سولتۇستىك قازاقستانعا شەتەلدەن 6 مىڭنان استام اسىل تۇقىمدى مال اكەلىنەدى
استانا. KAZINFORM - سولتۇستىك قازاقستان وبلىسى 2026-2030-جىلدارعا ارنالعان مال شارۋاشىلىعىن دامىتۋ جونىندەگى كەشەندى جوسپاردى ىسكە اسىرۋ اياسىندا شەتەلدىك اسىل تۇقىمدى مال باسىن ىرىكتەۋگە كىرىستى، دەپ حابارلايدى ق ر اۋىل شارۋاشىلىعى مينيسترلىگىنىڭ باسپا ءسوز قىزمەتى.
ءوڭىر اۋىل شارۋاشىلىعى تاۋارىن وندىرۋشىلەردىڭ ءوندىرىس كولەمىن ۇلعايتۋعا، مال تابىنىنىڭ گەنەتيكالىق الەۋەتىن جاڭارتۋعا جانە سالانىڭ ونىمدىلىگىن ارتتىرۋعا باعىتتالعان ناقتى جوبالاردى قولعا الا باستادى.
وسى رەتتە وبلىس اكىمىنىڭ ءبىرىنشى ورىنباسارى مارات تاسماعانبەتوۆ، مال وسىرۋشىلەر وداعىنىڭ باسشىسى داۋرەن سالىقوۆ جانە اۋىل شارۋاشىلىعى تاۋارىن وندىرۋشىلەردەن قامتىلعان دەلەگاتسيا مۇشەلەرى اۆستراليانىڭ مال شارۋاشىلىعى كاسىپورىندارىن ارالادى.
دەلەگاتسيا مۇشەلەرى مال باسىن قاراپ، الدىن الا ىرىكتەۋ جۇرگىزدى. مالدىڭ اسىل تۇقىمدىق جانە ونىمدىلىك قاسيەتتەرى، تۇقىمدىق ەرەكشەلىكتەرى، جاسى، تىرىلەي سالماعى، دەنساۋلىق جاعدايى، سىرتقى ءبىتىمى، سونداي-اق بولاشاق تابىننىڭ ونىمدىلىگى مەن ءوسىمتالدىق قاسيەتتەرىن ايقىندايتىن باسقا دا كورسەتكىشتەرى نازارعا الىندى.
سونىمەن قاتار مال باسىنىڭ قۇنى، ۆەتەريناريالىق تالاپتار، كارانتيندىك راسىمدەر، لوگيستيكا جانە جەتكىزۋ مەرزىمدەرى بويىنشا ماسەلەلەر پىسىقتالدى. مۇنداي ءتاسىل اۋىل شارۋاشىلىعى تاۋارىن وندىرۋشىلەرگە مالدى قولجەتىمدىلىگىنە قاراي عانا ەمەس، ونىڭ ساپاسىن، گەنەتيكالىق الەۋەتىن جانە جوبانىڭ ەكونوميكالىق تيىمدىلىگىن ەسكەرە وتىرىپ تاڭداۋعا مۇمكىندىك بەرەدى.
2026-جىلعى قىركۇيەك-قازان ايلارىندا وڭىرگە 2 مىڭنان استام ءىرى قارا جانە 4 مىڭنان استام ۇساق مال باسىن اكەلۋ جوسپارلانىپ وتىر.
ايتا كەتەيىك، وسىنداي ماقساتپەن قىركۇيەك ايىندا قوستاناي وبلىسىنىڭ دەلەگاتسياسى يرلاندياعا ساپارلاماق.
ەسكە سالا كەتەيىك، 2026-2030-جىلدارعا ارنالعان مال شارۋاشىلىعىن دامىتۋ جونىندەگى كەشەندى جوسپار سالانى اۋقىمدى دامىتۋعا، ينۆەستيتسيا تارتۋعا جانە جاڭا وندىرىستىك جوبالاردى ىسكە قوسۋدى كوزدەيدى.
- بۇل جولدا شارۋاشىلىقتاردى كەڭەيتۋگە، اسىل تۇقىمدى مال ساتىپ الۋعا جانە زاماناۋي وندىرىستىك بازانى قالىپتاستىرۋعا اۋىل شارۋاشىلىعى تاۋارىن وندىرۋشىلەرگە ينۆەستيتسيا سالۋعا مۇمكىندىك بەرەتىن جەڭىلدەتىلگەن قارجىلاندىرۋ تەتىكتەرى ماڭىزدى ءرول اتقارادى، - دەلىنگەن حابارلامادا.
وسىعان دەيىن ەلدە مال شارۋاشىلىعىن قارجىلاندىرۋ كولەمى ارتاتىنى تۋرالى ايتىلعان بولاتىن.
