«سوڭىرا» مەن «كۇلپاش»: وتاندىق ەكى تىڭ تۋىندى كورەرمەنگە جول تارتتى

استانا. KAZINFORM - وسى اپتادا قازاق كينوسى ەكى بىردەي تىڭ تۋىندىمەن تولىقتى. «سوڭىرا» ءفيلمى ءورت سوندىرۋشىلەردىڭ تاباندىلىعى مەن جانقيارلىق ەڭبەگىن كورسەتەدى. ال «كۇلپاش» ءفيلمى ەل تاريحىنداعى اشارشىلىق ناۋبەتىن باياندايدى. ءبىر ەرەكشەلىگى، ەكى تۋىندى دا قازاق كينوسى ءۇشىن تىڭ تاقىرىپتاردى كوتەرىپ، وسى باعىتتا تۇسىرىلگەن العاشقى فيلمدەر. سونىمەن قاتار كينوتەاترلار رەپەرتۋارى شەتەلدىك حوررورلار مەن شىتىرمان وقيعالى تۋىندىلارمەن تولىقتى.

кино
Коллаж: Kazinform

Kazinform ءتىلشىسى اپتاداعى كينو جاڭالىقتارىنا شولۋ جاسايدى.

سوڭىرا

جانرى: دراما

ۇزاقتىعى: 95 مينۋت

ەل: قازاقستان، 2026

رەجيسسەر: دارحان كاريپوۆ

قالامقاس - ءورت ءسوندىرۋ ءبولىمىنىڭ تاجىريبەلى، قاتال باسشىسى. جۇمىستا وزگەلەردىڭ ءومىرىن قۇتقارىپ جۇرگەن ونىڭ ءوز ۇيىندە شەشىلمەگەن ماسەلەسى بار. كۇيەۋى ءادىل - لۋدومان. قالامقاس ونىڭ تۇزەلەتىنىنە قايتا- قايتا سەنىپ، قىزى زەرەنىڭ بولاشاعىن ساقتاپ قالۋعا تىرىسادى. ونىڭ ارىپتەستەرىنىڭ دە سىرتقا ايتپايتىن ءوز اۋىرتپالىعى بار. ماعجان ءومىر بويى ىشەتىن اكەسى مەن ودان شارشاعان اناسىنىڭ ورتاسىندا قالعان. ءجۇرسىن - جۇرە المايتىن ايەلىن اياعىنان تۇرعىزۋ ءۇشىن ەم ىزدەپ جۇرگەن قامقور كۇيەۋ. جاس جۇرگىزۋشى ايبەك - اۋىلداعى كەدەي وتباسىنىڭ ۇلكەنى، جاقىندارىن جوقشىلىقتان الىپ شىعۋدى ارماندايدى. ال ديسپەتچەر جامال مەن ايبەكتىڭ اراسىندا بىرتىندەپ جىلى سەزىم پايدا بولادى.

كۇلپاش

جانرى: دراما

ۇزاقتىعى: 92 مينۋت

ەل: قازاقستان، 2026

رەجيسسەر: اقان ساتايەۆ

فيلم وقيعاسى ⅩⅩ عاسىردىڭ باسىنداعى اشارشىلىق جىلدارىندا قازاق دالاسىندا ءوربيدى. كۇلپاش كۇيەۋى جانە كىشكەنتاي ۇلىمەن بىرگە تىرشىلىك ءۇشىن كۇرەسۋگە ءماجبۇر بولادى. اشتىق، سۋىق پەن جوقشىلىق ولاردىڭ ءومىرىن كۇيرەتەدى. وتباسىن اسىراۋعا شاماسى جەتپەگەن كۇيەۋى ءۇمىتىن ءۇزىپ، رۋحاني تىرەگىنەن ايىرىلادى. ۇلى مەن كۇيەۋىن اشتىقتان امان الىپ قالۋ ءۇشىن كۇلپاش جانىن ازاپقا سالعان شاراسىز قادامعا بارادى: جانىنان ارتىق كورەتىن جاقىندارىنا جاسىرىن تاماق تاسۋ ءۇشىن باي شالعا كەتەدى. بۇل - انانىڭ جانقيارلىعى، اشتىقتان قاجىعان ايەلدىڭ ماحابباتى جانە جاقىندارىن قۇتقارۋ جولىندا ادام تولەيتىن اۋىر قۇن تۋرالى حيكايا.

