سۋيتسيد، بۋللينگ، ۇرىپ-سوعۋ: ايەلدەر مەن بالالاردى قورعايتىن زاڭناما قالاي وزگەردى

استانا. KAZINFORM – ق ر ءى ءى م اكىمشىلىك پوليتسيا كوميتەتى ءتوراعاسىنىڭ ورىنباسارى رەنات زۋلحايروۆ ايەل قۇقىعى مەن بالالار قاۋىپسىزدىگىن قامتاماسىز ەتۋ بويىنشا قىلمىستىق، قىلمىستىق ءىس جۇرگىزۋ جانە اكىمشىلىك كودەكستەرگە قانداي تۇزەتۋلەر ەنگەنىن ءتۇسىندىرىپ بەردى.

سپيكەردىڭ ايتۋىنشا، بۇل زاڭنىڭ بىرەگەيلىگى - بارلىق شارالاردىڭ قابىلدانۋىندا: وتباسىلار مەن بالالارعا كومەك كورسەتۋ ينفراقۇرىلىمى جاسالادى، زورلىق- زومبىلىقتىڭ الدىن الۋ (ەرتە انىقتاۋ)، زورلىق- زومبىلىق قۇرباندارىنا كومەك، سونداي-اق بالا قۇقىقتارىن قورعاۋ سالاسىنداعى مەملەكەتتىك باقىلاۋدى كۇشەيتۋ جونىندەگى نورمالار بار.

«قىلمىستىق كودەكستە كامەلەتكە تولماعاندارعا قاتىستى زورلىق-زومبىلىق قىلمىسى بويىنشا تاتۋلاسۋ مۇمكىندىگى الىنىپ تاستالدى. دەنساۋلىققا قاساقانا اۋىر، اۋىرلىعى ورتاشا زيان كەلتىرگەنى ءۇشىن جانە ازاپتاعانى ءۇشىن جاۋاپكەرشىلىك كۇشەيدى، باس بوستاندىعىن شەكتەۋ سياقتى جازا ءتۇرى الىنىپ تاستالدى. كامەلەتكە تولماعان ادامدى زورلاعانى ءۇشىن ەندى تەك ءومىر بويىنا باس بوستاندىعىنان ايىرۋ جازاسى بولادى (بۇرىن 20 -جىلعا باس بوستاندىعىنان ايىرۋ بالاماسى بولعان ەدى)»، - دەدى ر. زۋلحايروۆ ورتالىق كوممۋنيكاتسيالار قىزمەتىندە.

ادام ۇرلاۋ جانە زاڭسىز باس بوستاندىعىنان ايىرۋ قىلمىسى ءۇشىن جازا كۇشەيدى، اسىرەسە كامەلەتكە تولماعاندارعا قاتىستى ارنايى بىلىكتىلىك ەنگىزىلدى.

سۋيتسيدتى ناسيحاتتاعى ءۇشىن جانە 16 جاسقا تولماعان ادامدارعا سەكسۋالدىق سيپاتتا تيىسكەنى ءۇشىن قىلمىستىق جاۋاپكەرشىلىك ەنگىزىلدى.

«تاعى ءبىر تۇبەگەيلى وزگەرىس - دەنساۋلىققا قاساقانا جەڭىل زيان كەلتىرۋ جانە ۇرىپ-سوعۋ ءۇشىن قىلمىستىق جاۋاپكەرشىلىك ەنگىزۋ بولدى. بۇل ءۇشىن 200 ا ە ك دەيىن ايىپپۇل (738 مىڭ تەڭگە) نە تۇزەۋ جۇمىستارى، نە 200 ساعاتقا دەيىن قوعامدىق جۇمىستار، نە 50 تاۋلىككە دەيىن قاماۋعا الۋ كوزدەلگەن. مۇنداي ارەكەتتەر بىرنەشە رەت جاسالسا، كامەلەتكە تولماعان ادامعا نەمەسە تاۋەلدى ادامعا قاتىستى جاسالسا - قۇقىق بۇزۋشى ەكى جىلعا دەيىن باس بوستاندىعىنان ايىرىلۋى مۇمكىن»، - دەيدى سپيكەر.

ۇرىپ- سوققانى ءۇشىن - 80 ا ە ك دەيىن ايىپپۇل (295,4 مىڭ تەڭگە) نە تۇزەۋ جۇمىستارى، نە 80 ساعاتقا دەيىن قوعامدىق جۇمىستار، نە 25 تاۋلىككە دەيىن قاماۋعا الۋ كوزدەلگەن. ال بىرنەشە رەت قايتالانعان جاعدايدا - 50 تاۋلىككە دەيىن قاماۋعا الۋ جازاسى بار.

وعان قوسا، بۇل ءىس جاريا ايىپتاۋ ءىسى بولىپ سانالادى جانە جابىرلەنۋشى شاعىمىنان تىس قىلمىستىق تەرگەۋ باستالادى. سوتقا «اگرەسسوردى» تۇرعىن ۇيدەن ۋاقىتشا شىعارۋ قۇقىعى بەرىلەدى.

سونداي- اق، سوت «اگرەسسوردىڭ» دەنساۋلىق ساقتاۋ ورگاندارىندا مىندەتتى پسيحولوگيالىق كومەك الۋىن تاعايىنداۋعا قۇقىلى.

سونداي- اق، اكىمشىلىك كودەكستە بالالار قاۋىپسىزدىگىن قامتاماسىز ەتۋ شارالارىن ورىنداماعانى ءۇشىن اتا-انالاردىڭ جاۋاپكەرشىلىگى ەنگىزىلەدى.

العاش رەت كامەلەتكە تولماعان ادامدى قۋدالاۋ (بۋللينگ، كيبەربۋللينگ)، سونداي- اق اتا- اناسىنىڭ جانە (نەمەسە) زاڭدى وكىلىنىڭ ەرىپ ءجۇرۋىنسىز 16 جاسقا تولماعان ادامدى قوعامدىق كولىكتەن ماجبۇرلەپ تۇسىرگەنى ءۇشىن جاۋاپكەرشىلىك ەنگىزىلەدى.

«پوليتسيا قىزمەتكەرلەرى ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ زاڭىن ورىنداۋعا دايىن. ءبىز مۇنداي جاعدايلارعا جاۋاپ بەرۋ جانە تەرگەۋ الگوريتمىن، ادىستەمەلىك ۇسىنىستاردى، ءىس جۇرگىزۋ قۇجاتتارىنىڭ بلانكىلەرىن ازىرلەدىك. جالپى، ىشكى ىستەر مينيسترلىگى جاڭا فورماتتا جۇمىس ىستەۋگە دايىن»، - دەدى ر. زۋلحايروۆ.