سپورت باعىتىنداعى قازاقى جىلقى تۇقىمىن كوبەيتۋگە 701 ميلليون تەڭگە قاجەت - دەپۋتات
ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سپورتتىق باعىتتاعى جىلقىلاردىڭ قازاقى تۇقىمىن ساقتاۋ جانە ءوسىمىن مولايتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى ءوتىپ جاتىر، دەپ حابارلايدى Kazinform.
زاڭ جوباسىن تانىستىرعان ءماجىلىس دەپۋتاتى ايداربەك قوجانازاروۆ قۇجاتتى پالاتا دەپۋتاتتارى ازىرلەگەنىن اتاپ ءوتتى.
«زاڭ جوباسى ءۇش زاڭعا وزگەرىستەر مەن تولىقتىرۋلار ەنگىزۋدى كوزدەيدى. ول - «اسىلتۇقىمدى مال شارۋاشىلىعى تۋرالى»، «سەلەكتسيالىق جەتىستىكتەردى قورعاۋ تۋرالى، «اگروونەركاسىپ كەشەنىن جانە اۋىلدىق اۋماقتاردى دامىتۋدى مەملەكەتتىك رەتتەۋ تۋرالى» زاڭدار. زاڭ جوباسىندا سپورت باعىتىنداعى جىلقى شارۋاشىلىعىنا مەملەكەتتەن قولداۋ كورسەتۋدى كوزدەيدى. قازىرگى باعىتتا ەت، ءسۇت شىعاراتىن ءونىم باعىتىنداعى جىلقى شارۋاشىلىعىنا عانا قولداۋ كورسەتىلەدى»، - دەيدى ايداربەك قوجانازاروۆ.
زاڭ جوباسىندا اسىل تۇقىمدى ورتالىقتار مەن شەتەلدىك سەلەكسيادان سپورت باعىتىنداعى اسىل تۇقىمدى ايعىرلاردى ساتىپ الۋ، سپورت باعىتىنداعى جىلقىلاردىڭ قازاقى تۇقىمىنىڭ اسىل تۇقىمدى انالىق باسىن كوبەيتۋ، اسىل تۇقىمدى سپورت باعىتىنداعى جىلقى ۇستاۋ شىعىندارىن سۋبسيديالاۋ شارالارى ۇسىنىلعان.
«زاڭ جوباسىن جۇزەگە اسىرۋعا جالپى 701 ميلليون تەڭگە قاجەت. سونىڭ ىشىندە بەس جىل سايىن 140,2 ميلليون تەڭگە بولىنەدى. رەسپۋبليكا بيۋجەت كوميسسياسىنىڭ شەشىمى بويىنشا بۇل ۇسىنىس قولداۋ تاپتى»، - دەدى دەپۋتات.
