سپورتتا زاڭدىلىقتى قامتاماسىز ەتۋ: باس پروكۋراتۋرا مەن ۇلتتىق وليمپيادا كوميتەتى مەموراندۋم جاساستى

استانا. KAZINFORM - باس پروكۋراتۋرا مەن ۇ و ك اراسىندا دەنە شىنىقتىرۋ جانە سپورت سالاسىنداعى زاڭدىلىقتى قامتاماسىز ەتۋ ماسەلەلەرى بويىنشا ءوزارا ىنتىماقتاستىق تۋرالى مەموراندۋم جاسالدى.

باس پروكۋرور بەرىك اسىلوۆ پەن ۇلتتىق وليمپيادا كوميتەتىنىڭ پرەزيدەنتى گەننادي گولوۆكين قول قويعان كەلىسىمنىڭ ماقساتى - سپورت سالاسىندا زاڭدىلىقتىڭ نىعايۋى، بيۋجەت قاراجاتىن جىمقىرۋدى بولدىرماۋ جانە باسقا دا قىلمىستارعا جول بەرمەۋ، سالاۋاتتى ءومىر سالتىن ناسيحاتتاۋ، اسىرەسە جاستار اراسىنداعى ناشاقورلىقتىڭ الدىن الۋ.

باس پروكۋرور ءوز سوزىندە «مەملەكەت باسشىسىنىڭ تاپسىرماسىن ورىنداۋ اياسىندا ۋاكىلەتتى ورگانمەن بىرگە كاسىپقوي سپورتتا نەگىزگى ماسەلەلەردى شەشۋ جانە وسى سالاداعى زاڭنامانى جاڭارتۋ كەرەك ەكەنىن» اتاپ ءوتتى.

ءىس-شارا ناتيجەسىندە تاراپتار بەلسەندى اقپاراتتىق ءوزارا ءىس-قيمىلدى، بىرلەسكەن تالداۋلاردى، جوبالاردى، ونىڭ ىشىندە كۇشتىك ورگانداردىڭ قىزمەتكەرلەرى اراسىندا تانىمال سپورتشىلاردى دايىنداپ شىعارۋ ماقساتىندا قۇقىق قورعاۋ ورگاندارىندا سپورتتى كەڭىنەن ناسيحاتتاۋ بويىنشا جۇمىستار جۇرگىزۋ تۋرالى كەلىسىمگە كەلدى.