سوتتالعان ازامات جەمقورلىق ارقىلى تاپقان 12 ميلليون تەڭگەسىن مەملەكەت قازىناسىنا قۇياتىن بولدى
استانا. KAZINFORM - باس پروكۋراتۋرانىڭ نارازىلىعى بويىنشا قىلمىستىق ىستەر جونىندەگى كاسساتسيالىق سوت زاڭسىز الىنعان 12 ميلليون تەڭگەنى مەملەكەت كىرىسىنە ءوندىرۋ تۋرالى شەشىم قابىلدادى.
ۆەدومستۆونىڭ مالىمەتىنشە، قىلمىستىق ءىس بويىنشا «م» ەسىمدى ازاماتتىڭ جەكەلەگەن ادامدارعا قامقورلىق كورسەتكەنى ءۇشىن بىرنەشە رەت زاڭسىز سىياقى العانى انىقتالعان. الىنعان قاراجاتتىڭ جالپى كولەمى 12 ميلليون تەڭگەنى قۇراعان.
سوت ۇكىمىمەن اتالعان ازامات باس بوستاندىعىنان ايىرۋ جازاسىنا كەسىلگەن. الايدا سوت زاڭسىز الىنعان اقشانى مەملەكەت كىرىسىنە ءوندىرۋ ماسەلەسىن شەشپەگەن.
وسىعان بايلانىستى باس پروكۋراتۋرا سوت اكتىسىنە نارازىلىق ەنگىزگەن.
- قىلمىستىق ىستەر جونىندەگى كاسساتسيالىق سوت مۇلىكتى تاركىلەۋ ماسەلەسىنىڭ دۇرىس شەشىلمەۋىنە بايلانىستى ەنگىزىلگەن باس پروكۋراتۋرانىڭ نارازىلىعىن قاناعاتتاندىردى. پروكۋراتۋرانىڭ نارازىلىعى بويىنشا كاسساتسيالىق سوت بۇل ماسەلەنى قايتا قاراۋعا جاتادى دەپ تانىپ، «م» - نەن مەملەكەت كىرىسىنە 12 ميلليون تەڭگە ءوندىردى،-دەلىنگەن ۆەدومستۆو حابارلاماسىندا.
باس پروكۋراتۋرانىڭ مالىمەتىنشە، بيىل سىبايلاس جەمقورلىق قىلمىستارى بويىنشا ەنگىزىلگەن جەتى نارازىلىق قاناعاتتاندىرىلعان.
ناتيجەسىندە سىبايلاس جەمقورلىق قىلمىستارى ارقىلى زاڭسىز الىنعان جالپى سوماسى 50 ميلليون تەڭگەنى مەملەكەت كىرىسىنە ءوندىرۋ قامتاماسىز ەتىلدى.
ايتا كەتەيىك، بۇعان دەيىن پروكۋروردىڭ كاسساتسيالىق نارازىلىعى بويىنشا ونلاين-كازينو ۇيىمداستىرعان ازاماتتان زاڭسىز الىنعان 9,9 ميلليون تەڭگە مەملەكەت كىرىسىنە وندىرىلگەن بولاتىن.
