سولتۇستىك قازاقستاندا وزەندەر سۋىنىڭ كۇرت كوتەرىلۋىنە بايلانىستى ەسكەرتۋ جاريالاندى
پەتروپاۆل. KAZINFORM - سولتۇستىك قازاقستان وبلىسىندا ەكى گيدرولوگيالىق بەكەتتە ەسىل مەن قامىساقتى وزەندەرىنىڭ سۋ دەڭگەيى قاۋىپتى مەجەگە جاقىنداپ قالدى. وسىعان وراي وڭىردە ەسكەرتۋ جاريالاندى.
«قازگيدرومەت» ر م ك س ق و فيليالىنىڭ مالىمەتىنشە، ساعات 16.00 دەگى گيدرولوگيالىق مونيتورينگ بويىنشا تاڭعى ساعات 8.00 دەن باستاپ وسى ۋاقىتقا دەيىن كرەشەنكا ەلدى مەكەنى ماڭىنداعى ەسىل وزەنى بىردەن 4 مەترگە كوتەرىلگەن. قاۋىپتى دەڭگەي 1400 س م، قازىر 1389 س م- گە جەتكەن.
سونداي- اق ياسنوۆكا ەلدى مەكەنىنىڭ جانىنان وتەتىن قامىساقتى وزەنىنىڭ سۋ دەڭگەيى قاۋىپتى 720 س م- گە جاقىنداپ قالدى. تاڭەرتەڭنەن بەرى 91 س م- گە كوتەرىلىپ، 663 س م بولدى.
ايىرتاۋ جانە ەسىل اۋداندارىنىڭ القاپتارىنان ەرىگەن قار سۋى كەلىپ جاتىر، سونىڭ ەسەبىنەن سۋ دەڭگەيى ءالى دە كوتەرىلمەك. قاۋىپتى دەڭگەيدەن اسقان جاعدايدا وزەننىڭ تومەنگى اعىسىندا ورنالاسقان ەلدى مەكەندەردى، شارۋاشىلىق قۇرىلىستارىن جانە اۆتوجولداردى سۋ باسۋ قاۋپى بار.
بۇعان دەيىن س ق و- دا رەسپۋبليكالىق ماڭىزى بار اۆتوموبيل جولىنىڭ بەس ۋچاسكەسىن سۋ شايىپ كەتكەنىن ايتقان ەدىك.
سونداي- اق سۋ كىرگەن اۋىلدارعا تۇراقتاندىرۋ قورىنان ازىق-تۇلىك جەتكىزىلەتىنىن حابارلادىق.
