سولتۇستىك قازاقستاندا مالدىڭ قيى كادەگە اساتىن جوبا قولعا الىندى
پەتروپاۆل. KAZINFORM - سولتۇستىك قازاقستان وبلىسى مامليۋت اۋدانىنداعى شارۋاشىلىقتاردىڭ ءبىرى ەكولوگيالىق جوبانى قولعا الىپ، مالدىڭ قيىنان ورگانيكالىق تىڭايتقىش ءوندىرۋدى باستادى.
مەڭكەسەر اۋىلىنداعى «مامبەتوۆ جانە ك» ج ش س ەگىن ەگىپ، مال وسىرۋمەن اينالىسادى. ەندى شارۋاشىلىق مالدىڭ قيىن ەگىنشىلىكتە قولدانباق.
جوبا - «ءىرى قارا مالدىڭ قيىن سەپاراتسيالاۋ» دەپ اتالادى. تۇلىكتىڭ قيى ازوت، فوسفور جانە كالي سەكىلدى حيميالىق ەلەمەنتتەرگە باي. تابيعي تىڭايتقىش قولدانىلعان جەردەن ناتيجەسىندە ەكى ەسە مول ءونىم الۋعا بولادى ەكەن.
كاسىپكەر قاجەتتى قوندىرعىنى تۇركيادان 150 ميلليون تەڭگەگە ساتىپ العان. قازىر ول تاۋلىك بويى جۇمىس ىستەپ تۇر. تەحنيكانى قاشىقتىقتان باسقارۋعا دا بولادى.
«بىزگە وسىنداي جوبانى جۇزەگە اسىرۋ تۋرالى وي 2 جىل بۇرىن كەلگەن. وسى ارالىقتا تەحنولوگيامەن تانىستىق. قاجەتتى اقپارات جينادىق. بۇگىن سونىڭ ناتيجەسىن كورىپ جاتىرمىز. ىسكە قوسىپ، العاشقى ءونىمىمىزدى الۋدامىز. بۇل تىڭايتقىش - %100 تابيعي ءونىم. ەشقانداي حيميالىق قوسپا بولمايدى. الدىمەن ءوزىمىزدىڭ ەگىستىكتەردە توپىراقتى قۇنارلاندىرۋ ءۇشىن پايدالانامىز»، - دەيدى «مامبەتوۆ جانە ك» ج ش س باس ديرەكتورى ويرات نۇرماعامبەت.
قوندىرعىنى جەتكىزۋشى كومپانيا وكىلدەرى شارۋاشىلىققا كەلىپ، تەحنيكانى قۇرىپ بەردى. ايتۋلارىنشا، مالدىڭ قيى %100 وڭدەۋدەن وتەدى. ەكولوگيالىق جاعىنان دا وتە ءتيىمدى. يننوۆاتسيالىق جوبا س ق و- دا العاش رەت قولدانىلىپ وتىر.
بۇعان دەيىن وبلىستا 1,2 مىڭ گا ەگىس القابى سۋ استىندا جاتقانىن ايتقان ەدىك.
