى Kazinform.

كەيبىر اۋدانداردا قار كوپ جاۋىپ، بوران بولادى دەپ بولجانۋدا. وڭتۇستىك وڭىرلەردە جاڭبىر جاۋىپ، سوڭى قارعا ۇلاسادى، تۇمان ءتۇسىپ، كوكتايعاق بولادى. ەكپىنى سەكۋندىنا 15-30 مەترگە دەيىن نەمەسە ودان دا كوپ جەل سوعۋى مۇمكىن. جاۋىن-شاشىن توقتاپ، تۇراقسىز اۋا رايى ايازعا اۋىسادى.

7-15-جەلتوقسان ارالىعىندا سۋىق اركتيكالىق اۋا ماسساسىنىڭ كەلۋىمەن ەلىمىزدىڭ بارلىق اۋماعىندا اۋا تەمپەراتۋراسى:

— قوستاناي، اقمولا، سولتۇستىك قازاقستان، پاۆلودار وبلىستارىندا تۇندە -39°c، كۇندىز -35°c، دەيىن؛

— ۇلىتاۋ، اباي، قاراعاندى جانە شىعىس قازاقستان وبلىستارىندا تۇندە -35°c، كۇندىز -30°c دەيىن؛

— باتىس قازاقستان، اقتوبە وبلىستارىندا تۇندە -23°c، كۇندىز -20°c دەيىن؛

— قىزىلوردا وبلىسىندا تۇندە -20°c دەيىن، كۇندىز -15°c دەيىن؛

— تۇركىستان، جامبىل، الماتى جانە جەتىسۋ وبلىستارىندا تۇندە -25°c دەيىن، كۇندىز -17°c دەيىن، تاۋلى اۋدانداردا تۇندە -30°c دەيىن، كۇندىز 15°c دەيىن؛

— اتىراۋ، ماڭعىستاۋ وبلىستارىندا تۇندە -18°c، كۇندىز -12°c دەيىن كۇرت تومەندەيدى.

ت ج م قاۋىپسىزدىك شارالارىن ساقتاۋعا كەڭەس بەرەدى.

داۋىل تۋرالى ەسكەرتۋلەر جاريالاعان كەزدە، اسىرەسە قاراڭعى ۋاقىتتا الىس ساپارعا شىعۋدان باس تارتىپ، جاياۋ جۇرمەگەن ءجون.

«اۋا رايى جاعدايى مەن اۆتوجولدارداعى كولىك قوزعالىسىنىڭ شەكتەۋلەرى تۋرالى اقپاراتتى باقىلاڭىزدار.

قاتتى جەل بولعان جاعدايدا جاقىن ماڭداعى عيماراتتا نەمەسە قاۋىپسىز جەردە جاسىرىنۋ قاجەت. اعاشتاردان، ءىلۋلى تۇرعان كونسترۋكتسيالاردان، ەلەكتر جەلىلەرىنەن جانە بيلبوردتاردان اۋلاق بولىڭىزدار.بالالاردى قاراۋسىز قالدىرماڭىزدار»، - دەپ ەسكەرتتى ت ج م.

قاتتى اياز تەحنوگەندىك ورتتەردىڭ كوبەيۋىنە ىقپال ەتۋى مۇمكىن. وسىعان بايلانىستى قۇتقارۋشىلار جوعارى قۋاتتى ەلەكتر قۇرىلعىلارىن ءبىر ۋاقىتتا قوسۋ ارقىلى پەشتەردى قىزدىرماۋعا نەمەسە ەلەكتر جەلىلەرىن شامادان تىس جۇكتەمەۋگە كەڭەس بەرەدى.

«اۆتوكولىك يەلەرىنە اشىق وتتىڭ كومەگىمەن اۆتوموبيلدەردى جىلىتۋ قاۋپى تۋرالى ەسكە سالامىز.

بارلىق وقيعالار تۋرالى 112 نەمەسە 101 تەلەفوندارىنا حابارلاسۋىڭىزدى سۇرايمىز»، — دەلىنگەن اقپاراتتا.