پسورياز جۇعا ما: دەرماتولوگ اۋرۋدىڭ بەلگىلەرى مەن ساقتىق شارالارىن ءتۇسىندىردى
استانا. KAZINFORM - پسورياز - يممۋندىق جۇيە قىزمەتىنىڭ بۇزىلۋىنا بايلانىستى پايدا بولاتىن سوزىلمالى تەرى اۋرۋى. ول ءبىر ادامنان ەكىنشى ادامعا جۇقپايدى.
بۇل تۋرالى قازاق دەرماتولوگيا جانە ينفەكتسيالىق اۋرۋلار عىلىمي ورتالىعىنىڭ دەرماتولوگ دارىگەرى گۇلجان مەيىرمانوۆا ءتۇسىندىردى.
ماماننىڭ ايتۋىنشا، پسوريازدىڭ ەڭ ءجيى كەزدەسەتىن تۇرلەرىنىڭ ءبىرى - ءتۇيىنداقتى پسورياز.
اۋرۋدىڭ بۇل تۇرىندە تەرىدە شەكاراسى ايقىن، قىزىل ءتۇستى، بەتى كۇمىس تۇستەس اق قابىرشاقتارمەن جابىلعان ءتۇيىنداقتار پايدا بولادى. ولار كوبىنە شىنتاقتا، تىزەدە، باستىڭ شاشتى بولىگىندە جانە بەل تۇسىندا كەزدەسەدى.
- پسورياز - يممۋندىق جۇيە قىزمەتىنىڭ بۇزىلۋىنا بايلانىستى تۋىندايتىن سوزىلمالى اۋرۋ. ول ءبىر ادامنان ەكىنشى ادامعا جۇقپايدى،-دەپ ءتۇسىندىردى دەرماتولوگ.
دارىگەر تەرىدە بورتپە پايدا بولعان جاعدايدا مىندەتتى تۇردە دەرماتولوگقا قارالۋعا كەڭەس بەرەدى.
سونداي-اق ءوز بەتىنشە ەمدەلمەۋ، تەرىنى ۇنەمى ىلعالداندىرۋ، جاراقاتتاپ الۋدان ساقتانۋ جانە دارىگەر تاعايىنداعان ەمدى ۇزبەي جالعاستىرۋ ماڭىزدى.
مامان پسوريازدى باقىلاۋدا ۇستاۋعا بولاتىنىن اتاپ ءوتتى. سونىمەن قاتار بۇل اۋرۋمەن اۋىراتىن ادامدارعا اينالاسىنداعىلاردىڭ تۇسىنىستىك تانىتىپ، قولداۋ كورسەتۋى ولاردىڭ وزىنە دەگەن سەنىمىن ارتتىراتىنىن جەتكىزدى.
ايتا كەتەيىك، بۇعان دەيىن قاراعاندى وبلىسىندا پسوريازبەن اۋىراتىن 140 ناۋقاسقا تەگىن مەديتسينالىق كومەك كورسەتىلگەنى حابارلانعان ەدى. ونىڭ ىشىندە اۋرۋى اۋىر تۇردە وتەتىن 80 پاتسيەنتكە قىمبات دارىلىك پرەپاراتتار تاعايىندالعان.