سينوپتيكتەر بيىلعى قىستىڭ قالاي بولاتىنىن بولجادى
استانا. KAZINFORM - «قازگيدرومەت» ر م ك ماماندارى 2024-2025-جىلعى قىس مەزگىلىنە ارنالعان ماۋسىمدىق بولجامىن جاريالاپ، ەل اۋماعىندا اۋا رايىنىڭ قالاي بولاتىنىن مالىمدەدى.
جەلتوقساندا ەلدىڭ باسىم بولىگىندە تسيكلونداردىڭ بەلسەندىلىگى ارتادى. بۇل قۇبىلىس قار جاۋۋىمەن، بوراندارمەن جانە ەكپىندى جەلمەن قاتار جۇرەدى. قازاقستاننىڭ وڭتۇستىك وڭىرلەرىنە جاڭبىر مەن قار كەزەك-كەزەك جاۋىپ، تاۋلى ايماقتارعا قاردىڭ قالىڭ ءتۇسۋى مۇمكىن. باتىس پەن وڭتۇستىكتە كوكتايعاق پەن تۇمان ءجيى بولادى.
سينوپتيكتەردىڭ مالىمەتىنشە، سولتۇستىك-باتىس جانە سولتۇستىكتەن كەلەتىن انتيتسيكلوندار اۋا تەمپەراتۋراسىن ايتارلىقتاي تومەندەتۋى ىقتيمال.
قاڭتاردا قازاقستاننىڭ كوپ بولىگىندە اۋا تەمپەراتۋراسى كليماتتىق نورماعا سايكەس بولادى دەپ بولجانىپ وتىر. ال اقپاندا اۋا تەمپەراتۋراسى نورمادان 1 گرادۋسقا جوعارى بولۋى ىقتيمال.
قىسقى كەزەڭنىڭ جالپى سيپاتتاماسى
2024-2025-جىلعى قىس مەزگىلىندە ەل اۋماعىندا تەمپەراتۋرالىق رەجيم كليماتتىق نورما شەگىندە بولادى. دەگەنمەن جاۋىن-شاشىن مولشەرى كوپجىلدىق نورمادان ارتىق ءتۇسۋى مۇمكىن. سينوپتيكتەر كەي كەزەڭدە جاۋىن-شاشىننىڭ توقتاپ، اۋا تەمپەراتۋراسىنىڭ انومالدى تومەندەۋى مۇمكىن ەكەنىن دە ەسكەرتتى.
«قازگيدرومەت» ر م ك ماماندارى ەل تۇرعىندارىن قىس مەزگىلىندە اۋا رايى وزگەرىستەرىن باقىلاپ، قاۋىپسىزدىك شارالارىن ساقتاۋعا شاقىرادى.
