نەسيە الۋعا «ستوپ-كرەديت» قويعاندار باسقا قانداي قارىزداردى راسىمدەي الادى

الايدا بۇل تەتىك بارلىق جاعدايدا بىردەي قولدانىلمايدى. قارجى نارىعىن رەتتەۋ جانە دامىتۋ اگەنتتىگى «ستوپ-كرەديتكە» قاتىستى نەگىزگى ەرەكشەلىكتەردى ءتۇسىندىردى.

«ستوپ-كرەديت» قوسىلعان كەزدە بانك نەمەسە ميكروقارجى ۇيىمى ازاماتقا قارىز بەرۋدەن باس تارتۋعا مىندەتتى. دەگەنمەن زاڭنامادا بۇل شەكتەۋ قولدانىلمايتىن ءبىرقاتار جاعداي قاراستىرىلعان.

«ستوپ-كرەديت» بانك قارىزدارىنا قاتىستى مىنا جاعدايلاردا قولدانىلمايدى:

تۇتىنۋشىلىق قارىزدىڭ سوماسى تىكەلەي تاۋاردى، جۇمىستى نەمەسە كورسەتىلەتىن قىزمەتتى ساتۋشىنىڭ شوتىنا اۋدارىلسا جانە قارىز الۋشى تاۋاردى، جۇمىستى نەمەسە قىزمەتتى العانىن راستاسا. بۇل - تاۋارلىق كرەديت؛

قارىز سول بانكتەگى باسقا بەرەشەكتى وتەۋ ءۇشىن بەرىلسە، ياعني ىشكى قايتا قارجىلاندىرۋ كەزىندە؛

تولەم كارتاسى بويىنشا 150 ا ە ك- تەن (648750 تەڭگە) اسپايتىن كرەديتتىك ليميت شەڭبەرىندە قارىز بەرىلسە. بۇل ليميت تاۋارلار مەن قىزمەتتەردى تولەۋگە ارنالعان جاڭارتىلاتىن كرەديتتىك ليميت بولۋى كەرەك؛

قارىز قاراجاتى تەك سالىقتاردى، ايىپپۇلداردى نەمەسە اتقارۋشىلىق ءىس جۇرگىزۋ بويىنشا بەرەشەكتى تولەۋگە ماقساتتى تۇردە اۋدارىلسا.

ميكروكرەديتتەر بويىنشا دا ءبىرقاتار ەرەكشەلىك بار.

«ستوپ-كرەديت» قوسىلعانىنا قاراماستان، ميكروقارجى ۇيىمى:

تاۋارلار، جۇمىستار نەمەسە كورسەتىلەتىن قىزمەتتەر ءۇشىن اقشانى تىكەلەي ساتۋشىعا نەمەسە ءونىم بەرۋشىگە اۋدارۋعا؛

سول ميكروقارجى ۇيىمىنداعى بۇرىنعى بەرەشەكتى قايتا قارجىلاندىرۋعا؛

سالىقتاردى، ايىپپۇلداردى جانە اتقارۋشىلىق ءىس جۇرگىزۋ بويىنشا بەرەشەكتى وتەۋگە ميكروكرەديت بەرۋگە قۇقىلى.

سونىمەن قاتار لومباردتار بەرەتىن ميكروكرەديتتەرگە «ستوپ-كرەديت» تەتىگى قولدانىلمايدى.

«ستوپ-كرەديت» بۇزىلىپ، نەسيە بەرىلسە نە بولادى؟

ەگەر بانك نەمەسە ميكروقارجى ۇيىمى «ستوپ-كرەديت» تالابىن بۇزىپ، بانكتىك قارىز نەمەسە ميكروكرەديت بەرسە، قارجى ۇيىمى زاڭدا كوزدەلگەن شارالاردى قابىلداۋعا مىندەتتى.

اتاپ ايتقاندا، نەسيە بويىنشا بەرەشۋ ەسەپتەن شىعارىلۋى، قارىز الۋشىنىڭ كرەديتتىك تاريحىنا ءتيىستى تۇزەتۋ ەنگىزىلۋى جانە ودان ءوندىرىپ الىنعان قاراجات قايتارىلۋى ءتيىس.

قارجى نارىعىن رەتتەۋ جانە دامىتۋ اگەنتتىگى «ستوپ-كرەديت» تەتىگى بانك پەن ميكروقارجى ۇيىمدارى قارىز بەرۋ كەزىندە ورىنداۋعا مىندەتتى باسقا تالاپتاردىڭ كۇشىن جويمايتىنىن اتاپ ءوتتى.

ەسكە سالايىق، بۇعان دەيىن «ستوپ-كرەديت» قىزمەتىن 6,3 ميلليون ادام پايدالانعانىن حابارلاعان ەدىك.