ەسىرتكى قىلمىسىمەن ۇستالعان جاسوسپىرىمدەردىڭ سانى قانشا
استانا. KAZINFORM - ىشكى ىستەر ۆيتسە-ءمينيسترى سانجار ءادىلوۆ ەسىرتكىمەن بايلانىستى قىلمىس ءۇشىن قاماۋدا وتىرعان جاسوسپىرىمدەردىڭ سانىن اتادى.
- بۇگىندە ەسىرتكى قىلمىسىمەن 49 جاس ءوسپىرىم ۇستالدى. قىلمىستىق اتقارۋ جۇيەسىنىڭ مەكەمەلەرىندە 9 جاس ءوسپىرىم قاماۋدا وتىر. ولار سوتتالعانعا دەيىن ەسەپتە تۇرماعان جانە اقشا تابۋ ماقساتىمەن قىلمىس جاساعان. الماتىدا ونداي ادامداردى ۇستاۋعا ارنالعان جالعىز كولونيامىز بار. ولارعا دارىستەر وقىلىپ، ەسىرتكىنى قولدانۋدىڭ سالدارى تۋرالى ءتۇسىندىرۋ جۇمىستارى جۇرگىزىلەدى. بۇل جۇمىستارعا ناركولوگتاردى، پسيحياترلار مەن ۇكىمەتتىك ەمەس ۇيىمداردى شاقىرامىز، - دەدى ۆيتسە-مينيستر سەنات وتىرىسىندا.
سونداي-اق، ول ەسىرتكى قىلمىسىنىڭ سالدارى تۋرالى ءتۇسىندىرۋ جۇمىستارى قىزۋ جۇرگىزىلىپ جاتقانىن ايتتى.
- جالپى، جاستار اراسىندا ناشاقورلىقتىڭ الدىن الۋ ىسىندە قولدا بار رەسۋرستاردىڭ ءبارىن، اسىرەسە ۇكىمەتتىك ەمەس ۇيىمداردى، ب ا ق-تى جانە كوپشىلىكتىڭ الەۋەتىن پايدالانامىز. بۇگىنگى تاڭدا ەسىرتكىگە قارسى 15 مىڭنان استام ءىس-شارا وتكىزىلدى. ونىڭ ىشىندە ءبىلىم بەرۋ ۇيىمدارى مەن جوعارى وقۋ ورىندارىندا 1 ميلليوننان استام ادام قامتىلدى، - دەدى سانجار ءادىلوۆ.
ايتا كەتەيىك، وسىعان دەيىن ەسىرتكى زەرتحاناسىن جاساعان 52 جاستاعى قىزىلوردا تۇرعىنى 12 جىلعا سوتتالعانى ءمالىم بولدى.
اۆتور
ەسىمجان ناقتىباي
