سۋىق تيگەندە تاۋىق سورپاسىن ءىشۋ شىنىمەن كومەكتەسە مە؟ دارىگەر جاۋاپ بەردى

استانا. قازاقپارات - ج ر ۆ ي ينفەكسياسىن جۇقتىرعاندا تاۋىق سورپاسى كومەكتەسەتىنى تۋرالى پىكىر - جاي اڭىز عانا. بۇل تۋرالى پراكتيكا دارىگەرى الەكساندر مياسنيكوۆ ايتتى، - دەپ حابارلايدى «روسسيا 1» تەلەارناسى.

ول ⅩⅩ عاسىردىڭ 70-جىلدارىندا تاۋىق سورپاسىنىڭ اسەرى ۆيرۋسقا قارسى پرەپاراتتارمەن سالىستىرىلعانىنا نازار اۋداردى.

«ول جىلدارى ۆيرۋسقا قارسى زاتتار مۇلدەم جۇمىس ىستەمەدى»، - دەدى ول.

ول سورپا سۋىق ءتيۋدى ەمدەمەيتىنىن، جاي عانا اۋرۋعا توزۋگە عانا كومەكتەسەتىنىن ايتتى.

ەسكە سالايىق، بۇعان دەيىن تۇماۋ مەن سۋىق تيگەندە ەمدەلۋدىڭ وڭاي جولى حابارلانعان بولاتىن.

جەلتوقساندا تۇماۋ مەن سۋىق ءتيۋ كوبەيەدى. ىستىق كوتەرىلىپ، مازا كەتەدى. ىستىقتى ءتۇسىرىپ، تۇماۋدى ەمدەۋدىڭ وڭاي جولى، مامانداردىڭ ايتۋىنشا، ءۇستى-باستى اشىپ تاستاپ، شەشىنىپ جاتۋ.

ودان دا جاقسىسى - شەشىنىپ تاستاپ، سۋىتقىشتىڭ (ۆەنتيلياتوردىڭ) الدىندا وتىرۋ. كورپە جامىلىپ، ىستىق كۇيدە ورانىپ جاتۋدىڭ ورنىنا سۋىقتى پايدالانعان تيىمدىرەك. ديسكومفورتتى جەڭىلدەتۋگە، ىستىقتى تەز تۇسىرۋگە بولادى. ال ورانىپ جاتقاننان مازا قاشادى.

ال مۇرىن بىتەلسە، سپرەي سەبە بەرگەننەن گورى بۋ ينگالياتسياسىن جاساعان ابزال كورىنەدى. ىستىق اۋا مۇرىننان سۋ اعۋ مەن شىرىشتى توقتاتىپ، قاقىرىقتى سۇيىلتۋعا كومەكتەسەدى. تاماقتاعى قاقىرىقتى تۇسىرەدى.

اۋىرعان ادام تەرلەگىش كەلەتىندىكتەن، كوبىرەك سۋ ىشۋگە، قانت پەن تۇز جەۋگە تىرىسقانى ابزال. قانت ەنەرگيا بەرەدى، سۋ اعزاداعى ينفەكسيانى شايىپ شىعارادى.