سيفرلىق ينكليۋزيا: ازيا جانە تىنىق مۇحيتى ءوڭىرىنىڭ 30 دان استام ءمينيسترى استانادا باس قوستى
استانا. KAZINFORM - استانادا سيفرلىق ينكليۋزيا جانە ترانسفورماتسيا بويىنشا ورتالىق ازياداعى العاشقى ازيا-تىنىق مۇحيتى مينيسترلىك كونفەرەنسياسى باستالدى. وندا 30-دان استام ەلدىڭ سيفرلىق دامۋ كوشباسشىلارى باس قوسۋدا.
اۋقىمدى جيىندى ب ۇ ۇ ازيا جانە تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسياسى ۇيىمداستىرعان. قازاقستاندا ا ت م ە ا ك-نىڭ كونفەرەنسياسىن وتكىزۋ ۇسىنىسى 79-شى سەسسيادا بارلىق مۇشە مەملەكەتتەردىڭ ءبىراۋىزدان قولداۋىنا يە بولدى، بۇل ەلدىڭ وڭىردەگى سيفرلىق تەحنولوگيالار مەن تۇراقتى دامۋدى ىلگەرىلەتۋدەگى ماڭىزدى ءرولىن اتاپ كورسەتەدى.
شارانىڭ اشىلۋ سالتاناتىندا ق ر پرەمەر-ءمينيسترى ولجاس بەكتەنوۆ ازيا تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسيا 80 جىلعا جۋىق ۋاقىت بويى وسى ايماقتاعى 4 ميللياردتان استام ادامنىڭ ومىرىنە ايتارلىقتاي اسەر ەتىپ وتىرعانىن جەتكىزدى.
«قازاقستان 30 جىلدان استام ۋاقىت بويى ازيا تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسياعا تولىققاندى مۇشە بولىپ وتىر. وعان قوسا، ءبىز ۇزدىك الەمدىك تاجىريبە نەگىزىندە سەرىكتەستىك جانە تاتۋ كورشىلىك قارىم-قاتىناستار رۋحىندا سەرپىندى دامۋدى جالعاستىرىپ كەلەمىز. وسى جىلدارى ءبىز قورشاعان ورتانى قورعاۋ، تابيعي رەسۋرستاردى باسقارۋ، ينۆەستيتسيالىق بايلانىستار، ساۋدا، ەنەرگەتيكا جانە كولىك سياقتى ماڭىزدى باعىتتاردا قارىم- قاتىناستى دامىتا الدىق»، - دەدى و. بەكتەنوۆ.
پرەزيدەنت قاسىم-جومارت توقايەۆ سيفرلىق تەحنولوگيالار ەكونوميكالىق ءوسۋدى قامتاماسىز ەتە وتىرىپ، ميلليونداعان ادامدارعا بيزنەس، ءبىلىم بەرۋ جانە دەنساۋلىق ساقتاۋ سالاسىندا جاڭا كوكجيەكتەردى اشۋعا مۇمكىندىك بەرىپ وتىرعانىن اتاپ كورسەتكەن ەدى.
بۇگىنگى تاڭدا قازاقستان الەمدەگى سيفرلىق دامۋ جاعىنان ەڭ وزىق 30 مەملەكەتتىڭ قاتارىنا كىرەدى جانە ونلاين قىزمەتتەر بويىنشا 8- ورىندا. بارلىق مەملەكەتتىك قىزمەتتەردىڭ %90 دان استامى موبيلدى قۇرىلعىلاردان حالىققا قولجەتىمدى.
«قازاقستان سيفرلىق جىبەك جولىن دامىتۋ شەڭبەرىندە كورشىلەرمەن بىرگە پارسى شىعاناعى ەلدەرىنە شىعىپ، كاسپي تەڭىزىنىڭ تۇبىنە تالشىقتى-وپتيكالىق بايلانىس جەلىلەرىن توسەۋ، سونداي-اق باتىس- شىعىس جوباسى بويىنشا ترانزيتتىك الەۋەتتى ودان ءارى كەڭەيتۋ جونىندەگى جوبانى ىسكە اسىرۋدا. بۇل جاڭا تەحنولوگيالاردى دامىتۋ، ءىرى Big Tech كومپانيالارىن تارتۋ ءۇشىن دەرەكتەردى جيناۋ، ساقتاۋ جانە وڭدەۋدىڭ زاماناۋي ينفراقۇرىلىمىن قالىپتاستىرۋعا مۇمكىندىك بەرەدى»، - دەدى پرەمەر-مينيستر.
كونفەرەنسيانىڭ العاشقى ەكى كۇنىندە پلەنارلىق تالقىلاۋلار، قوسىمشا ءىس-شارالار جانە مينيسترلەر اراسىنداعى ەكىجاقتى كەزدەسۋلەر ءوتىپ، مەموراندۋمدار مەن كەلىسىمدەرگە قول قويىلادى.
كونفەرەنسيانىڭ سوڭعى كۇنى - 5- قىركۇيەكتە بولاتىن Kazakhstan Tech Solution Day شەڭبەرىندە IT-كومپانيالار، ستارتاپتار مەن قازاقستاننىڭ SmartBridge ،Smart Data Ukimet ،eOtinish سياقتى وزىق سيفرلىق ازىرلەمەلەرى تانىستىرىلادى. سونىمەن قاتار ورتالىق ازياداعى ەڭ ءىرى يننوۆاتسيالىق ورتالىق - Astana Hub حالىقارالىق تەحنوپاركىنىڭ مۇمكىندىكتەرى دە تانىستىرىلادى.
اۆتور
ايجان سەرىكجان قىزى
