ەسىك قالاسىندا ەر ادام «قىل كوپىردەن» قۇلاپ، مەرت بولدى

الماتى. KAZINFORM - الماتى وبلىسى بولەك اۋىلىندا ءتورت بالانىڭ اكەسى بيىكتەن قۇلاپ، مەرت بولدى. قايعىلى وقيعا ەل اراسىندا «قىل كوپىر» اتانىپ كەتكەن ەسىك قالاسى ماڭىنداعى ۇلكەن الماتى كانالىن كەسىپ ءوتۋ كەزىندە بولدى، دەپ حابارلايدى Almaty.tv.

10 مەتر بيىكتىكتە تۇرعان كوپىردىڭ ارنايى جاقتاۋى نەمەسە ۇستايتىن قورشاۋى جوق. بۇل قاۋىپتى وتكەلدەن كۇنىنە جۇزدەگەن ادام وتەدى. ال كۇنى كەشە دۇكەنگە شىعىپ، قايتا ۇيىنە ورالماعان وتاعاسى وسى ماڭنان جۇلىنى ءۇزىلىپ، باسى جارىلعان ءولى كۇيىندە تابىلعان. اتالعان كانال ماڭىنداعى حالىق، تاعى دا «ادام شىعىنى بولماسىن» دەپ بۇگىن اكىمدىك وكىلدەرىنە تالاپ قويدى.

ەسى كەتكەن ەل «كەلەسى كىم؟» دەپ دابىل قاعىپ وتىر. بۇعان دەيىن تالاي ادام سۋعا كەتىپ، دەنەسىن ازەر تاۋىپتى. ال ەسىك قالاسىنا ەكى اتتام جەردە تۇرسا دا، اۋىل ستاتۋسىن الا الماي جۇرگەن ەل «وركەنيەتتەن جۇردايمىز» دەيدى.