سينگاپۋر قازاقستانعا ينۆەستيسيانى ءتيىمدى باسقارۋدىڭ تاجىريبەسىن ۇسىنباق

بۇگىن ءماجىلىستىڭ جالپى وتىرىسىندا «قازاقستان ۇكىمەتى مەن سينگاپۋر ۇكىمەتى اراسىنداعى ينۆەستيسيالاردى كوتەرمەلەۋ جانە ءوزارا قورعاۋ تۋرالى كەلىسىمدى راتيفيكاتسيالاۋ تۋرالى» زاڭى قابىلداندى، دەپ حابارلايدى Kazinform.

كەلىسىمگە 2018 -جىلعى 21-قاراشادا قول قويىلدى.

«ينۆەستيسيالىق ىنتىماقتاستىق ەكى ەل اراسىنداعى ەكونوميكالىق بايلانىستاردى نىعايتۋدىڭ ماڭىزدى اسپەكتىسى سانالادى. سينگاپۋر قازاقستاننىڭ وڭتۇستىك- شىعىس ازياداعى جەتەكشى سەرىكتەستەرىنىڭ ءبىرى جانە الەمدەگى ماڭىزدى قارجىلىق حابتاردىڭ بىرىنە اينالعان. قازىر ينۆەستيسيا سالاسىندا ەكىجاقتى قارىم-قاتىناستار بەلسەندى دامىپ كەلەدى»، - دەدى سىرتقى ىستەر ءمينيسترىنىڭ ورىنباسارى نازيرا نۇربايەۆا.

ونىڭ سوزىنە قاراعاندا، قازاقستان ەكونوميكاسىن دامىتۋ ءۇشىن سينگاپۋر ينۆەستيسيانى ءتيىمدى باسقارۋدىڭ تاجىريبەسى مەن تەحنولوگياسىن ۇسىنا الادى. بۇل قۇجات اياسىندا ينۆەستورلاردىڭ حالىقارالىق قۇقىقتىق كەپىلدىكتەرىن قامتاماسىز ەتۋ ەسكەرىلگەن.

«اتاپ ايتقاندا، كەلىسىم ينۆەستيسيالىق قىزمەتتى جۇزەگە اسىرۋ كەزىندە ينۆەستورلاردىڭ قۇقىقتارىنىڭ كەپىلدىكتەرىن بەكىتۋ ارقىلى ىنتىماقتاستىقتىڭ قۇقىقتىق نەگىزىن قۇرۋدى قاراستىرىپ وتىر. قۇجات راتيفيكاتسيالانعان جاعدايدا، ونى ىسكە اسىرۋ تەرىس الەۋمەتتىك-ەكونوميكالىق نەمەسە قۇقىقتىق سالدارعا اكەپ سوقپايدى جانە رەسپۋبليكالىق بيۋدجەتتەن قوسىمشا قارجىلىق شىعىنداردى تالاپ ەتپەيدى»، - دەدى ءمينيستردىڭ ورىنباسارى.

اۆتور

رۋسلان عابباسوۆ