سينگاپۋر عالىمدارى كيىمنىڭ جەڭىنە سەنسورلى ەكران تىكتى

ناتيجەسىندە عالىمدار كيىمگە كىرىكتىرىلگەن الەمدەگى العاشقى سەنسورلى ەكراندى جاساپ شىعاردى. ول سۋرەت پەن بەينە كورسەتە الادى، ساۋساقپەن باسقاندى سەزەدى جانە باسقا قۇرىلعىلارعا سىمسىز قوسىلادى. ەڭ باستىسى، جەڭ ءوزىنىڭ يكەمدىلىگىن ساقتاپ، اۋا وتكىزەدى ءارى جۋۋعا دا جارامدى.

جەڭدەگى سيفرلىق ينتەرفەيس

مۇنداي تەحنولوگيانى بۇعان دەيىن Google مەن Levi’s كومپانيالارى دا جۇزەگە اسىرىپ كورۋگە تىرىسقان. 2017 -جىلى ولار Jacquard جوباسى اياسىندا توق وتكىزەتىن جىپتەر توقىلعان Commuter Trucker دجينس كۇرتەسىن ساتىلىمعا شىعاردى. ونىڭ جەڭىندەگى مانجەتتى ساۋساقپەن ءتۇرتۋ نەمەسە سيپاۋ ارقىلى مۋزىكانى اۋىستىرۋعا، قوڭىراۋدى قابىلداماۋعا جانە جول ءجۇرۋ ۋاقىتىن بىلۋگە بولاتىن. الايدا ول كۇرتەدە ەكران بولعان جوق: ماتا تەك سەنسورلى پانەل قىزمەتىن اتقاردى، ال ەلەكتروندى بولشەكتەر مانجەتكە بەكىتىلەتىن شاعىن قۇرىلعىنىڭ ىشىنە ورنالاستىرىلدى.

ءبىز كۇندەلىكتى قولداناتىن تەلەفون مەن نوۋتبۋك ەكراندارى - كەسكىن كورسەتەتىن جالپاق ءارى قاتتى پانەلدەر. ال ماتا ءبىر-بىرىمەن ورىلگەن جىڭىشكە جىپتەردەن تۇرادى. سوندىقتان ءجىپ سەكىلدى يىلگىش ماتەريالدىڭ ىشىنە تولىق ءتۇستى سەنسورلى ديسپلەي ورناتۋ وسى ۋاقىتقا دەيىن مۇمكىن بولماي كەلگەن.

تالشىقتىڭ ءپىشىنى ءبىر ولشەمدى ءارى وستىك سيممەتريالى. سول سەبەپتى وعان كادىمگى ەكى ولشەمدى ەلەكترونيكاعا ارنالعان ادىستەرمەن كۇردەلى سحەمالار قۇراستىرۋ وتە قيىن، - دەيدى زەرتتەۋ جەتەكشىسى، NUS ديزاين جانە ينجەنەريا كوللەدجىنىڭ وكىلى تۋرال حۋديەۆ.

بۇل ماسەلەنى شەشۋ ءۇشىن زەرتتەۋشىلەر جىڭىشكە سىمداردىڭ بويىنا ميكروچيپتەردى قاجەتتى جەرلەردە عانا جالعاۋعا مۇمكىندىك بەرەتىن جاڭا ءادىس ويلاپ تاپتى. الدىمەن لازەر سىمنىڭ وقشاۋلاعىش قاباتىن تەك جالعاۋ قاجەت نۇكتەلەردە اشادى. سودان كەيىن بالقىتىلعان دانەكەر سول اشىق جەرلەرگە عانا باعىتتالىپ، ميكروچيپتەردى سىممەن بەرىك بايلانىستىرادى. وسىلايشا، سىمنىڭ كەز كەلگەن تۇسىنا ەمەس، الدىن الا بەلگىلەنگەن نۇكتەلەرىنە عانا ەلەكترلىك جالعاۋ جاساۋعا بولادى.

وسى ءادىستىڭ كومەگىمەن عالىمدار 5 مىڭنان استام ميكروچيپتى 20 مىڭ ەلەكترلىك بايلانىس ارقىلى بىرىكتىرگەن. سودان كەيىن ءوزارا جالعانعان جارىقديودتاردان تۇراتىن تاسپانى تەرميالىق سوزۋ ادىسىمەن كوپقاباتتى تالشىقتىڭ ىشىنە ورنالاستىردى. ونىڭ قالىڭدىعى - نەبارى 1 ميلليمەتر، ال ۇزىندىعى - 10 مەتر.

