سوت وتباسىنىڭ شىرقىن بۇزعان جانجالقويدى ۇيىنەن ۋاقىتشا شىعارا الادى
استانا. KAZINFORM - سوتقا وتباسىنداعى جانجالقويدى تۇرعىن ۇيدەن ۋاقىتشا شىعارۋ قۇقىعى بەرىلمەك. بۇل تۋرالى ءى ءى م اكىمشىلىك پوليتسيا كوميتەتى ءتوراعاسىنىڭ مىندەتىن اتقارۋشى رەنات زۋلحايروۆ ايتتى.
«2023-جىلعى 8- جەلتوقساندا پرەزيدەنتتىڭ جارلىعىمەن بەكىتىلگەن ادام قۇقىقتارى جانە زاڭنىڭ ۇستەمدىگى سالاسىنداعى ءىس-قيمىل جوسپارىنا سايكەس، بالا قۇقىقتارى جونىندەگى ۋاكىلمەن جانە ءماجىلىس دەپۋتاتتارىمەن بىرلەسىپ، ايەلدەر مەن بالالاردىڭ قۇقىعىن قورعاۋ، سونداي-اق وتباسى قۇندىلىقتارىن ىلگەرىلەتۋ شارالارىن كۇشەيتۋ جونىندە زاڭنامالىق تۇزەتۋلەر ازىرلەندى. دەنساۋلىققا قاساقانا جەڭىل زيان كەلتىرۋدى جانە ۇرىپ-سوعۋدى قىلمىستىق جاۋاپكەرشىلىككە تارتۋ جوسپارلانعان. قۇقىق بۇزۋشىنىڭ مىنەز-قۇلقىنا قويىلاتىن ەرەكشە تالاپتار اياسىندا سوتقا «اگرەسسوردى» تۇرعىن ۇيدەن ۋاقىتشا شىعارۋ قۇقىعى بەرىلەدى. سونداي-اق، سوت «اگرەسسوردىڭ» دەنساۋلىق ساقتاۋ ۇيىمدارىندا مىندەتتى پسيحوكوررەكتسيالىق كۋرستان ءوتۋىن مىندەتتەۋگە قۇقىلى»، - دەدى ول ورتالىق كوممۋنيكاتسيالار قىزمەتىندەگى دوڭگەلەك ۇستەل بارىسىندا.
ونىڭ اتاپ وتۋىنشە، وسىعان ۇقساس مىنەز-قۇلىققا قويىلاتىن ەرەكشە تالاپتار قىلمىستىق كودەكستىڭ اياسىندا دا بەلگىلەنەدى.
«سونىمەن قاتار، ەل پرەزيدەنتى ءى ءى م- دە وتباسىلىق- تۇرمىستىق زورلىق-زومبىلىققا قارسى كۇرەس جونىندەگى مامانداندىرىلعان بولىمشە قۇرۋدى تاپسىردى. ول وتباسىن قولداۋ ورتالىقتارىمەن، ۇ ە ۇ- مەن جانە مۇددەلى مەملەكەتتىك ورگاندارمەن ءوزارا ءىس-قيمىل جاساي وتىرىپ، تۇرمىستىق زورلىق-زومبىلىق پروبلەمالارىن شەشۋمەن اينالىسادى»، - دەدى رەنات زۋلحايروۆ.
