سيىر ەتىنىڭ دەنساۋلىققا تيگىزەر زيانى قانداي؟

سيىر ەتىنىڭ ادام دەنساۋلىعىنا اسەرى تۋرالى ءتۇرلى پىكىر ايتىلادى. ءبىرى سيىر ەتىن پايدالى، تويىمدى دەسە، ەندى ءبىرى ونىڭ زيان، ءتۇرلى اۋرۋ تۋدىرۋى مۇمكىن ەكەنىن ايتىپ الەك. سيىر ەتى ادام اعزاسى ءۇشىن شىنىمەن دە قاۋىپتى مە؟

سيىر ەتىنىڭ زيانى

سيىر ەتىنىڭ بارلىق پايدالى قاسيەتىنە قاراماستان، ونى شامادان تىس تۇتىنۋ دەنساۋلىققا قاۋىپتى. عالىمدار جۇرگىزگەن زەرتتەۋ ناتيجەلەرىنە سايكەس، قىزىل ەت جۇرەك-قان تامىر اۋرۋلارىنىڭ دامۋىنا ىقپال ەتەدى ەكەن.

قانىققان مايلار

سيىر ەتىنىڭ كەيبىر تۇرلەرىندە ماي، ونىڭ ىشىندە قانىققان ماي كوپ. قانىققان مايدى كوپ مولشەردە تۇتىنۋ قانداعى حولەستەرين دەڭگەيىن جوعارىلاتىپ، جۇرەكتىڭ يشەميالىق اۋرۋ قاۋپىن ارتتىرۋى مۇمكىن.

«قاتەرلى ىسىكتىڭ دامۋ قاۋپىن ارتتىرادى»

فرانسياداعى قاتەرلى ىسىكتى زەرتتەۋ جونىندەگى حالىقارالىق اگەنتتىك وڭدەلگەن، ياعني كونسەرۆىلەنگەن، ىستالعان ەتتى ءبىرىنشى دەڭگەيدەگى كانتسەروگەن رەتىندە جىكتەپ، ونىڭ كوپ تۇتىنىلۋى تەمەكى مەن الكوگول سياقتى تەرىس اسەر ەتەدى دەگەن قورىتىندىعا كەلگەن.

ال جاڭا سويىلعان ەتتى ۇيىم 2ا ساناتىنا كىرگىزدى، بۇل ىقتيمال كانتسەروگەن دەگەندى بىلدىرەدى. سونىمەن قاتار، ىشەك قاتەرلى ىسىگىنىڭ كورسەتكىشتەرىن زەرتتەۋ كەزىندە ەتتىڭ كىشكەنتاي بولىگىنىڭ ءوزى قاتەرلى ىسىكتى دامىتۋى مۇمكىن ەكەنى انىقتالدى.

سيىر ەتىن كۇنىنە قانشا مولشەردە جەۋگە بولادى؟

عالىمدار سيىر ەتىن تۇتىنۋدى كۇنىنە 70 گرامعا دەيىن ازايتۋدى ۇسىنادى. ال ەت بولىگىنىڭ قۇرامىندا حولەستەرين مەن قانىققان ماي از بولۋى ءۇشىن «مايى جوق كەسەكتى» تاڭداعان دۇرىس.

امەريكالىق ونكولوگيالىق ينستيتۋت سيىر نەمەسە كەز كەلگەن باسقا ەتتى اپتاسىنا ءۇش رەتكە دەيىن شەكتەۋدى ۇسىنادى. ادامنىڭ سالماعى، جاسى جانە فيزيكالىق بەلسەندىلىك دارەجەسىنە قاراي سيىر ەتىن 7 كۇندە 350-500 گرامنان ارتىق جەۋگە بولمايدى ەكەن.

سيىر ەتىن پىسىرەر الدىندا كوزىڭىزگە كورىنگەن مايدى مۇمكىندىگىنشە كەسىپ تاستاۋعا تىرىسىڭىز. ال ءپىسىرۋ ءۇشىن گريل سەكىلدى مايى اعىپ كەتە الاتىنداي ءادىستى تاڭداڭىز.

مۇزداتقىشتا تۇرعان سيىر ەتىن قالاي دۇرىس ەرىتۋ كەرەك؟

مۇز قاتىپ تۇرعان ەتتى ميكروتولقىندى پەشتىڭ «ءجىبىتۋ» رەجيمىن قولدانۋ ارقىلى ەرىتۋگە بولادى. ءبىراق ەتتى مۇنداي جولمەن ەرىتەتىن بولساڭىز، ونى بىردەن دايىنداۋ كەرەك.

ال ەگەر تاعامدى اسىقپاي دايىندايمىن دەپ جوسپارلاساڭىز، ەتتى توڭازىتقىشتا ەرىتكەن ابزال. بۇل جاعدايدا ەتتى 4+ گرادۋستان تومەن تەمپەراتۋرادا ەكى كۇنگە دەيىن ساقتاۋعا بولادى.

ەسكەرتەتىن جايت، سيىر ەتى ەرىگەن كەزدە باكتەريا تاراتاتىن سۇيىقتىق شىعۋى مۇمكىن. سوندىقتان ەتتىڭ ءوزى جانە ەت تيگەن بارلىق جەردى مۇقيات جۋۋ قاجەت.

ايتا كەتەيىك، بۇعان دەيىن عالىمدار ەت جۇرەك-قان تامىرلارىنا زيان ەكەنىن انىقتاعان بولاتىن.