نەسيەگە العان تاۋاردى قايتارساڭىز، قارىز قالاي جابىلادى؟
استانا. KAZINFORM - دۇكەن ساتىپ العان تاۋارىڭىزدى قايتارىپ الۋعا كەلىسكەنىمەن، نەسيە اۆتومات تۇردە جابىلماۋى مۇمكىن.
بانك نەسيە شارتىنىڭ توقتاتىلعانىن جانە بەرەشەكتىڭ جوق ەكەنىن رەسمي راستامايىنشا، قارىز الۋشى تولەمدەردى بەلگىلەنگەن كەستەگە ساي تولەپ وتىرۋى كەرەك، - دەپ حابارلايدى Massaget.kz ءتىلشىسى.
تاۋاردى قايتارۋ مەن نەسيەنى جابۋ - ەكى بولەك ماسەلە
تاۋاردى نەسيەگە ساتىپ العان ادام دۇكەنمەن جانە بانكپەن بولەك كەلىسىم جاسايدى. سوندىقتان تاۋاردى دۇكەنگە قايتارۋ بانكتىڭ الدىنداعى قارىز مىندەتتەمەسىن وزدىگىنەن توقتاتپايدى.
الدىمەن تاۋاردى دۇكەنگە قايتارىپ، ساتۋشىنىڭ ونى قابىلداعانىن جانە اقشانى قايتارۋعا مىندەتتەنگەنىن راستايتىن قۇجات الۋ قاجەت. سودان كەيىن بانككە حابارلاسىپ، اقشانىڭ قالاي قايتارىلاتىنىن ناقتىلاپ العان ءجون. ياعني دۇكەن قاراجاتتى تىكەلەي بانككە اۋدارا ما، الدە ساتىپ الۋشىعا قايتارا ما؟ ەگەر اقشا ساتىپ الۋشىنىڭ وزىنە بەرىلسە، ول نەسيەسىن ءوزى وتەۋگە ءتيىس.
«نەسيە تولەۋدى ءوز بەتىنشە توقتاتقان جاعدايدا قارىز جينالىپ، تولەم مەرزىمى ءوتىپ كەتۋى مۇمكىن»، - دەپ ەسكەرتتى قارجى نارىعىن رەتتەۋ جانە دامىتۋ اگەنتتىگى.
قانداي قۇجاتتاردى ساقتاۋ كەرەك جانە بانكتەن نەنى ناقتىلاعان ءجون؟
بانك نەسيەنىڭ جابىلعانىن رەسمي راستامايىنشا، تولەمدەردى بەلگىلەنگەن كەستە بويىنشا تولەي بەرۋ قاجەت.
ساتۋشىنىڭ «ءبارىن ءوزىمىز رەتتەيمىز» دەگەن ۋادەسىنە عانا سەنىپ قالماعان دۇرىس. تاۋاردى قايتارۋ تۋرالى ءوتىنىشتى، ونى قابىلداۋ اكتىسىن، اقشانىڭ اۋدارىلعانىن راستايتىن قۇجاتتاردى، سونداي-اق، دۇكەنمەن جانە بانكپەن جازىسقان حاتتاردى ساقتاپ قويعان ءجون.
اقشا قايتارىلعاننان كەيىن بانكتەن نەسيەنىڭ تولىق جابىلعانىن جانە ەشقانداي بەرەشەك قالماعانىن راستايتىن قۇجات سۇراۋ كەرەك.
قارجى نارىعىن رەتتەۋ جانە دامىتۋ اگەنتتىگىنىڭ مالىمەتىنشە، مۇنداي راستاۋ رەتىندە بانكتىڭ رەسمي اقپاراتى، سونىڭ ىشىندە قارىزدىڭ جوعى تۋرالى انىقتاما مەن نەسيەنىڭ جابىلعانىن راستايتىن قۇجات بەرىلۋى مۇمكىن.
