سيرەك كەزدەسەدى، ءبىراق وتە قاۋىپتى: بوتۋليزم تۋرالى نە ءبىلۋ كەرەك؟

بوتۋليزم قانداي اۋرۋ؟

بوتۋليزم - ادام اعزاسىنا بوتۋلوتوكسين ءتۇسۋى سالدارىنان داميتىن توكسيكوينفەكتسيا. توكسين ادام اعزاسىنا اسقازان-ىشەك جولدارى ارقىلى ەنەدى.

بوتۋليزمى - سالىستىرمالى تۇردە سيرەك كەزدەسەتىن اۋرۋ، ءبىراق سالدارى وتە اۋىر. وعان ۇيدە كونسەرۆىلەنگەن تاماق ونىمدەرى، سونداي-اق، اشىتۋ ارقىلى ازىرلەنگەن باسقا دا تاعامدار سەبەپ بولۋى مۇمكىن. ماماندار بالىق تا قاۋىپ ءتوندىرۋى مۇمكىن ەكەنىن ايتادى. بۇل تاعامنىڭ قۇرامىندا بوتۋلينۋم ميكروبتارى نەمەسە توكسيندەر بولۋى مۇمكىن.

اۋرۋ ادامنان ادامعا بەرىلمەيدى. بوتۋليزمنىڭ قوزدىرعىشتارى توپىراق پەن كوڭدە، جەمىستەر مەن كوكونىستەردە، بالىقتا، جانۋارلاردىڭ جەم-شوبىندە، ءتىپتى جانۋارلاردىڭ ناجىسىندە كەزدەسەدى.

بوتۋليزمنىڭ العاشقى بەلگىلەرى قانداي؟

العاشقى ەكى-ءۇش ساعاتتا السىزدىك، بۇلشىقەت السىزدىگى، بولماشى باس اۋرۋ، جەڭىل باس اينالۋ، كورۋ قابىلەتى ناشارلاۋى، قاباق تومەن ءتۇسۋى بايقالادى. سالدارىنان ادامنىڭ اۋزى قۇرعاپ، شولدەيدى.

اۋرۋدىڭ العاشقى ەكىنشى، ءۇشىنشى كۇنىندە كەيبىرەۋلەردىڭ ءىشى اۋىرادى. ەرتە جانە وتە ءجيى كەزدەسەتىن سيمپتوم - اۋرۋدىڭ العاشقى ەكىنشى كۇنىندە قۇسۋ. تەمپەراتۋرا ادەتتە قالىپتى بولادى نەمەسە بىرنەشە كۇن بويى 37,7-38 گرادۋس ارالىعىندا ادامنىڭ قىزۋى كوتەرىلەدى. وسى اۋرۋعا ءتان تاعى ءبىر سيمپتوم - ءىش قاتۋ.

اۋرۋ كۇشەيگەن سايىن اياقتى تالتىرەكتەپ باسۋ سەكىلدى بەلگىلەر دە كورىنەدى.

نەگىزگى ەمى قانداي؟

مامانداردىڭ سوزىنشە، بوتۋليزمنىڭ نەگىزگى ەمى - توكسيننىڭ اسەرىن بەيتاراپتاندىرۋ، ياعني بوتۋلينگە قارسى سارىسۋ سالۋ. دارىگەرلەر بوتۋليزم بەلگىلەرى بايقالسا، دەرەۋ مەديتسينالىق كومەككە جۇگىنۋ كەرەك ەكەنىن ەسكە سالدى.

نەدەن ساق بولۋ كەرەك؟

ۇيدە دايىندالعان كونسەرۆى ونىمدەرىن ساتىپ الماعان ءجون؛

كوكونىستەر، جەمىس-جيدەكتەردى مۇقيات جۋعان دۇرىس؛

بۇرىن الىنعان، بۇلىنگەن كوكونىستەردى، جەمىستەردى كونسەرۆىلەۋگە بولمايدى؛

كونسەرۆىلەنگەن تاعامداردى قولدانار الدىندا 20-25 مينۋت قايناتقان دۇرىس، وسى ۋاقىت ىشىندە بوتۋليزم توكسينى ىدىرايدى؛

ەسكىرگەن جانە تۇبىندە تۇنباسى بار بانكالاردى تاماققا قولدانۋعا بولمايدى؛

ءونىمدى رۇقسات ەتىلمەگەن ساۋدا ورىندارىنان ساتىپ الماعان ءجون؛

قاقپاعى ىسىنگەن كونسەرۆىلەردى جەمەگەن دۇرىس؛

بازاردان ۇيدە دايىندالعان سالات، ساڭىراۋقۇلاق، قاقتالعان بالىق، باسقا دا كوكونىستەردى ساتىپ الۋعا تىيىم سالىنادى.