تەڭگە باعامى: ۇلتتىق بانك قانداي جاعدايدا ينتەرۆەنسيا جاسايدى

استانا. KAZINFORM - ۇلتتىق بانك ءتوراعاسىنىڭ ورىنباسارى ەرۇلان جاماۋبايەۆ ءماجىلىستىڭ جالپى وتىرىسىنىڭ الدىندا تەڭگە باعامىنا قاتىستى پىكىر ءبىلدىردى.

- كەشە ۇلتتىق بانك تەڭگە باعامىنىڭ قازىرگى جاعدايىنا بايلانىستى ينتەرۆەنتسيا جاسامايتىنىن حابارلادى. جالپى قانداي سەناريدە ينتەرۆەنتسيا جاسايسىزدار؟ - دەپ سۇرادى جۋرناليست.

ۇلتتىق بانك باسشىسىنىڭ ورىنباسارى ونداي سەناري جوسپاردا جوق ەكەنىن ايتادى.

- ۇلتتىق بانك ءدال قازىرگى سەناريدە ينتەرۆەنتسيا جاساپ جاتقان جوق. ونىڭ قاجەتتىلىگى دە جوق. ويتكەنى وزدەرىڭىز دە بىلەسىزدەر، بىرىنشىدەن، بارلىق كۆازيمەملەكەتتىك كاسىپورىندار وزدەرىنىڭ ۆاليۋتامەن الىنعان تۇسىمدەرىن مىندەتتى تۇردە بيرجادا ساتۋ كەرەك. ياعني، دوللاردىڭ ۇسىنىسى بار. ەكىنشىدەن، ۇلتتىق قوردىڭ ارنايى مىندەتتى ترانسفەرتتەرى بار - كەپىلدەندىرىلگەن جانە ماقساتتى ترانسفەرتتەر بار. سول بويىنشا گرافيكپەن دۇرىس ساتا بىلسەك، ۇسىنىس سۇرانىستى تولىعىمەن قاناعاتتاندىرا الادى. ياعني، ءدال قازىر بايبالام سالاتىن نارسە جوق، - دەدى ەرۇلان جاماۋبايەۆ.

ايتا كەتەيىك، ق ر ۇلتتىق ەكونوميكا ۆيتسە-ءمينيسترى ارمان قاسەنوۆ تەڭگە باعامىنا اسەر ەتەتىن جاعدايلاردى اتادى.