ەسىرتكى ساتقاندار ءومىر بويىنا بوستاندىعىنان ايىرىلۋى مۇمكىن
بيىل ەلىمىزدە ەسىرتكى جاسىرعانى ءۇشىن 6 جاس ءوسپىرىم سوتتالىپ، تاعى 26 جاس ءوسپىرىم جاۋاپقا تارتىلىپ جاتىر. بۇل تۋرالى ىشكى ىستەر ءمينيسترى ەرجان سادەنوۆ ايتتى، - دەپ حابارلايدى ماسساگەت ءتىلشىسى.
الدىمەن ۆەدومستۆو باسشىسى ەسىرتكى قىلمىسى ءۇشىن جازانى كۇشەيتۋ قاراستىرىلىپ وتىرعانىن جەتكىزدى.
«سينتەتيكالىق ەسىرتكىنى وندىرۋگە بايلانىستى قاۋىپ-قاتەردى ەسكەرىپ، ەسىرتكى زەرتحانالارىن ۇيىمداستىرعانى ءۇشىن جازانى كۇشەيتۋ تۋرالى زاڭناماعا تۇزەتۋلەر ازىرلەندى. قازىر ەسىرتكى زەرتحانالارىن ۇيىمداستىرۋشىلار ەسىرتكىنى وتكىزۋ ءۇشىن ءبىر توپ اداممەن جانە اسا ءىرى كولەمدە ازىرلەگەنى، قايتا وڭدەگەنى ءۇشىن 10 جىلدان 15 جىلعا دەيىن باس بوستاندىعىنان ايىرىلادى. ۇسىنىلاتىن تۇزەتۋلەردە وسى ارەكەتتەر 15 جىلدان 20 جىلعا دەيىن نەمەسە ءومىر بويى باس بوستاندىعىنان ايىرۋ جازاسىمەن قىلمىستىق كودەكستىڭ 297-بابى 4-بولىگى بويىنشا دارەجەلەنەتىن بولادى»، - دەدى مينيستر ماجىلىستەگى ۇكىمەت ساعاتىندا.
سونداي-اق، ەرجان سادەنوۆ ەسىرتكى قىلمىسىمەن اينالىسقان قانشا بالا جاۋاپقا تارتىلعانىن ايتتى.
«قوعامدا ەسىرتكى جاسىرۋشىلاردى، ياعني «زاكلادچيكتەر» ءۇشىن جازالاۋدىڭ تىم قاتاڭدىعى تۋرالى ماسەلە كوتەرىلىپ جاتىر. بۇل جاستار مەن جاسوسپىرىمدەردى وسى سالاعا بەلسەندى تارتۋعا بايلانىستى. شىنىمەن، ەسىرتكى وتكىزۋشىنىڭ «پورترەتى» وزگەرگەن. ولار ءۇشىن ينتەرنەت تەحنولوگيانى بەلسەندى پايدالانۋ - ۇيرەنشىكتى جاعداي. ەسىرتكى تاراتۋشىلار قاتارىنا ولار جەڭىل اقشا تابۋدى كوزدەپ، تومەن قۇقىقتىق ساۋات، مادەنيەت جانە الەۋمەتتىك جاۋاپكەرشىلىك سالدارىنان تۇسەدى. بۇگىندە 6 كامەلەتكە تولماعان سوتتالدى. تاعى 26 جاس ءوسپىرىم جاۋاپكەرشىلىككە تارتىلىپ جاتىر»، - دەدى ول.
ءمينيستردىڭ سوزىنشە، ەسىرتكى قىلمىسىنا قاتىسى بار دەگەن كۇدىككە ىلىنگەن بالالار ءۇشىن جازانى جەڭىلدەتۋ قاراستىلىپ جاتىر.
«مۇندا دا كەلەسى تۇزەتۋلەر ازىرلەدىك. ەگەر قىلمىس ءبىرىنشى رەت جاسالسا، سونداي- اق، كىنالى تەرگەۋ ورگاندارىمەن بەلسەندى جۇمىس ىستەسە، ەسىرتكى وتكىزۋشىلەردى جاۋاپكەرشىلىكتەن بوساتۋ مۇمكىندىگى قاراستىرىلادى. مۇمكىندىكتى پايدالانىپ، ءماجىلىس دەپۋتاتتارىن وسى تۇزەتۋلەردى قولدانىستاعى زاڭ جوباسى اياسىندا قاراستىرۋدى سۇرايمىن»، - دەپ ءسوزىن تۇيىندەدى ەرجان سادەنوۆ.
ەسكە سالايىق، بۇعان دەيىن جىل سايىن ەسىرتكى قىلمىسى ءۇشىن 3 مىڭنان اسا قازاقستاندىق سوتتالاتىنى حابارلاندى.