تاۋاردى قايتارعاننان كەيىن نەسيە پايىزدارىن قايتارىپ الۋعا بولا ما؟
دۇكەن تاۋاردى كەرى قابىلداعانى ءۇشىن بۇرىن تولەنگەن نەسيە جارنالارى مەن كوميسسيالار اۆتومات تۇردە قايتارىلمايدى.
بۇل ماسەلە جاسالعان شارتتاردىڭ تالاپتارىنا، تاۋاردى قايتارۋ سەبەبىنە جانە دۇكەن مەن بانكتىڭ ءوزارا ەسەپ ايىرىسۋ تارتىبىنە بايلانىستى شەشىلەدى.
ەگەر تاۋاردى قايتارۋ راسىمدەلگەنىمەن، بانك جۇيەسىندە قارىز ءالى كورسەتىلىپ تۇرسا، دۇكەننەن اقشانىڭ اۋدارىلعانىن راستايتىن قۇجاتتى، ال بانكتەن بەرەشەكتىڭ جازباشا ەسەبىن سۇراتۋ قاجەت.
نەسيە تاريحىندا قاتە مالىمەت پايدا بولسا، قارىز الۋشى بانككە جۇگىنىپ، ونى تۇزەتۋدى تالاپ ەتۋگە قۇقىلى.
قارجى نارىعىن رەتتەۋ جانە دامىتۋ اگەنتتىگىنىڭ تۇسىندىرۋىنشە، ەگەر قارىز مىندەتتەمەسى زاڭدى تۇردە توقتاتىلعاننان كەيىن دە بانك تولەم ەسەپتەۋدى جالعاستىرسا، مۇنداي ارەكەت زاڭسىز بولىپ سانالادى.
ەگەر بانكپەن اراداعى داۋدى شەشۋ مۇمكىن بولماسا، ازامات قارجى نارىعىن رەتتەۋ جانە دامىتۋ اگەنتتىگىنە شاعىمدانا الادى. ال ساتۋشىعا قاتىستى ماسەلەلەر تۇتىنۋشىلاردىڭ قۇقىقتارىن قورعاۋ ورگاندارىنىڭ قۇزىرەتىنە جاتادى.
وسىلايشا دۇكەن تاۋاردى قايتارىپ العان كۇننىڭ وزىندە ساتىپ الۋشى اقشانىڭ بانككە تۇسكەنىنە جانە نەسيەنىڭ تولىق جابىلعانىنا جەكە كوز جەتكىزۋى كەرەك.
ساتىپ الىنعان تاۋاردى كەز كەلگەن جاعدايدا قايتارا المايسىز
تاۋاردى قايتارۋ ءتارتىبى ونىڭ قانداي سەبەپپەن قايتارىلاتىنىنا بايلانىستى.
ماسەلەن، ساپاسى تالاپقا ساي تاۋارلارعا قاتىستى كەيبىر ەرەكشەلىكتەر بار. سونىڭ ءبىرى - سايكەستەندىرۋدەن وتكەن سمارتفوندار. مۇنداي تەلەفونداردى ساتىپ العاننان كەيىن 14 كۇن ىشىندە تاۋاردى ايىرباستاۋ نەمەسە قايتارۋدىڭ جالپى تارتىبىمەن كەرى وتكىزۋگە بولمايدى.
ال تەلەفوننان اقاۋ شىقسا نەمەسە ونى قايتارۋعا زاڭدا كوزدەلگەن وزگە دە نەگىز بولسا، ساتىپ الۋشى ساتۋشىعا ءتيىستى تالاپ قويۋعا قۇقىلى.
بۇعان دەيىن اقتوبە تۇرعىنى نەسيەگە ساتىپ العان قۇنى 1,3 ميلليون تەڭگەدەن اساتىن شاڭسورعىشتى دۇكەنگە قايتارعانى حابارلانعان ەدى.
ازامات تۇتىنۋشىلاردىڭ قۇقىقتارىن قورعاۋ دەپارتامەنتىنە جۇگىنگەننەن كەيىن ساتىپ الۋ-ساتۋ شارتى بۇزىلىپ، نەسيە دە جويىلعان.
