سەيسمولوگ بلوگەردىڭ الماتىداعى جەر سىلكىنىسى تۋرالى «بولجامىنا» قاتىستى پىكىر ءبىلدىردى
الماتى. KAZINFORM - بلوگەردىڭ الماتىدا جەر سىلكىنىسى تۋرالى بولجامىنا قاتىستى سەيسمولوگيالىق باقىلاۋلار مەن زەرتتەۋلەردىڭ ۇلتتىق عىلىمي ورتالىعىنىڭ باسشىسى داۋلەت سارسەنبايەۆ پىكىر ءبىلدىردى.
وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتى بارىسىندا عىلىمي ورتالىق ديرەكتورى داۋلەت سارسەنبايەۆ پسيەۆدوسەيسمولوگتار مەن پسيەۆدوساراپشىلاردىڭ بولجامىنا قاتىستى ءوز ويىن ايتتى.
«ونىڭ 14-اقپاننان كەيىن رەسپۋبليكا اۋماعىندا كۇشتى جەر سىلكىنىسى بولادى دەگەن بولجامىنا كەلەتىن بولساق، شىنىن ايتقاندا، بۇل بلوگەرلەر نەنى مەڭزەپ وتىرعانىن بىلمەيمىز. ولاردىڭ نەگىزدەرى قانداي؟ ولار ءتۇس كورمە مە، الدە بىردەڭە پايدالانادى ما؟ بۇل قيىن سۇراق. شىن مانىندە، ءبىز كۇن سايىن 200 دەن استام پارامەتردى وڭدەيمىز، مونيتورينگ گيدروديناميكالىق، گيدروحيميالىق، گەوفيزيكالىق، دەفورماتسيالىق پروتسەستەردى جانە ءتىپتى بيولوگيالىق باقىلاۋ ارقىلى جۇزەگە اسىرىلادى. وسىنىڭ نەگىزىندە ءبىز سەيسميكالىق جاعدايعا بولجام جاسايمىز. بيىل الماتى وبلىسىندا كۇشتى جويقىن جەر سىلكىنىسى كۇتىلمەيدى»، - دەدى داۋلەت سارسەنبايەۆ.
ايتۋىنشا، تۇرعىندار جەر سىلكىنىسى جانە باسقا دا توتەنشە جاعدايلار كەزىندەگى بارلىق ءتارتىپ ەرەجەسىن ناقتى ءبىلۋى كەرەك.
«جاپونيانى الىپ قارايىق - وندا جەر سىلكىنىسى ۇنەمى بولىپ تۇرادى، ءبىراق ءىس جۇزىندە زارداپ شەككەندەر بولمايدى. تاعى دا ەسكە تۇسىرەيىك - الماتىدا جەر سىلكىنىسى سالدارىنان زارداپ شەككەندەر بولدى ما؟ جوق، ادامدار دۇربەلەڭنەن زارداپ شەكتى. ال ول قايدان شىقتى؟ جاعدايدى تۇسىنبەۋ سالدارىنان، ءارتۇرلى جالعان حابارلامالار مەن مەملەكەتتىك ورگانداردان اقپاراتتىڭ جەتكىلىكسىزدىگى سالدارىنان بولدى. بۇل باعىتتا جۇمىس ىستەۋ كەرەك»، - دەدى ءسوز سوڭىندا و ك ق سپيكەرى.
