سولتۇستىك قازاقستان مەكتەپتەرى ۇلتتىق كيىم كيۋدى داستۇرگە اينالدىرىپ جاتىر
پەتروپاۆل. KAZINFORM - سولتۇستىك قازاقستان وبلىسىنداعى مەكتەپتەر ۇلتتىق قۇندىلىقتاردى ناسيحاتتاۋ ماقساتىندا اپتانىڭ ءبىر كۇنىن قازاقتىڭ ونەرى مەن سالتىنا ارناپ، ۇلتتىق كيىم كيىپ ءجۇر.
پەتروپاۆلداعى ءاليحان بوكەيحان اتىنداعى № 25 ورتا مەكتەپ ۇستازدارى مەن وقۋشىلارى العاشقىلاردىڭ ءبىرى بولىپ بۇل باستامانى قولعا الدى.
ءبىلىم ورداسىنداعى بارلىق سىنىپ وقۋشىلارى ءار اپتانىڭ جۇما كۇنى قازاقشا كيىنىپ ءجۇرۋدى قولعا الدى.
بالالار عانا ەمەس، مۇعالىمدەر دە بۇل كۇنى زامانۋي ەتنوستيلدە كيىنىپ، اشەكەيلەر تاعادى.
«ءبىرتۇتاس تاربيە باعدارلاماسى» اياسىندا ۇلتتىق قۇندىلىقتارىمىزدى ناسيحاتتاۋ ماقساتىندا قولعا الدىق. پرەزيدەنتىمىز «ۇلتتىق مادەنيەت دەگەنىمىز بۇل - ماعىناسى تەرەڭ، كوپ قىرلى ۇعىم. حالقىمىزدىڭ ءتول مادەنيەتى سالت- داستۇردەن، ادەت- عۇرىپتان باستاۋ الادى. ۇلتتىق كيىمنىڭ ءوزى - ۇلت مادەنيەتىنىڭ جارقىن كورىنىسى. سوندىقتان ۇل- قىزدارىمىز ۇلتتىق كيىمدى ناۋرىز مەيرامىندا يا بولماسا باسقا مەرەكەلەردە ءجيى كيىپ جۇرسە، كەرەمەت بولار ەدى» دەدى. ءبىز مەكتەپ بولىپ «ۇلتتىق كيىم كيۋ» كۇنىن وتكىزەتىن بولدىق. بۇگىن وقۋشىلارىمىزبەن ءۇزىلىس ۋاقىتىندا قازاقتىڭ ۇلتتىق ويىندارى «لاڭگى تەبۋ»، «ارقان تارتىس»، «اسىق اتۋ»، «بەس اسىق» ويناتىلدى. بالالاردىڭ وي- ءورىسىن دامىتۋ ماقساتىندا «1 ماقال-1 باۋىرساق»، « قىزىقتى ۆيكتورينا» ويىندارى وتكىزىلدى»، - دەيدى ءا. بوكەيحان اتىنداعى № 25 ورتا مەكتەپ ديرەكتورىنىڭ وقۋ ءىسى جونىندەگى ورىنباسارى جادىرا زۇلقارنايەۆا.
مەكتەپتىڭ 1-سىنىپ وقۋشىلارىنىڭ اتا- انالارى بالالارىنا قازاقشا ستيلدە تاپسىرىسپەن ارنايى كيىم تىكتىرگەن.
ۇستازداردىڭ پىكىرىنشە، ۇلتتىق ونەر مەن مادەنيەتتى ناسيحاتتاۋ مەكتەپتەن باستالۋى ءتيىس.
قازىرگى ۋاقىتتا ءا. بوكەيحان اتىنداعى № 25 مەكتەبىندە 60 قا جۋىق ءمۇعالىم ەڭبەك ەتەدى.
630 دان استام وقۋشى وقيدى.
سولتۇستىك قازاقستان وبلىستىق ءبىلىم باسقارماسى باسپا ءسوز قىزمەتىنىڭ مالىمەتىنشە، ۇلتتىق كيىم كيۋ كۇنىن باسقا مەكتەپتەر دە ەنگىزىپ جاتىر.
اۆتور
اقەركە داۋرەنبەك قىزى
