سىناق مەرزىمىندە جالاقىنى ازايتۋعا بولا ما: قىزمەتكەرلەر نەنى ءبىلۋى كەرەك

سىناق مەرزىمى ەڭبەك شارتىندا كورسەتىلۋى كەرەك

جۇمىس بەرۋشى قىزمەتكەردىڭ كاسىبي بىلىكتىلىگىن جانە تاپسىرىلعان جۇمىستى اتقارا الۋ قابىلەتىن باعالاۋ ءۇشىن سىناق مەرزىمىن بەلگىلەي الادى. ءبىراق بۇل تالاپ ەڭبەك شارتىندا مىندەتتى تۇردە جازىلۋى كەرەك.

ەگەر ەڭبەك شارتىندا سىناق مەرزىمى تۋرالى تالاپ بولماسا، قىزمەتكەر سىناق مەرزىمىنسىز جۇمىسقا قابىلدانعان بولىپ ەسەپتەلەدى.

ادەتتە سىناق مەرزىمى ءۇش ايدان اسپاۋعا ءتيىس. الايدا ۇيىم باسشىلارى مەن ولاردىڭ ورىنباسارلارىنا، باس بۋحگالتەرلەر مەن ولاردىڭ ورىنباسارلارىنا، سونداي- اق فيليالدار مەن وكىلدىكتەردىڭ باسشىلارىنا التى ايعا دەيىن سىناق مەرزىمى بەلگىلەنۋى مۇمكىن.

سىناق مەرزىمىندە قىزمەتكەردىڭ قانداي قۇقىعى بار؟

سىناق مەرزىمى قىزمەتكەردىڭ ەڭبەك قۇقىقتارىن شەكتەمەيدى. ول جۇمىسقا كىرىسكەن العاشقى كۇننەن باستاپ زاڭدا كوزدەلگەن نەگىزگى قۇقىقتار مەن كەپىلدىكتەرگە يە بولادى.

اتاپ ايتقاندا، قىزمەتكەردىڭ:

جالاقىسىن ۋاقىتىلى ءارى تولىق كولەمدە الۋعا؛

بەلگىلەنگەن جۇمىس ۋاقىتى مەن دەمالىس ءتارتىبىنىڭ ساقتالۋىنا؛

ءقاۋىپسىز ەڭبەك جاعدايىندا جۇمىس ىستەۋگە؛

ەڭبەك زاڭناماسىندا قاراستىرىلعان الەۋمەتتىك كەپىلدىكتەردى پايدالانۋعا؛

ەڭبەك قۇقىقتارى مەن زاڭدى مۇددەلەرىن قورعاۋعا قۇقىعى بار.

سىناق مەرزىمىندە جالاقىنى ازايتۋعا بولا ما؟

جوق. سىناق مەرزىمىنىڭ بەلگىلەنۋى قىزمەتكەردىڭ جالاقىسىن ازايتۋعا نەگىز بولا المايدى.

ەڭبەكاقى مولشەرى ەڭبەك شارتىندا كورسەتىلەدى جانە زاڭ تالاپتارىنا سايكەس بولۋى كەرەك. مىسالى، ازامات جۇمىسقا ءۇش ايلىق سىناق مەرزىمىمەن قابىلدانسا، جۇمىس بەرۋشى ونىڭ سىناقتان ءوتىپ جاتقانىنا سىلتەمە جاساپ، جالاقىسىن ءوز بەتىنشە تومەندەتە المايدى.

ەڭبەكاقى مولشەرىن وزگەشە بەلگىلەۋ ءۇشىن زاڭدى نەگىز بولۋى جانە بۇل تالاپ ەڭبەك شارتىندا كورسەتىلۋى قاجەت.

سىناقتان وتە الماعان قىزمەتكەردى جۇمىستان شىعارۋعا بولا ما؟

سىناق ناتيجەسى بويىنشا جۇمىس بەرۋشى قىزمەتكەردىڭ تاپسىرىلعان جۇمىسقا سايكەس كەلمەيدى دەگەن قورىتىندىعا كەلسە، ەڭبەك شارتىن زاڭدا بەلگىلەنگەن تارتىپپەن بۇزا الادى.

الايدا ول قىزمەتكەرگە ەڭبەك شارتىن بۇزاتىنىن الدىن الا حابارلاپ، سىناق ناتيجەسىنىڭ نەلىكتەن قاناعاتتانارلىقسىز دەپ تانىلعانىن تۇسىندىرۋگە مىندەتتى.

دەمەك، جۇمىس بەرۋشى سىناق مەرزىمىندە جۇرگەن قىزمەتكەردى ءوز قالاۋىنشا، ەشقانداي سەبەپ تۇسىندىرمەستەن جانە زاڭدا بەلگىلەنگەن ءتارتىپتى ساقتاماي جۇمىستان شىعارا المايدى.

ەڭبەك شارتىن مۇقيات وقىعان ءجون

مينيسترلىك سىناق مەرزىمى رەسمي ەڭبەك قاتىناستارىنىڭ ءبىر بولىگى ەكەنىن ەسكە سالادى. سوندىقتان وسى كەزەڭدە دە قىزمەتكەردىڭ ەڭبەك قۇقىقتارى مەن زاڭدا كوزدەلگەن كەپىلدىكتەرى تولىق ساقتالۋعا ءتيىس.

جۇمىسقا ورنالاسار الدىندا ەڭبەك شارتىن مۇقيات وقىپ، اسىرەسە سىناق مەرزىمىنىڭ ۇزاقتىعىنا، جالاقى مولشەرىنە جانە ەڭبەك جاعدايلارىنا قاتىستى تالاپتارعا نازار اۋدارۋ قاجەت.

ەسكە سالايىق، مۇنىڭ الدىندا جۇمىسقا كەشىككەن قىزمەتكەردىڭ جالاقىسىنان ايىپپۇل ۇستاۋعا بولا ما، جوق پا - سونى جازعان ەدىك.