سىنىق ايناعا قاراما. بۇل ىرىمنىڭ ءمانى نەدە؟
قازاقتا ايناعا قاتىستى ىرىم-تىيىم كوپ. سونىڭ ءبىرى «سىنعان ايناعا قاراما» تىيىمى. مۇنى بالا كەزدەن ەستىگەنىمىزبەن، ونىڭ ماعىناسىن، نەلىكتەن قاراۋعا بولمايتىنىن كوپشىلىك بىلە بەرمەيدى. بۇل تىيىمنىڭ ءمان-ماعىناسىن ءبىلۋ ءۇشىن ەتنوگراف بولات بوپاي ۇلى ايتىپ بەردى.
سىنىق ايناعا قاراماۋ ميستيكاعا تولى ەجەلدەن كەلە جاتقان، كونە ريم نانىم-سەنىمىنەن باستاۋ العان تىيىمنىڭ ءبىرى. بۇل سەنىم بويىنشا، سىنىق ايناعا قاراعان ادامنىڭ 7 جىل بويى جولى بولمايتىن كورىنەدى. سوندىقتان، ۇيدە سىنىق اينا ساقتاپ، وعان قاراعان دۇرىس ەمەس ساناعان. اينا سىنعان جاعدايدا، ودان الدەبىرەۋدىڭ بەينەسى كورىنبەۋى ءۇشىن تىكەلەي ەمەس، تۇسپالداپ كەلىپ، جانىنان تۇرىپ قالتاشاعا سالىپ، قوقىسقا تاستاۋ كەرەك ەكەن.
ال بولات بوپاي ۇلىنىڭ ايتۋىنشا، قازاق سىنىق اينادا شايتان مەكەن ەتەدى دەپ سەنگەن.
«سىنىق ايناعا قاراسا ادامنىڭ ءتۇرى جامان بولىپ كورىنەدى. سىنىق اينانى شايتان مەكەن ەتەدى دەپ جامان ىرىمعا سانايدى. قازاق سىنىق ىدىس، سىنىق اينا جالپى سىنىق دۇنيەنى ۇيگە قويمايدى، قوقىسقا تاستايدى»، - دەيدى ەتنوگراف.
سونىمەن قاتار، سىنىق ايناعا قاراۋ ادامنىڭ ءجۇزى سىنىق، دەنساۋلىعىنداعى ماسەلەنىڭ تۋىنداۋىنا الىپ كەلەدى دەگەن سەنىم بار.
بۇل ىرىمعا ءدىن جاعىنان كەلەتىن بولساق، ول شاريعاتتا نەگىزسىز ەكەن. سەبەبى، بارلىق زاتتى، ءىستى جامان ىرىمعا بالاپ، وعان سەنىپ، كەيىنگى ءىس-ارەكەتىن نەگىزدەۋ ءدىن تالىمىنە تەرىس. ءدىن وكىلدەرىنىڭ سوزىنە سۇيەنسەك، پايعامبارىمىز پەسسيميستىك كوڭىل-كۇي مەن تۇسىنىك قالىپتاستىراتىن ىرىمداردان تىيىپ، بارلىعى اللانىڭ قالاۋىنا بايلانىستى دەپ ۇيرەتكەن.
ايتا كەتەيىك، بۇعان دەيىن وسىنداي ىرىم-تىيىمنىڭ ءبىرى تۇندە نەگە تىرناق الۋعا بولمايتىنى حابارلانعان بولاتىن. ەتنوگرافتىڭ ايتۋىنشا، بۇرىن قازاقتار تۇندە تىرناق العان ادامعا قاۋىپ تونەدى دەپ سەنگەن ەكەن.
