سىرتقى ىستەر مينيسترلىگىنە داكتيلوسكوپيالىق تىركەۋ وكىلەتتىگى بەرىلدى

استانا. KAZINFORM - قازاقستان رەسپۋبليكاسىنىڭ ۇكىمەتى «قازاقستان رەسپۋبليكاسى سىرتقى ىستەر مينيسترلىگىنىڭ ماسەلەلەرى» تۋرالى قاۋلىعا وزگەرىستەر مەن تولىقتىرۋلار ەنگىزدى.

جاڭارتىلعان قۇجاتقا سايكەس، سىرتقى ىستەر مينيسترلىگىنىڭ ەرەجەسىنە مىناداي وزگەرىستەر ەنگىزىلدى:

1. ازاماتتىق ماسەلەلەرى بويىنشا وتىنىشتەرمەن جۇمىس ىستەۋ ءتارتىبى ناقتىلاندى. ەندى سىرتقى ىستەر مينيسترلىگى قازاقستاننىڭ شەت ەلدەردەگى مەكەمەلەرىندە ازاماتتىقتى الۋ، شىعارۋ نەمەسە ەلگە تيەسىلىگىن راستاۋ تۋرالى وتىنىشتەردى قابىلداۋ جانە قاراۋ ءتارتىبىن ازىرلەپ، بەكىتەدى؛

2. 167-تارماقشاعا قازاق تىلىندەگى ءماتىن بويىنشا وزگەرىستەر ەنگىزىلدى (ورىس تىلىندەگى نۇسقاسى وزگەرىسسىز قالدى)؛

3. جاڭا 167-1-تارماقشا قوسىلدى، وندا سىرتقى ىستەر مينيسترلىگىنە قازاقستان رەسپۋبليكاسىنىڭ زاڭناماسىنا سايكەس داكتيلوسكوپيالىق تىركەۋدى جۇزەگە اسىرۋ وكىلەتتىگى بەرىلگەن.

قاۋلى كۇشىنە ەندى.

بۇعان دەيىن قازاقستان ازاماتتىعىن الۋدى جەڭىلدەتەتىن قۇجات جوباسى تالقىلاۋعا شىعارىلعان ەدى.