سولتۇستىك قازاقستاندا ورتاشا ەڭبەكاقى قانشا؟

 سولتۇستىك قازاقستان وبلىسىندا قىزمەتكەرلەردىڭ 1,8 پايىزى 70 مىڭ تەڭگەگە دەيىن ەڭبەكاقى الادى. ستاتيستيكا قىزمەتى ءساۋىر ايىندا جۇرگىزىلگەن جالپى مەملەكەتتىك ستاتيستيكالىق ەسەپتىڭ قورىتىندىسىن شىعاردى، دەپ حابارلايدى Kazinform. 

ۇلتتىق ستاتيستيكا بيۋروسىنىڭ س ق و بويىنشا دەپارتامەنتىنىڭ مالىمەتىنشە، قىزمەتكەرلەردىڭ جالاقىسىنىڭ قۇرىلىمىن زەرتتەۋ بارلىق ءىرى كاسىپورىندار مەن ۇيىمداردا جانە ىرىكتەۋ بويىنشا ورتا جانە كىشى كاسىپورىندار مەن ۇيىمداردا جۇزەگە اسىرىلدى.

2023 -جىلعى ساۋىردە تولىق جۇمىس ىستەگەن قىزمەتكەرلەر سانى 100,2 مىڭ ادامدى قۇرادى. ونىڭ ىشىندە ەرلەر - 47,3 مىڭ ادام - 47,2 پايىز، ايەلدەر - 52,9 مىڭ ادام - 52,8 پايىز قۇرادى. ورتاشا ايلىق ەڭبەكاقى وسى كەزەڭدە 228 مىڭ تەڭگە شاماسىندا بولدى.

70 مىڭ تەڭگەگە دەيىن ورتاشا ايلىق جالاقىنى 1,8 پايىز قىزمەتكەر الدى، ءاربىر ەكىنشى قىزمەتكەر 70 مىڭنان 200 مىڭ تەڭگەگە دەيىن جالاقى الدى.

باسشىلاردىڭ ەڭبەكاقىسى 350 مىڭ تەڭگە، كاسىبي مامانداردىكى 279 مىڭ تەڭگە، تەحنيك ماماندار جانە باسقا دا كاسىبي كومەكشى پەرسونال - 231 مىڭ تەڭگە؛ اكىمشىلەندىرۋ سالاسىنداعى قىزمەتشىلەر - 163 مىڭ تەڭگە؛ كورسەتىلەتىن قىزمەتتەر جانە ساۋدا- ساتتىق سالاسىنىڭ قىزمەتكەرلەرى - 132 مىڭ تەڭگە؛ فەرمەرلەر جانە اۋىل مەن ورمان شارۋاشىلىعىنىڭ، بالىق شارۋاشىلىعىنىڭ جانە بالىق اۋلاۋ جۇمىسشىلارى - 189 مىڭ تەڭگە؛ ونەركاسىپ، قۇرىلىس، كولىك جانە باسقا تەكتەس قىزمەتتەردىڭ جۇمىسشىلارى - 199 مىڭ تەڭگە؛ وندىرىستىك جابدىق وپەراتورلارى، قۇراستىرۋشىلار جانە جۇرگىزۋشىلەر - 200 مىڭ؛ بىلىكتىلىگى جوق جۇمىسشىلار - 106 مىڭ تەڭگە العان.

ورتا ءبىلىمى بار قىزمەتكەرلەر جالاقىسى - 173 مىڭ تەڭگە، جوعارعى بىلىممەن - 302 مىڭ تەڭگە، جوعارى وقۋ ورنىنان كەيىنگى بىلىممەن - 391 مىڭ تەڭگەنى قۇرادى.