سينگاپۋردىڭ سۋ باسقارۋ تاجىريبەسى قازاقستاندا قولدانىلۋى مۇمكىن

قازاقستاندىق دەلەگاتسيا سۋ رەسۋرستارى جانە يرريگاتسيا ۆيتسە- ءمينيسترى جاندوس ءسالىموۆتىڭ جەتەكشىلىگىمەن سينگاپۋر ۇكىمەتى ۇيىمداستىرعان «قالالىق سۋ رەسۋرستارى مەن قالدىقتاردى تۇراقتى باسقارۋ سالاسىنداعى كوشباسشىلىق» اتتى بىلىكتىلىكتى ارتتىرۋ باعدارلاماسىنا قاتىسىپ جاتىر.

باعدارلاما ق ر سۋ رەسۋرستارى جانە يرريگاتسيا مينيسترلىگى مەن Singapore Cooperation Enterprise كومپانياسى اراسىندا جاسالعان كەلىسىم اياسىندا جۇزەگە اسىرىلۋدا. بۇل كەلىسىمگە سينگاپۋر رەسپۋبليكاسىنىڭ اعا ءمينيسترىنىڭ قازاقستانعا 2026-جىلعى 26-تامىزداعى رەسمي ساپارى بارىسىندا قول قويىلعان.

باعدارلاما اياسىندا قازاقستاندىق ماماندار سينگاپۋردىڭ سۋ رەسۋرستارىن كەشەندى باسقارۋ جونىندەگى تاجىريبەسىن زەردەلەپ جاتىر. اتاپ ايتقاندا، سۋدىڭ ىسىرابىن ازايتۋ، سۋ رەسۋرستارىن ۇتىمدى پايدالانۋ، سۋ تاسقىنى قاۋپىن باسقارۋ، ەكولوگيالىق تۇرعىدان ءتيىمدى شەشىمدەردى ەنگىزۋ جانە سۋ ينفراقۇرىلىمىن قالالىق ورتاعا كىرىكتىرۋ ماسەلەلەرىنە باسا نازار اۋدارىلۋدا. سونداي-اق سينگاپۋردىڭ PUB ۇلتتىق سۋ اگەنتتىگى قىزمەتىمەن تانىسىپ جاتىر.

بۇدان بولەك، باعدارلاما اياسىندا زاماناۋي تاسىلدەر مەن تەحنولوگيالاردىڭ ءىس جۇزىندە قالاي قولدانىلاتىنىن زەردەلەۋ ماقساتىندا ءىرى سۋ شارۋاشىلىعى نىساندارىنا بارۋ جوسپارلانعان.

باعدارلامانىڭ پراكتيكالىق بولىمىنەن بولەك، سينگاپۋر رەسپۋبليكاسىنىڭ ەڭبەك رەسۋرستارى، ساۋدا جانە ونەركاسىپ ماسەلەلەرى جونىندەگى مەملەكەتتىك ءمينيسترى فۋ چەسيانمەن، قازاقستان رەسپۋبليكاسىنىڭ سينگاپۋر رەسپۋبليكاسىنداعى توتەنشە جانە وكىلەتتى ەلشىسى اسقار قۇتتىقاداممەن جانە بيزنەس وكىلدەرىمەن كەزدەسۋلەر ءوتتى.

كەزدەسۋلەردە سۋ سالاسىن دامىتۋ، سۋ رەسۋرستارىن باسقارۋدىڭ زاماناۋي تاسىلدەرى مەن وزىق تاجىريبەلەردى قولدانۋ ماسەلەلەرى بويىنشا پىكىر الماسىلدى. سونىمەن قاتار قازاقستان مەن سينگاپۋر اراسىنداعى سۋ سالاسىنداعى ىنتىماقتاستىقتى ودان ءارى دامىتۋ پەرسپەكتيۆالارى تالقىلاندى.

- باعدارلاما ناتيجەلەرى قازاقستاننىڭ سۋ سالاسىنا ارنالعان تەحنولوگيالىق جانە باسقارۋشىلىق شەشىمدەردى ازىرلەۋ كەزىندە ەسكەرىلەدى. اتاپ ايتقاندا، سۋدىڭ ىسىرابىن ازايتۋ، سيفرلاندىرۋ، سۋ رەسۋرستارىن قايتا پايدالانۋ جانە سۋ شارۋاشىلىعى ينفراقۇرىلىمىنىڭ تيىمدىلىگىن ارتتىرۋ باعىتتارىنا باسىمدىق بەرىلەدى، - دەدى ق ر سۋ رەسۋرستارى جانە يرريگاتسيا ۆيتسە-ءمينيسترى جاندوس ءسالىموۆ.

بۇعان دەيىن سينگاپۋرلىق كومپانيا استانانى وڭىرلىك اۆياتسيالىق حابقا اينالدىرۋ ىسىنە اتسالىساتىنىن جازعانبىز.