سولتۇستىككە كوشىرۋ جوباسىنان قارجىنى اياماۋ كەرەك - قايرات بالابيەۆ

ااا
Фото: из открытых источников

وڭتۇستىك تۇرعىندارىن ەلىمىزدىڭ سولتۇستىك وبلىستارىنا كوشىرۋ جۇمىستارى سوڭعى جىلدارى باسەڭدەپ قالدى.

ءماجىلىس دەپۋتاتى قايرات بالابيەۆ تەرىسكەيدەگى دەموگرافيالىق احۋالدى رەتتەۋ ماقساتىندا قولعا الىنعان بۇل جوبا قايتا جاندانۋى كەرەك دەپ ەسەپتەيدى. بۇل تۋرالى دەپۋتات «ABAY LivE» YouTube ارناسىنا بەرگەن سۇقباتىندا ايتتى.

ايتا كەتۋ كەرەك، تۇركىستان وبلىسىنان سايلانعان ءماجىلىس دەپۋتاتىنىڭ ءوزى جوبانىڭ جۇزەگە اسۋىنا اتسالىسقان.

«تۇركىستان وبلىستىق ءماسليحاتىندا دەپۋتات كەزىمىزدە اۋىلداردان ازاماتتاردى ارنايى كوشىرگەن جاعدايلارىمىز دا بولعان. قازىر سول ازاماتتاردىڭ كەمىندە ەلۋ پايىزى سول جاقتا قالىپ، كاسىبىن دوڭگەلەتىپ وتىر. ءبىراق اۋا رايىنا ۇيرەنبەي نەمەسە دۇرىس جاعداي قاراستىرىلماي كەرى قايتىپ جاتقاندار دا از ەمەس. ءبىز وسى ماسەلەنى قايتا كوتەرىپ جاتىرمىز. ۇكىمەت جاقسى باعدارلاما ازىرلەپ، قارجىنى كوبەيتەمىز دەگەن ۋادە بەردى. ءبىز حالىقتى دۇرىستاپ قامتاماسىز ەتپەي، ول جاقتا ۇستاپ وتىرا المايمىز. مەملەكەت جۇمىس بەرىپ، ۇيمەن قامتاماسىز ەتۋگە ءتيىس»، - دەيدى دەپۋتات.

دەپۋتاتتىڭ ايتۋىنشا، اتالعان كوش سولتۇستىكتەگى دەموگرافيالىق احۋالدى رەتتەپ قانا قويماي، قازاقستاننىڭ شەكارالىق ايماقتارىن ايتارلىقتاي كۇشەيتەدى.

قازىرگى گەوساياسي احۋالعا بايلانىستى شەكارالىق اۋدانداردى كۇشەيتۋىمىز كەرەك. ۇكىمەت مۇنى تۇسىنۋگە ءتيىس. اقشانى اياماۋىمىز كەرەك. مەنىڭ ويىمشا، وڭتۇستىكتەن بارعان ادامدار ءبىر-بىرىمەن ارالاسىپ تۇرۋ ءۇشىن جەكەلەگەن وتباسىلاردى ەمەس، ءبىر اۋلەتتى، كورشىلەردى بىرگە كوشىرگەن دۇرىس. سوندا ءوزارا ارالاسىپ، ءبىر-بىرىنە قولداۋ كورسەتىپ، ۇيرەنىسىپ كەتەدى، - دەدى قايرات بالابيەۆ.

سوڭعى جاڭالىقتار