سىرتقى ىستەر مينيسترلىگى قازاقستان مەن قىتاي ۇكىمەتى اراسىنداعى اقپارات الماسۋ كەلىسىمىنە تۇسىنىك بەردى
سىرتقى ىستەر مينيسترلىگىنىڭ رەسمي وكىلى ايبەك سمادياروۆ قازاقستان مەن قىتاي ۇكىمەتتەرى اراسىنداعى اقپارات الماسۋ كەلىسىمىنە تۇسىنىك بەردى، دەپ حابارلايدى قازاقپارات ءتىلشىسى.

«قىتايداعى قازاقتاردىڭ ماسەلەسىمەن اينالىساتىن قۇقىق قورعاۋ ۇيىمدارى الماتىدا بىرنەشە رەت جيىن وتكىزىپ، الاڭداۋشىلىق ءبىلدىرىپ جاتىر. قازاقستان مەن قىتاي ۇكىمەتتەرى راسىمدەگەن قۇجات ارقىلى (قازاقستان ۇكىمەتى مەن قىتاي ۇكىمەتى اراسىنداعى تاراپتار مەملەكەتتەرىنىڭ ازاماتتارىنا قاتىستى اقپارات الماسۋ تۋرالى كەلىسىمدى راتيفيكاتسيالاۋ تۋرالى زاڭ) ەرتەڭ قازاقستان ازاماتتىعىن سۇراعان ۇلتى قازاقتاردىڭ پاسپورتىنا ۆەتو جاريالاۋى مۇمكىن دەگەن قاۋىپ بار. وسىعان نەگىز بار ما؟» دەپ سۇرادى ب ا ق وكىلدەرى اتالعان ۆەدومستۆودا وتكەن بريفينگتە.
س ءى م رەسمي وكىلىنىڭ ايتۋىنشا، اتالعان كەلىسىمنىڭ باستى ورىنداۋشىسى — ىشكى ىستەر مينيسترلىگى.
«سوندىقتان مەن تولىق تۇسىنىكتەمە بىلدىرە المايمىن. ويتكەنى، بۇل قۇجاتتىڭ ءمان- جايىن انىق بىلمەيمىن. وزدەرىڭىز بىلەسىزدەر، كارانتيننەن كەيىن مىڭداعان قانداسىمىز ەلگە كەلدى. ول — قىتاي تاراپىمەن تىعىز جۇمىس ىستەگەنىمىزدىڭ ناتيجەسى. سوندىقتان ودان قورقۋدىڭ قاجەتى جوق. تەك قانا زاڭسىز قۇجاتپەن جۇرگەن، قوس ازاماتتىعى بار ادامداردى انىقتاۋ ءۇشىن جاسالىپ جاتىر»، — دەدى رەسمي وكىل.
ول قىتايدىڭ ازاماتتىعىنان شىقپاي سول ەلدەن زەينەتاقى الىپ جۇرگەن، ءبىراق قازاقستاندا تۇراتىن ازاماتتارعا شەكتەۋ قويىلاتىنىن ايتادى.
«ءبارى دەپ ايتا المايمىن. ءبىراق اراسىندا بار. قىتاي ازاماتتىعىنان شىقپاي سول جاقتان زەينەتاقىسىن الىپ جۇرەدى. بۇل جاققا كەلىپ قۇجاتتارىن راسىمدەيدى. سولاي ەكى ەلدىڭ اراسىندا جۇرەتىندەر بار. ەكى ەلدەن بىردەي تولەم الۋ زاڭسىز. زاڭدى بۇزعاننان كەيىن مىندەتتى تۇردە شارا قولدانىلادى»، — دەدى ايبەك سمادياروۆ.
ايتا كەتەيىك، تاياۋدا ءماجىلىستىڭ جالپى وتىرىسىندا قازاقستان ۇكىمەتى مەن قىتاي ۇكىمەتى اراسىنداعى تاراپتار مەملەكەتتەرىنىڭ ازاماتتارىنا قاتىستى اقپارات الماسۋ تۋرالى كەلىسىمدى راتيفيكاتسيالاۋ تۋرالى زاڭ قابىلدانعان ەدى.
مارلان جيەمباي
اۆتور
مارلان جيەمباي