سىرىڭكەمەن ويناعان بالالاردىڭ كەسىرىنەن اۋىل تۇرعىنىنىڭ 30 توننا ءشوبى جانىپ كەتتى
شىعىس قازاقستان وبلىسى زايسان اۋدانىندا ەكى كۇن قاتارىنان پىشەن جاندى، دەپ حابارلايدى Kazinform اگەنتتىگى.

ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، ءبىرىنشى وقيعا 7- قازاندا جارسۋ اۋىلىندا بولعان. جەر ءۇيدىڭ اۋلاسىندا 30 توننا پىشەن وتقا وراندى.
«وقيعا ورنىنا كەلىپ جەتكەن ءورت سوندىرۋشىلەر بىردەن جالىنمەن كۇرەستى. سول جەرگە قۇتقارۋشىلار مەن جەرگىلىكتى اتقارۋشى ورگان وكىلدەرىنەن 15 ادام مەن تراكتور تارتىلعان. الدىن الا دەرەك بويىنشا ءورتتىڭ شىعۋىنا بالالاردىڭ سىرىڭكەمەن ويناۋى سەبەپ بولدى»، - دەلىنگەن اقپاراتتا.
كەلەسى كۇنى قارابۇلاق اۋىلدىق وكرۋگىندە اشىق اۋماقتا 85 توننا پىشەن ورتەندى. ءورتتىڭ شىعۋ سەبەبى - وتتى ابايسىز پايدالانۋ.
ءتىلسىز جاۋمەن كۇرەسكە ءورت سوندىرۋشىلەر، جەرگىلىكتى تۇرعىندار، «تارباعاتاي مۇناي» كاسىپورنىنىڭ جۇمىسشىلارى مەن جەرگىلىكتى اتقارۋشى ورگان قىزمەتكەرلەرىنەن 16 ادام مەن 7 تەحنيكا جۇمىلدىرىلعان.
وسى رەتتە، قۇتقارۋشىلار ءوڭىر جۇرتشىلىعىنا جەم- ءشوپتى ساقتاعان كەزدە ءورت قاۋىپسىزدىگى ەرەجەلەرىن بۇزباي، بارىنشا اباي بولۋ قاجەتتىگىن ەسكەرتەدى.
