نەسيە تولەي الماي جۇرگەندەرگە جاڭا مۇمكىندىك: قازاقستاندا ەرەجە وزگەرەدى

جاڭا تۇزەتۋلەر بىرنەشە كرەديتورى بار قارىز الۋشىلاردىڭ بەرەشەگىن ۇجىمدىق رەتتەۋ ءراسىمىن جانە بۇل پروتسەسكە بانك ومبۋدسمانىنىڭ بەلسەندى قاتىسۋىن كوزدەيدى.

قازاقستان رەسپۋبليكاسى قارجى نارىعىن رەتتەۋ جانە دامىتۋ اگەنتتىگى (ق ن ر د ا) بانكتەگى نەمەسە ميكروقارجى ۇيىمىنداعى قارىز شارتىنىڭ تالاپتارىن وزگەرتۋ تۋرالى قارىز الۋشىلاردىڭ وتىنىشتەرىن قاراۋدىڭ جاڭارتىلعان قاعيدالارىنىڭ جوباسىن جاريالادى.

تۇزەتۋلەرگە سايكەس، ەگەر بانك نەمەسە ميكروقارجى ۇيىمى كرەديت تالاپتارىن وزگەرتۋگە كەلىسپەسە نەمەسە تاراپتار بەرەشەكتى قايتا قۇرىلىمداۋ بويىنشا ورتاق شەشىمگە كەلە الماسا، كرەديتور قارىز الۋشىعا بانك نەمەسە ميكروقارجى ومبۋدسمانىنا جۇگىنۋگە قۇقىلى ەكەنىن حابارلاۋعا ءتيىس. مۇنداي ءوتىنىشتى قاراۋعا ءۇش كۇن بەرىلەدى.

سونداي-اق بىرنەشە بانك پەن ميكروقارجى ۇيىمى الدىندا مەرزىمى وتكەن كرەديتتەرى مەن قارىزدارى بار ازاماتتارعا ارنالعان بەرەشەكتى ۇجىمدىق رەتتەۋ ءراسىمى ەنگىزىلەدى. بۇل ءراسىمدى تەك كەپىلسىز تۇتىنۋشىلىق كرەديتتەر بويىنشا جانە قارىز الۋشىنىڭ مۇلىكپەن قامتاماسىز ەتىلگەن باسقا كرەديتتەرى بولماعان جاعدايدا قولدانۋعا بولادى.

ۇجىمدىق رەتتەۋ تۋرالى ءوتىنىشتى بانك جانە ميكروقارجى ومبۋدسماندارى جانىنداعى ارنايى پلاتفورما ارقىلى ەلەكتروندى تۇردە بەرۋگە بولادى.

ءوتىنىش تۇسكەننەن كەيىن بانك نەمەسە ميكروقارجى ومبۋدسمانى ءۇش جۇمىس كۇنى ىشىندە ءراسىمدى باستاۋعا ءتيىس. بەرەشەكتى رەتتەۋدىڭ بارلىق كەزەڭىندە ول كەلىسىمگە قول قويۋ نەمەسە ودان باس تارتۋ پروتسەسىن ۇيلەستىرەدى.

بەرەشەك بويىنشا كەلىسىمگە قول جەتكىزىلگەننەن كەيىن ومبۋدسمان قارىز الۋشىعا ۇجىمدىق رەتتەۋ تالاپتارىن، حاتتامانى جانە كرەديتورلارمەن جاسالاتىن مەدياتسيالىق كەلىسىمدەردىڭ جوبالارىن جىبەرەدى. تولەم كەستەسى بەلگىلەنگەن تارتىپكە سايكەس بەرەشەكتىڭ جالپى سوماسى نەگىزىندە ەسەپتەلەدى. حالىقتىڭ الەۋمەتتىك وسال توپتارىنا جانە اتاۋلى الەۋمەتتىك كومەك الۋشىلارعا تولەم كەستەسىن ەسەپتەۋدىڭ جەكە ءتارتىبى قاراستىرىلعان.

ەگەر قارىز الۋشى كەلىسىمدەرگە قول قويۋدان باس تارتسا، ومبۋدسمان ءبىر جۇمىس كۇنى ىشىندە وعان بەرەشەكتى جەكە تارتىپپەن رەتتەۋ مۇمكىندىگى تۋرالى حابارلاۋعا ءتيىس.

قاۋلىنىڭ نەگىزگى بولىگى العاشقى رەسمي جاريالانعاننان كەيىن كۇنتىزبەلىك 10 كۇن وتكەن سوڭ كۇشىنە ەنەدى. سونىمەن قاتار قاۋلىدا كورسەتىلگەن نورمالار، سونىڭ ىشىندە بەرەشەكتى ۇجىمدىق رەتتەۋدىڭ جاڭا ءتارتىبى، 2027-جىلعى 1-قاڭتاردان باستاپ قولدانىسقا ەنگىزىلەدى.