سيرەك مەتالدار قورى بويىنشا ۇلتتىق زەرتحانا قۇرىلادى
استانا. KAZINFORM - قازاقستاندا ستراتەگيالىق ماڭىزى بار ماتەريالداردىڭ، سونىڭ ىشىندە سيرەك مەتالداردىڭ ءتىزىمىن ازىرلەيتىن ارنايى كوميسسيا قۇرۋ جوسپارلانىپ وتىر.
بۇل تۋرالى ۇكىمەت وتىرىسىندا ونەركاسىپ جانە قۇرىلىس ۆيتسە-ءمينيسترى يران شارحان مالىمدەدى.
ۆيتسە-ءمينيستردىڭ ايتۋىنشا، ەلىمىزدىڭ الەمدىك وندىرىستىك تىزبەكتەرگە قاتىسۋ مۇمكىندىگىن كەڭەيتۋ ماقساتىندا ماڭىزدى رەسۋرستاردى زەرتتەيتىن ۇلتتىق زەرتحانا اشۋ كوزدەلگەن.
«ەلىمىز الەمدىك وندىرىستىك تىزبەكتەرگە قاتىسۋى ءۇشىن ماڭىزدى قورلار بويىنشا ۇلتتىق زەرتحانا قۇرۋ جوسپارلانىپ وتىر. بۇل شيكىزات قورىن دامىتىپ، يمپورتقا تاۋەلدىلىكتى ازايتۋعا مۇمكىندىك بەرەدى»، - دەدى يران شارحان.
بۇدان بولەك، وتاندىق ونىمدەردىڭ ۇلەسىن كوبەيتۋ ءۇشىن رەتتەلەتىن ساتىپ الۋلار اياسىندا قازاقستاندىق تاۋار وندىرۋشىلەردى قولداۋعا باعىتتالعان شارالار قابىلدانادى.
يران شارحاننىڭ مالىمەتىنشە، وتاندىق كاسىپورىندار اراسىنداعى وندىرىستىك بايلانىستى نىعايتۋ جانە دايىن ءونىم شىعارۋدى ىنتالاندىرۋ ءۇشىن ونەركاسىپتىك كلاستەرلەردى دامىتۋ مودەلى ازىرلەنىپ جاتىر.
