سيرياعا بارعان بىتىمگەر: جەرگىلىكتى حالىقتىڭ ءبىر-اق ارمانى بار - تىنىشتىق
استانا. KAZINFORM - ءبىر جىل بۇرىن ءبىر توپ (139 اسكەري قىزمەتشى) قازاقستاندىق بىتىمگەر سيرياعا اتتاندى. ولاردىڭ اراسىندا ءتورت نازىك جان بار. سونىڭ ءبىرى - الماتى قالاسى بىتىمگەرلىك ورتالىعىنىڭ سانيتار- نۇسقاۋشىسى ارداق كۇرتەبايەۆا. ءبىر جىل بىتىمگەرلىك ميسسياسىن ورىنداپ كەلگەن اسكەري قىزمەتشىنى اڭگىمەگە تارتقان ەدىك.
- ارينە، سيرياعا بارار الدىندا قورقىنىش بولدى، ءبىراق مەن قايدا بارا جاتقانىمدى ءبىلدىم. بىتىمگەرلىك مىندەتىمە، ب ۇ ۇ جارعىسىنا سايكەس، گەندەرلىك ساياسات تاقىرىبىندا ساباق وتكىزۋ كىردى. ونىڭ ىشىندە زورلىق-زومبىلىق، ايەلدەردىڭ قۇقىعىن قورعاۋ ماسەلەلەرى بار. ب ۇ ۇ- نىڭ بىتىمگەرلىككە ايەلدەردى كوپتەپ تارتۋ تۋرالى رەزوليۋتسياسى بار. نەگە؟ سەبەبى كەلىسسوز كەزىندە ەر ادامدارعا قاراعاندا ايەلدەرمەن ءتىل تابىسىپ، كەلىسىمگە كەلۋ وڭاي. سيريانى الىپ قاراساق، جەرگىلىكتى ايەلدەر مەن بالالار، جالپى جەرگىلىكتى تۇرعىندار ايەلدەرگە سەنىم ارتادى، - دەدى ارداق كۇرتەبايەۆا اگەنتتىك تىلشىسىمەن اڭگىمە بارىسىندا.
ونىڭ ايتۋىنشا، قازاقستاندىق بىتىمگەرلەر سيرياعا بارعان كەزدە ەلدە ازاماتتىق سوعىس بولىپ جاتتى.
- ميسسيانى ورىنداۋعا اتتانۋعا مەن دە، وتباسىم جاقىندارىم دا الدىن الا مورالدىق تۇرعىدان دايىن بولدىق. كۇندەلىكتى وتباسى مۇشەلەرى، جاقىندارىمىزبەن ۇيالى بايلانىس ارقىلى حابار الىسىپ تۇردىق. ميسسيا بارىسىندا جەرگىلىكتى تۇرعىندارمەن ءجيى كەزدەسىپ تۇردىق، سونىمەن قاتار ءبىز ورنالاسقان بازادا جەرگىلىكتى اسكەري قىزمەتكەرلەر بولدى. سيريا حالقىنىڭ ءبىر-اق ارمانى بار - تىنىشتىق پەن ەركىندىك. بۇل قازىر ولارعا ارمان. وسى ورايدا ءبىزدىڭ ەلىمىزدە ەركىندىكتىڭ، بوستاندىقتىڭ، توقشىلىقتىڭ بارىنا قاتتى قۋانامىن، - دەيدى ول.
وسىلايشا جەرلەسىمىز وتاندى ساعىنعانىن، وتانعا جەتپەيتىن الەم جوعىن ايتىپ وتىر. ءسوز سوڭىندا ارداق كۇرتەبايەۆا الداعى ۋاقىتتا تاعى دا بىتىمگەرلىك مىندەت وتەۋگە جىبەرسە، دايىن ەكەندىگىن جەتكىزدى.
ەسكە سالا كەتەيىك، كەشە قازاقستاندىق بىتىمگەرلەر سيريادان ەلگە ورالدى.
ولار بىلتىر ناۋرىزدا قازاقستاننىڭ العاشقى ۇلتتىق بىتىمگەرلىك كونتينگەنتى (139 اسكەري قىزمەتكەر) ب ۇ ۇ ميسسياسى اياسىندا گولان جوتالارىنا جىبەرىلگەن ەدى.
قازاقستاندىق بىتىمگەرلەر موبيلدى پاترۋلدەۋ، باقىلاۋ بەكەتتەرىن كۇشەيتۋ، ەۆاكۋاتسيا جانە ميناسىزداندىرۋ جۇمىستارىن ورىندادى.
ايتار بولساق، سيرياداعى توڭكەرىس كەزىندە قازاقستاندىق بىتىمگەرلەر ب ۇ ۇ- نىڭ 24 قىزمەتكەرىن ەۆاكۋاتسيالادى.
سونىمەن قاتار قازاقستاندىق بىتىمگەرلەردىڭ سيريادا تاعى قانداي مىندەتتى ورىنداپ كەلگەنى تۋرالى جازعان بولاتىنبىز.
