سىننان وتكەن سەنىمدى سەرىكتەستەر - توقايەۆ سينگاپۋرعا مەملەكەتتىك ساپارمەن بارادى
قازاقستان مەن سينگاپۋر اراسىنداعى ديپلوماتيالىق قاتىناس ورناعانىنا 30 جىلدان استى. ەكونوميكانىڭ ءتۇرلى سالاسىندا ەكى ەلدىڭ ءوزارا ءتيىمدى سەرىكتەستىك قۇرۋعا الەۋەتى جوعارى.

پرەزيدەنت قاسىم- جومارت توقايەۆتىڭ سينگاپۋرعا مەملەكەتتىك ساپارى دا سوعان دالەل. بىلتىر سينگاپۋر پرەزيدەنتى قازاقستانعا العاش رەت كەلگەن ەدى. ال، ءبىزدىڭ پرەزيدەنت اتالعان ەلگە ەكىنشى رەت بارا جاتىر. ءبىرىنشى رەسمي ساپارى 2022 -جىلى بولعان. وسى جولعى ەكى كۇندىك ساپار اياسىندا قاسىم- جومارت توقايەۆ ەل باسشىلارىمەن كەزدەسۋدەن بولەك، قازاقستان- سينگاپۋر بيزنەس فورۋمىنا دا قاتىسادى.
ەكىجاقتى قارىم- قاتىناستىڭ بۇگىنگى جايى جانە قاسىم- جومارت توقايەۆتىڭ مەملەكەتتىك ساپارى تۋرالى Kazinform ءتىلشىسىنىڭ شولۋىنان وقىڭىز.
ديپلوماتيالىق قاتىناس
قازاقستاننىڭ سىرتقى ىستەر مينيسترلىگىنىڭ مالىمەتىنشە، ەلدەردىڭ ديپلوماتيالىق قاتىناسى 1993 -جىلدىڭ 30 -ناۋرىزىندا ورناعان. قازاقستاننىڭ سينگاپۋرداعى ديپميسسياسى اراعا 10 جىل سالىپ، 2003 -جىلى قاراشادا اشىلعان. ال تاعى 5 جىلدان كەيىن - 2008 -جىلعى 11-جەلتوقساندا قازاقستاننىڭ ەلشىلىگى بولىپ قايتا قۇرىلدى. وسى جىلدار ىشىندە سەرىكتەستەر سەنىم مەن ءوزارا قۇرمەتكە نەگىزدەلگەن بەرىك قارىم-قاتىناس ورناتتى.
ساياسي سەرىكتەستىك
جوعارى دەڭگەيدەگى ساياسي ديالوگ -ەكى ەل اراسىنداعى تۇراقتى دوستىق قاتىناستاردىڭ نەگىزى. 2023 -جىلعى مامىردا سول كەزدەگى سينگاپۋر پرەزيدەنتى حاليما ياكوب قازاقستان مەن ورتالىق ازياعا العاشقى ساپارىن جاساپ، مەملەكەت باسشىسى قاسىم-جومارت توقايەۆپەن كەزدەستى. بۇل جالپى سينگاپۋر پرەزيدەنتتەرىنىڭ ءبىزدىڭ ايماققا جاساعان العاشقى تاريحي ساپارى بولدى.
مەملەكەت باسشىسى قاسىم-جومارت توقايەۆ سينگاپۋر پرەزيدەنتى حاليما ياكوبقا I دارەجەلى «دوستىق» وردەنىن تابىس ەتتى. ماراپاتتاۋ راسىمىندە مەملەكەت باسشىسى سينگاپۋر پرەزيدەنتىنىڭ ەكىجاقتى قارىم-قاتىناستاردى نىعايتۋعا جانە دامىتۋعا قوسقان ەلەۋلى ۇلەسىن اتاپ ءوتتى. حاليما ياكوب كورسەتكەن سىي- قۇرمەتى ءۇشىن قاسىم- جومارت توقايەۆقا العىس ايتىپ، ەكى ەل اراسىنداعى كوپجاقتى ىنتىماقتاستىقتى دامىتۋعا بار كۇش-جىگەرىن جۇمسايتىنىنا سەنىم ءبىلدىردى.
بۇل ساپاردىڭ ەكى ەل ءۇشىن ماڭىزى زور بولدى. ەكىجاقتى قارىم-قاتىناستى جاڭا دەڭگەيگە جوعارىلاتتى.
