سپورت ءمينيسترى دزيۋدوشى گالبادراحتىڭ ازاماتتىعىنا قاتىستى پىكىر ايتتى
استانا. KAZINFORM - دزيۋدوشى گالبادراح وتگونتسەتسەگ قازاقستاننىڭ سپورتىنا وڭتايلى اسەر ەتتى. بۇل تۋرالى ق ر تۋريزم جانە سپورت ءمينيسترى ەربول مىرزابوسىنوۆ ايتتى.

ۇكىمەت وتىرىسىنان كەيىن وتكەن باسپا ءسوز ءماسليحاتىندا تىلشىلەر موڭعوليا ەلىنىڭ ازاماتتىعىن قايتادان الۋعا ءوتىنىش بەرگەن گالبادراح وتگونتسەتسەگكە قاتىستى تۇسىنىك بەرۋدى سۇرادى.
ءوز كەزەگىندە ە. مىرزابوسىنوۆ تانىمال دزيۋدوشى گالبادراح وتگونتسەتسەگ ءبىراز ۋاقىت قازاقستان اتىنان ءبىرقاتار جارىسقا قاتىسقانىن ەسكە سالدى.
- ءتيىستى جۇمىستاردىڭ ارقاسىندا ەلىمىزدىڭ قۇراماسىندا وسى سالماق دارەجەسىندە قىزدار جاقسى ناتيجە كورسەتىپ كەلەدى... وسى سپورت بويىنشا فەدەراتسيامەن اتالعان ماسەلە تالقىلاندى. سپورتشىنىڭ (گالبادراح وتگونتسەتسەگ) وتباسى جاعدايى، ونىڭ شىعۋ تەگى موڭعوليامەن بايلانىستى. ول ەندى سونداعى قۇرامامەن جۇمىسىن اتقارادى. جالپى، وسىنداي تاجىريبەلەر بار. بۇعان دەيىن شەتەلدەن تارتىلعان سپورتشىلارعا قاتىستى ماسەلەلەر كوتەرىلگەن ەدى. وتاندىق سپورت مەكتەپتەرىندەگى سپورتشىلاردى دايارلاۋعا، ءوزىمىزدىڭ كادرلارعا ەكپىن قويىپ وتىرمىز، - دەدى مينيستر.
ەربول مىرزابوسىنوۆتىڭ پايىمىنشا، گالبادراح وتگونتسەتسەگتىڭ تاجىريبەسى قازاقستاننىڭ سپورتىنا وڭتايلى اسەر ەتتى.
- سپورتشى جانە باپكەر ءارى تالىمگەر رەتىندە ول ءبىزدىڭ دزيۋدوشىلارعا بەلگىلى ءبىر تىڭ سەرپىن بەردى. ول ءوزىنىڭ كەلىسىمشارتتاعى مىندەتىن ورىندادى. ەندى ءوزىنىڭ وتباسىنا ورالدى، - دەپ ءتۇسىندىردى مينيستر.
2019-جىلى گالبادراح وتگونتسەتسەگ حالىقارالىق دزيۋدو فەدەراتسياسى جاريالاعان رەيتينگتە 6-ورىنعا كوتەرىلگەنىن جازعان ەدىك.