سيفرلاندىرۋ مينيسترلىگىنىڭ وكىلى WeChat تۋرالى: تۇبىندە ءبىز دە سوعان كەلەتىن شىعارمىز
استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى اقپاراتتىق قاۋىپسىزدىك كوميتەتىنىڭ ءتوراعاسى رۋسلان ءابدىقالىقوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا Whatsapp ،Telegram مەسسەندجەرلەرىندەگى الاياقتىقتى شەكتەۋ تۋرالى پىكىر ءبىلدىردى.
«مەسسەندجەرلەردەن تۋىندايتىن پروبلەمالار شىنىمەن وزەكتى. ءوزىم دە اپتا سايىن وسىنداي جايتتارعا تاپ كەلەمىن. ءتىپتى مينيستر مەن ۆيتسە-مينيسترلەر اتىنان قانداي داپ ءبىر تاپسىرما جىبەرەتىن جايتتار بولادى. پروبلەمانىڭ استارىندا نە جاتىر. ءبارىمىز شەتەلدىك مەسسەندجەرلەردى قولدانامىز. سايكەسىنشە، سول Whatsapp ،Telegram-نىڭ اكىمشىلىگىنە جۇگىنبەسەك، جاعداي وزگەرمەيدى. ويتكەنى Telegram-عا دا، whatsapp-قا دا كليەنتتەردىڭ ءبىر-ءبىرىن الداپ جاتقانى ماسەلە ەمەس. ءبىز ءاربىر حابارلاسقان اككاۋنتتىڭ ارتىندا ناقتى ادام، ناقتى ابونەنت بولعانىن تالاپ ەتۋىمىز كەرەك. ونداي تالاپ Telegram-دا دا، Whatsapp-تا دا قاراستىرىلماعان»، - دەدى ول.
كوميتەت باسشىسى بۇل تۇرعىدا قىتايدىڭ تاجىريبەسىن ءساتتى دەپ ەسەپتەيتىنىن ايتتى.
«قىتايدىڭ WeChat مەسسەنجەرىندە ءبىر اككاۋنتقا تەك ءبىر ءنومىر، ءبىر عانا ادام تىركەلە الادى. ونىڭ ۇستىنە WeChat كليەنتى بولۋ ءۇشىن قۇجاتتارىڭدى تۇگەل كورسەتۋ كەرەك. سەنىڭ شىن ادام ەكەنىڭدى باسقا ەكى ادام راستاپ، كەپىلدىك ەتۋى قاجەت. ءتۇپتىڭ تۇبىندە ءبىز دە وسىعان كەلەتىن شىعارمىز. ءبىراق ازاماتتار ءتۇسىنۋ كەرەك، ماسەلەنىڭ ءبىر جاعىندا قاۋىپسىزدىك تۇرسا، ەكىنشى جاعىندا ادام قۇقىعى تۇر. ازاماتتار ينتەرنەتتەگى انونيمدىلىگىمەن قوشتاسۋعا دايىن با؟ مۇنى دا ۇمىتپاۋ كەرەك. كەز كەلگەن قاۋىپسىزدىك تالابىن كۇشەيتۋ شاراسى ينتەرنەتتەگى انونيمدىلىك قۇقىعىمىزدى شەكتەيدى. وعان قوعام دايىن بولسا، مەسسەندجەر يەلەرىنە تالاپ ەتەيىك»، - دەدى رۋسلان ءابىقالىقوۆ.
اۆتور
ەسىمجان ناقتىباي