تازا اقىل-ويعا سىني كوزقاراس، (كريتيكا چيستوگو رازۋما)

جانرى: دراما، رومانتيكا

ۇزاقتىعى: 120 مينۋت

ەل: ا ق ش، فرانسيا، گەرمانيا، 2024

ولەگ بورەتسكيدىڭ دۇنيەجۇزىلىك فيلوسوفيا كۇنىنە ارنالعان كينو كلۋبى. نەمىس فيلوسوفى يممانۋيل كانت «تازا اقىلعا سىن» ەڭبەگىن جازعاندا، ونىڭ يدەيالارى جادى، ماحاببات، ۆيرتۋالدى شىندىق جانە پوستمودەرن داۋىرىندەگى جاساندى ينتەللەكت تاقىرىپتارىمەن استاساتىنىن ەلەستەتە دە قويماعان شىعار.

تۋربوزاۆرلار. سۋپەرفيلم، (تۋربوزاۆرى. سۋپەرفيلم)

جانرى: شىتىرمان وقيعالى، بالالارعا ارنالعان، وتباسىلىق، فانتاستيكالىق مۋلتفيلم

ۇزاقتىعى: 75 مينۋت

ەل: رەسەي، 2026

رەجيسسەر: الەكسەي سيسيلين، تيمۋر تروفيموۆ

مەيىرىمدى دينوزاۆر-ترانسفورمەرلەردىڭ قۇپياسى اشكەرە بولعالى تۇر. ەندى بالالار ولارمەن بىرگە دوستارىن قورعاۋ ءۇشىن كۇرەسەدى.

SPA- داعى قالىڭدىق كەشى، (ديەۆيچنيك ۆ سپا)

جانرى: كومەديا

ۇزاقتىعى: 97 مينۋت

ەل: ا ق ش، 2026

رەجيسسەر: دجون لۋكاس، سكوتت مۋر

ايەلدەردىڭ باستى جاۋى - كۇيزەلىس. ودان ارىلۋ ءۇشىن ءۇش قۇربى - دجەين، كوكو جانە سوفي بارلىق شارۋاسىن كەيىنگە قالدىرىپ، وزدەرىنە ۋاقىت ءبولۋدى ۇيعارادى. دەمالىس كۇندەرىن SPA ورتالىعىندا وتكىزۋ تاماشا يدەيا بولىپ كورىندى. ءبارى ويداعىداي ءوتىپ جاتقاندا، ولارعا كەز كەلگەن باسقوسۋدى دۋماندى كەشكە اينالدىراتىن مەل ەسىمدى قۇربىسى قوسىلادى. ءسويتىپ، جايلى دەمالىس ءاپ-ساتتە الاساپىرانعا ۇلاسادى.

ورمان، (لەس)

جانرى: دراما، تريللەر

ۇزاقتىعى: 100 مينۋت

ەل: رەسەي، 2026

رەجيسسەر: گاملەت دۋليان

ماسكەۋلىك ەكى قىز كارەلياعا ساياحاتقا شىعىپ، نۋ ورماننىڭ ىشىندە ءىز-ءتۇزسىز جوعالادى. ورماننان شىعۋعا جاساعان ءار ارەكەتى ولاردى جاڭا قاۋىپكە دۋشار ەتەدى. اينالاداعى ورمان ءتىرى سەكىلدى: تىنىستاپ، قىزداردى اڭدىپ، جىبەرگىسى كەلمەيدى. كوپ ۇزاماي ونىڭ ءوز زاڭدىلىعى بار ەكەنى بەلگىلى بولادى. ال قىزداردىڭ تاماق پەن سۋسىز ۇزاققا شىداۋى ەكىتالاي. وسى ۋاقىتتا ءبىرتۇرلى وتباسى قاراۋسىز قالعان اۋىل ۇيىنە كوشىپ كەلەدى. الايدا مۇندا بوتەن ادامداردى ەشكىم قۇشاق جايا قارسى المايدى. ويتكەنى بۇل وتباسى بۇعان دەيىن ورماندا ءومىر سۇرگەن.