جارىق ديودتاردىڭ استىندا سەنسورلى قابات ورنالاسقان. ساۋساقپەن جىپكە باسقاندا ەلەكتر تىزبەگى تۇيىقتالىپ، جۇيە جاناسۋدىڭ قاي تۇستا بولعانىن انىقتايدى. سودان كەيىن سول جەرگە سايكەس كەلەتىن پيكسەل جانادى.

بىلەككە ورناتىلعان ەكران

عالىمدار جاساعان العاشقى ۇلگىدە وسىنداي 54 تالشىق جەڭگە تىگىلگەن. ءار تالشىقتا 96 جارىق ديود بار. سونىڭ ناتيجەسىندە ولشەمى 168 × 105 ميلليمەتر بولاتىن، اجىراتىمدىلىعى 96 × 54 پيكسەل ەكران پايدا بولدى. ول سەكۋندىنا 30 رەت جاڭارىپ، 8 بيتتىك ءتۇس تەرەڭدىگىن قولدايدى.

ءار تالشىق جەكە باسقارۋ ارناسىنا قوسىلعان. سوندىقتان ءبىر ءجىپ ىستەن شىقسا دا، قالعاندارى جۇمىسىن جالعاستىرا بەرەدى. بۇعان قوسا، جۇيە ەكراننىڭ بىرنەشە نۇكتەسىنە ءبىر مەزگىلدە تيگەندى اجىراتا الادى.

جەڭگە نەگىزگى ەكرانمەن قاتار قوسىمشا تالشىقتار دا توقىلعان. ولاردىڭ ىشىنە ميكروفون، ديناميك، قوزعالىس، تەمپەراتۋرا جانە جارىق داتچيكتەرى، سونداي-اق ماگنيتتىك كومپاس ورناتىلعان.

تۋرال حۋديەۆتىڭ ايتۋىنشا، جوبانىڭ باستى جەتىستىگى - كادىمگى جىپكە ۇقسايتىن، ءبىراق ىشىندە ەلەكتروندى بولشەكتەرى بار تالشىقتاردان تۇتاس گرافيكالىق ينتەرفەيس قۇراستىرۋ مۇمكىندىگى. زەرتتەۋ اۆتورلارى مۇنداي كيىم بولاشاقتا ادامنىڭ دەنساۋلىعىنا قاتىستى دەرەكتەر مەن سيفرلىق قۇرىلعىلاردى باسقارۋعا ارنالعان تىكەلەي ينتەرفەيسكە اينالۋى مۇمكىن دەپ ەسەپتەيدى. بۇل ءۇشىن بولەك قاتتى ەكران قاجەت بولمايدى.

روبوتتارعا ارنالعان جاساندى تەرىگە دە پايداسى ءتيۋى مۇمكىن

بۇل تەحنولوگيانىڭ تاعى ءبىر ىقتيمال قولدانىلۋ سالاسى بار. زەرتتەۋ اۆتورلارى باسپا ءسوز حابارلاماسىندا ونى ارنايى اتاپ وتپەگەنىمەن، جاڭالىق روبوتتار مەن پروتەزدەرگە ارنالعان ەلەكتروندى تەرى جاساۋعا دا كومەكتەسۋى مۇمكىن.

مۇنداي قۇرىلعىلاردى ازىرلەۋدەگى باستى قيىندىقتاردىڭ ءبىرى - داتچيكتەردى ءبىر-بىرىمەن بايلانىستىراتىن سىمداردىڭ كوپتىگى. داتچيكتەر نەعۇرلىم تىعىز ورنالاسسا، ولارعا قاجەت سىمدار دا سوعۇرلىم كوبەيەدى. اقىرىندا سىمداردىڭ ءوزى داتچيكتەردەن كوبىرەك ورىن الۋى مۇمكىن.

ال سينگاپۋرلىق عالىمدار جاساعان تەحنولوگيادا مىڭداعان ميكروچيپ قالىڭدىعى نەبارى ءبىر ميلليمەتر بولاتىن تالشىقتىڭ ىشىندەگى ورتاق جىڭىشكە سىمدارعا بىرىكتىرىلگەن. سوندىقتان بۇل ءتاسىل بولاشاقتا روبوتتارعا نەمەسە پروتەزدەرگە ارنالعان سەزىمتال جاساندى تەرى جاساۋدا دا پايدالى بولۋى ىقتيمال.