ساۋدا-ەكونوميكا جانە ينۆەستيتسيالىق بايلانىس
سونىمەن قاتار، ساپار اياسىندا پرەزيدەنت حاليما ياكوبتىڭ قاتىسۋىمەن استانادا قازاقستان-سينگاپۋر بيزنەس فورۋمى ءوتتى. قوس ەلدىڭ كاسىپكەرلەرى مەن ۋاكىلەتتى مەملەكەتتىك ورگاندارىنىڭ 200 دەن استام وكىلى ىنتىماقتاستىقتىڭ كەلەشەگىن تالقىلادى.
سول جيىندا حاليما ياكوب قازاقستان سينگاپۋردىڭ ورتالىق ازياداعى ەڭ ءىرى سەرىكتەسى ەكەنىن جانە ەلدەر اراسىنداعى قارىم-قاتىناستاردىڭ ودان ءارى نىعايا تۇسەتىنىن اتاپ ءوتتى.
بيزنەس-فورۋم قازاقستاندا جوبالاردى جۇزەگە اسىرۋ مۇمكىندىكتەرىن زەرتتەگىسى كەلەتىن كوپتەگەن بيزنەس كوشباسشىلارىن، ونىڭ ىشىندە، سينگاپۋرلىق كومپانيالاردىڭ باسىن قوستى. كۇشەيىپ كەلە جاتقان گەوساياسي سىن-قاتەرلەردى ەسكەرە وتىرىپ، بۇل ەكى ەلدىڭ ەكونوميكاسىن ءارتاراپتاندىرۋعا ىقپال ەتەدى. وسى تۇرعىدا سينگاپۋر سەرىكتەستىكتى كەڭەيتۋگە ءاردايىم اشىق. ورتالىق ازيانىڭ كىندىك ورتاسىندا ورنالاسقان قازاقستان -ءوزىنىڭ وراسان زور رەسۋرسىمەن مەملەكەتتەر پەن كومپانيالار ءۇشىن ينۆەستيتسيالىق تارتىمدى ەل، - دەگەن ەدى سول كەزدەگى سينگاپۋر پرەزيدەنتى.
ءسويتىپ قازاقستان مەن سينگاپۋردىڭ وكىلدەرى ساۋدا، ينۆەستيتسيا، لوگيستيكا جانە مەملەكەتتىك قىزمەتشىلەردى وقىتۋ سالالارىنداعى ىنتىماقتاستىقتى نىعايتۋعا باعىتتالعان ءبىرقاتار ەكىجاقتى كەلىسىمدەر مەن مەموراندۋمدارعا، سونداي- اق قۇنى $275 ميلليون بولاتىن كوممەرتسيالىق قۇجاتتارعا قول قويدى.
ينۆەستيتسياعا كەلەتىن بولساق، ەكىجاقتى ينۆەستيتسيالىق ىنتىماقتاستىق ايتارلىقتاي ىلگەرىلەپ كەلەدى. بۇگىندە قازاقستاندا 140 تان استام سينگاپۋرلىق كومپانيالار مەن بىرلەسكەن كاسىپورىندار جۇمىس ىستەيدى. 2010-2023 -جىلدارى سينگاپۋردان قازاقستانعا تىكەلەي شەتەلدىك ينۆەستيتسيالار اعىنى 1,4 ميلليارد دوللاردى قۇرادى. ءبىرقاتار ماڭىزدى جوبالار جۇزەگە اسىرىلىپ جاتىر.
ەرەكشە جوبا - G4 City
سونداي جوبالاردىڭ ءبىرى - G4 City. سينگاپۋرلىق «Surbana Jurong» كومپانياسىمەن بىرلەسىپ «الاتاۋ» (G4 City) ينتەگراتسيالانعان قالاسىن سالۋ جوباسى جالعاسىپ جاتىر. جاڭا قالادا شامامەن 2,2 ميلليون ادام تۇرادى دەپ بولجانادى.
الماتى وبلىسىنداعى «الاتاۋ» (G4 City) ينتەگراتسيالانعان قالاسىن دامىتۋ تۇجىرىمداماسىنا سايكەس جوبا ءتورت تەماتيكالىق اۋداننان تۇراتىن بولادى:
Gate District - ىسكەرلىك جانە قارجى ورتالىعى؛
Golden District - ءبىلىم بەرۋ جانە مەديتسينالىق حاب؛
Growing District - يننوۆاتسيالىق-يندۋستريالىق جانە ساۋدا-لوگيستيكالىق ايماقتار؛
Green District - تۋريستىك كلاستەر.