ءبارىن كورۋ، (ۋۆيدەت ۆسە)

جانرى: دەرەكتى فيلم، ءومىربايان

ۇزاقتىعى: 174 مينۋت

ەل: ا ق ش، 2026

رەجيسسەر: نەيتان فيلدەر، لانس وپپەنگەيم

ەليزابەت حولمس كەزىندە الەمدەگى ەڭ جاس ميللياردەر ايەلدەردىڭ ءبىرى بولعان. الايدا ءوزى قۇرعان كومپانيا كرەمنيي القابىنداعى ەڭ ءىرى الاياقتىق داۋدىڭ بىرىنە ىلىگەدى. بار بايلىعىنان ايىرىلىپ، تۇرمەگە قامالۋعا ۇكىم شىققاننان كەيىن، جازاسىن وتەۋگە ءبىر اي قالعاندا ول اۆانگاردتىق ءازىل- سىقاق جانرىندا ونەر كورسەتەتىن كوميك باستاعان ءتۇسىرىلىم توبىن ۇيىنە شاقىرادى. ۋاقىت وتە كەلە شىندىق پەن وتىرىكتىڭ اراسى اجىراتىلماي، جۇمباق الاياق ايەل تۋرالى فيلم ءۇش جىلعا سوزىلعان كۇردەلى زەرتتەۋگە ۇلاسادى.

قوعامنان شەتتەتىلگەندەر، وتۆەرجەننىە

جانرى: دراما، مەلودراما

ۇزاقتىعى: 180 مينۋت

ەل: فرانتسيا، بەلگيا، 2026

رەجيسسەر: فرەد كاۆايە

ءبىر كەزدەرى ءبىر بولكە نان ۇرلاعانى ءۇشىن سوتتالعان جان ۆالجان كاتورگادان قاشىپ كەتەدى. ول ادىلەتسىزدىك پەن كەك ۇستەمدىك قۇرعان قوعامدا ادال ادام بولىپ ءومىر سۇرۋگە بار كۇشىن سالادى. اقىرى ارمانداعانىنا قول جەتكىزگەندەي بولادى: قالا اكىمى اتانىپ، وتباسىن قۇرادى. قايتىس بولعان قاڭعىباس ايەلدىڭ قىزى كوزەتتانى اسىراپ الادى. الايدا بۇرىنعى تۇتقىنىنىڭ جاڭا ومىرىنە نارازى پوليتسيا ينسپەكتورى جاۆەر وعان تىنىشتىق بەرمەيدى. ول جان ۆالجاندى قايتادان ۇستاپ، ءومىر بويىنا تۇرمەگە قاماۋدى كوزدەيدى.

