سوزاق دالاسىنان ەكى مىڭ جىل بۇرىنعى قاڭلى عيباداتحاناسى مەن جادىگەرلەر تابىلدى
استانا. KAZINFORM - ورتالىق مۋزەيدىڭ ارحەولوگيا ءبولىمىنىڭ ماماندارى تۇركىستان وبلىسى سوزاق اۋدانىنداعى قىزىلكول اۋىلى ماڭىندا ورنالاسقان ارحەولوگيالىق ەسكەرتكىشتە دالالىق زەرتتەۋ جۇمىستارىن اياقتادى.
زەرتتەۋ وبەكتىسى قىزىلكول تاريحي-مادەني نىساندا ورنالاسقان عيباداتحانا جانە ەكى قورعان بولدى. ناتيجەسىندە قاڭلى مادەنيەتىنە قاتىستى، ب. ز. د. Ⅱ عاسىرعا جاتاتىن بىرەگەي ارتەفاكتىلەر تابىلدى.
قازبا جۇمىستارى كەزىندە ءىرى قارا جانە ۇساق مالدىڭ سۇيەكتەرى مەن مۇيىزدەرى، تاس دان ۇككىش، كەلى، ديىرمەن ت. ب. ەڭبەك قۇرالدارىنىڭ بولىكتەرى، قىش ىدىس تۇتقالارى، كيىمگە ارنالعان تۇيمە فراگمەنتتەرى الىندى.
عيباداتحانانىڭ باتىس بولىگىندە اشىلعان بولمەنىڭ ىشىندە 60 س م تەرەڭدىكتە عۇرىپتىق بۇيىم (كۋريلنيتسا) ىدىسىنىڭ كىشكەنە بولىگى ساقتالعان سيليندر ءپىشىندى، تابانى جايپاق تۇعىر تابىلدى.
ەسكەرتكىشتىڭ بيىك تاۋلار مەن كولدەرگە جاقىن ورنالاسۋى، عيباداتحانانىڭ ەرەكشە قۇرىلىمى مەن تابىلعان جادىگەرلەردىڭ تۇرلەرى قۇرىلىستىڭ عۇرىپتىق عيباداتحانا رەتىندە پايدالانىلعانىن كورسەتسە، تاس قۇرالدار ەگىنشىلىكتىڭ، اتاپ ايتقاندا، ەگىن جيناۋدىڭ دامىعانىن كورسەتەدى.
ورتالىق مۋزەي ارحەولوگتارى قازاقستاننىڭ كونە تاريحىنىڭ جاڭا پاراقتارىن اشا وتىرىپ، ەلىمىزدىڭ ءار وڭىرىندەگى تاريحي نىسانداردا ارحەولوگيالىق قازبا جۇمىستارىن جۇرگىزۋدى الداعى ۋاقىتتا دا جۇيەلى تۇردە جالعاستىرۋدى جوسپارلاپ وتىر.