ايتا كەتەيىك، 2023 -جىلى ماڭىزدى ەكىجاقتى قۇجاتقا -قازاقستان مەن سينگاپۋر اراسىنداعى قىزمەتتەر ساۋداسى مەن ينۆەستيتسيالار تۋرالى مەملەكەتارالىق كەلىسىمگە قول قويىلدى. بۇل قۇجات سينگاپۋر پرەزيدەنتىنىڭ مەملەكەتتىك ساپارىنىڭ ماڭىزدى وقيعاسى بولدى جانە ول ءتيىستى ەرەجەلەردى جەڭىلدەتۋ جانە ءبىر-ءبىرىنىڭ نارىعىنا شىعۋ ءۇشىن كەدەرگىلەردى ازايتۋ ارقىلى ەكىجاقتى ەكونوميكالىق ىنتىماقتاستىق پەن ىسكەرلىك بايلانىستاردى كوتەرمەلەۋگە باعىتتالعان.
قازىرگى ۋاقىتتا ترانسكاسپي حالىقارالىق كولىك مارشرۋتىنىڭ لوگيستيكالىق ءدالىزىن دامىتۋ جانە وڭتۇستىك- شىعىس ازيامەن ءوزارا كولىك بايلانىسىن جاقسارتۋ بويىنشا جۇمىستار بەلسەندى جۇرگىزىلىپ جاتىر. سونداي- اق، «PSA International» جانە ونىڭ ەنشىلەس كومپانياسى «Global DTC» سياقتى كومپانيالارمەن بىرلەسىپ جۇزەگە اسىرىلادى.
جالپى، قازاقستان مەن سينگاپۋر اراسىنداعى كولىك، ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ ماڭىزى زور. تاراپتار ەكونوميكالىق ىنتىماقتاستىق جوبالارى مەن ءوزارا ءتيىمدى ىنتىماقتاستىق باعدارلامالارىن ىلگەرىلەتۋ ماسەلەلەرىن تالقىلاۋدى جالعاستىرىپ كەلەدى. سونىمەن قاتار، ەلىمىزدىڭ ترانزيتتىك الەۋەتىن كەڭەيتۋگە جانە وڭدەۋ ونەركاسىبى، اقپاراتتىق-كوممۋنيكاتسيالىق تەحنولوگيالار، قۇرىلىس جانە قارجى سالالارىنداعى قازاقستاندىق- سينگاپۋرلىق كاسىپورىنداردىڭ جوبالارىن دامىتۋعا ايرىقشا نازار اۋدارىلادى.
توقايەۆتىڭ ساپارى
«مەملەكەت باسشىسى 23-24-مامىر كۇندەرى پرەزيدەنت تارمان شانمۋگاراتنامنىڭ شاقىرۋىمەن سينگاپۋر رەسپۋبليكاسىنا مەملەكەتتىك ساپارمەن بارادى. ساپار اياسىندا قاسىم- جومارت توقايەۆ سينگاپۋردىڭ جوعارى باسشىلىعىمەن، حالىقارالىق ءىرى كومپانيالاردىڭ جەتەكشىلەرىمەن ءبىرقاتار كەزدەسۋ وتكىزەدى جانە قازاقستان- سينگاپۋر بيزنەس فورۋمىنىڭ جۇمىسىنا قاتىسادى دەپ جوسپارلانىپ وتىر»، - دەلىنگەن اقوردانىڭ باسپا ءسوز قىزمەتى تاراتقان حابارلامادا.
بۇل ساپار ەكى ەلدىڭ جان-جاقتى قاتىناسىنىڭ دامىپ كەلە جاتقانىنا دالەل. مۇنى ساراپشىلار دا اتاپ ءوتتى. سونداي- اق، ق ر پرەزيدەنتىنىڭ جانىنداعى قازاقستان ستراتەگيالىق زەرتتەۋلەر ينستيتۋتىنىڭ ساراپشىلارى، مەملەكەت باسشىسىنىڭ بۇل ساپارىنىڭ ەلىمىز ءۇشىن ماڭىزى زور دەپ وتىر.
قازاقستان مەن سينگاپۋر اراسىنداعى قارىم-قاتىناس قارقىندى تۇردە دامىپ كەلەدى. وتكەن جىلدىڭ كورسەتكىشتەرىنە سۇيەنسەك، ەكى ەل اراسىنداعى تاۋار اينالىمى 1,6 ميلليارد دوللارعا تەڭ بولدى. قازاقستاندا سينگاپۋرلىق 143 كاسىپورىن جۇمىس ىستەيدى. جالپى، بۇل ساپاردىڭ قازاقستان ءۇشىن پايداسى زور. سەبەبى سينگاپۋر - الەمدە تەحنولوگيا، قارجى سالاسىنداعى جەتەكشى ەلدەردىڭ ءبىرى. لوگيستيكالىق حاب دەپ اتاپ وتۋگە بولادى، - دەدى ق س ز ي ازيالىق زەرتتەۋلەر ءبولىمىنىڭ اعا ساراپشىسى باۋىرجان اۋكەن.
اۆتور
راحيلا تلەۋوۆا