ومىرىمدەگى ەڭ كەرەمەت جازى، لۋچشەە لەتو ۆ جيزني

جانرى: دەتەكتيۆ، كومەديا

ۇزاقتىعى: 180 مينۋت

ەل: رەسەي، 2026

رەجيسسەر: اندرەي نيكيفوروۆ

ساۆۆا مەن اگلايا - قالادا تۇراتىن اعالى-قارىنداس. ساۆۆا كومپيۋتەرلىك ويىندارعا اۋەس بولسا، اگلايا عىلىمعا قىزىعادى. جازعى دەمالىسقا ەكەۋىنىڭ دە جوسپارى بار. ساۆۆا ويىن فەستيۆالىنە بارۋدى، ال اگلايا عىلىمي لاگەردە جوباسىن جالعاستىرۋدى ارماندايدى. الايدا بالالاردىڭ ءجيى ۇرىسىپ، ءبىر-بىرىمەن كەلىسە الماۋىنىڭ سالدارىنان ۇيدە كۇتپەگەن جاعداي بولادى. پاتەرلەرىن سۋ باسىپ، ارتىنشا ءورت شىعادى. بۇعان اشۋلانعان اتا- اناسى ەكەۋىن اۋىلداعى اتا-اجەسىنە جىبەرۋگە شەشىم قابىلدايدى. قالا ومىرىنە ۇيرەنگەن بالالار ءۇشىن اۋىلداعى تىرشىلىك وڭايعا سوقپايدى. مۇندا ينتەرنەت تە، ۇيرەنشىكتى ويىن-ساۋىق تا جوق. ونىڭ ورنىنا ەرتە تۇرىپ، باقشاعا قاراۋ، مالعا جەم بەرۋ سياقتى كۇندەلىكتى شارۋا كۇتىپ تۇر. ال بۇل جازعى دەمالىستى ساۆۆا مەن اگلايا مۇلدە باسقاشا ەلەستەتكەن ەدى.

اشتىق ويىندارى، گولودنىە يگرى: راسسۆەت جاتۆى

جانرى: ەكشن، شىتىرمان وقيعالى، فەنتەزي، تريللەر، فانتاستيكا

ۇزاقتىعى: 150 مينۋت

ەل: ا ق ش، 2026

رەجيسسەر: فرەنسيس لوۋرەنس

12-اۋداننىڭ جاس تۇرعىنى حەيميتچ ەبەرنەتي 50-شى «اشتىق ويىندارىنا» قاتىسادى. الايدا ونىڭ جەڭىسكە جەتۋ مۇمكىندىگى از. ويتكەنى بۇل اۋداننىڭ وكىلى سوڭعى رەت ويىنداردا وسىدان قىرىق جىل بۇرىن عانا جەڭىسكە جەتكەن.

انا. ىشىندەگى زۇلىمدىق، ماما. زلو ۆنۋتري

جانرى: ۋجاس

ۇزاقتىعى: 119 مينۋت

ەل: يندونەزيا، 2026

رەجيسسەر: رەندولف زايني

ۆيرا اناسى يانتي جانە ءىنىسى دينومەن بىرگە تۇرادى. كۇيەۋىمەن اجىراسقاننان كەيىن يانتي قاتتى كۇيزەلىسكە تۇسەدى. الايدا ەكى جىلدان سوڭ ونىڭ مىنەزى كۇرت وزگەرەدى. كوڭىلدى ءارى تابىستى ايەلگە اينالىپ، جاڭا ءۇي ساتىپ الادى. ءتىپتى سۇلۋلىق سالونىن دا اشادى. ءبىراق ۆيرا اناسىنىڭ وعاش ارەكەتتەرىن بايقاي باستايدى. يانتي سالونعا كەلگەن كليەنتتەرگە زيان كەلتىرەدى، ۇلى دينوعا دا شابۋىل جاسايدى. ارتىنشا ەشتەڭە بولماعانداي جۇرە بەرەدى. اناسىنىڭ نەگە بۇلاي وزگەرگەنىن تۇسىنبەگەن ۆيرا شىندىقتى انىقتاۋعا كىرىسەدى.

بانكتى قالاي توناۋعا بولادى، كاك وگرابيت بانك

جانرى: بويەۆيك، كريمينال، تريللەر

ۇزاقتىعى: 121 مينۋت

ەل: ا ق ش، 2026

رەجيسسەر: دەۆيد ليتچ

بانك توناۋشىلار ءوز قىلمىستارى تۋرالى الەۋمەتتىك جەلىدە ماقتانىپ جازادى. وسىدان كەيىن پوليتسيا ولاردىڭ ىزىنە تۇسەدى.