سولتۇستىك كورەيانىڭ 20 تەڭىزشىسى قىتاي اۋماعىندا كەمە اپاتىنان قازا تاپقان
استانا. KAZINFORM - قىتاي كەمەسىمەن سوقتىعىسقان سولتۇستىك كورەيانىڭ جۇك كەمەسى سۋعا باتىپ، 20 عا جۋىق تەڭىزشى قازا تاپقان. بۇل تۋرالى Liahe Zaobao باسىلىمى حابارلادى.
بەلگىلى بولعانداي، كەمە اپاتى كورەي تۇبەگىنىڭ باتىسىنداعى تەڭىز ايدىنىندا تىركەلگەن. سولتۇستىك كورەياعا تيەسىلى كومىر تاسۋشى كەمە قىتايدىڭ جۇك كەمەسىمەن سوقتىعىسىپ، سۋعا باتىپ كەتكەن. سالدارىنان 20 عا جۋىق سولتۇستىك كورەيالىق تەڭىزشى قازا تاپقان. الايدا، قىتاي مەن سولتۇستىك كورەيا بيلىگى ءتيىستى اقپاراتتى جاسىرىپ قالعان.
باسىلىمنىڭ جازۋىنشا، اقپان ايىنىڭ سوڭىنا قاراي اۆتوماتتاندىرىلعان سايكەستەندىرۋ جۇيەسى (AIS) وشىرىلگەن سولتۇستىك كورەيالىق جۇك كەمەسى قىتاي پورتىنىڭ ماڭىندا سۋعا باتقان. قىتايدىڭ ءتيىستى ۇيىمدارى كومەك كورسەتكەنىمەن، ەكيپاج مۇشەلەرىن امان الىپ قالۋ مۇمكىن بولماعان. قىتاي كەمەسىنە اۋىر زاقىم كەلمەگەن.
سولتۇستىك كورەيانىڭ كومىر ەكسپورتتاۋى بۇۇ قاۋىپسىزدىك كەڭەسىنىڭ 2371-قارارىنا قايشى. ايتىلۋىنشا، اپات بولعان تەڭىز ايماعى زاڭسىز كومىر تاسىمالىن ۇيىمداستىراتىن سولتۇستىك كورەيالىق جۇك كەمەلەرى ءجيى پايدالاناتىن باعىت ەكەن.
بەلگىلى بولعانداي، وقيعا كەزىندە تەڭىز ايدىنىن سوقىر تۇمان باسقان. قىتاي كەمەسى سانكسيادان جالتارۋ ماقساتىندا AIS جۇيەسىن ءوشىرىپ تاستاعان جۇك كەمەسىن دەر كەزىندە بايقاماي، بۇيىرىنەن كيلىككەن بولۋى مۇمكىن. ايتىلۋىنشا، كەمە بورتىنداعى كومىر مەن وزگە جۇك تۇگەلىمەن تەڭىزگە باتىپ كەتكەن.
اقپارات كوزىنىڭ ايتۋىنشا، اپات تۋرالى مالىمەتتىڭ جاريا بولۋى سولتۇستىك كورەياعا ءتيىمسىز، قىتاي تاراپى دا ب ۇ ۇ سانكسياسىنىڭ بۇزىلۋىنا كوز جۇما قاراعانى ءۇشىن حالىقارالىق قوعامداستىقتىڭ سىنىنا ۇشىراۋى مۇمكىن. وسى سەبەپتى ەكى تاراپ تا وقيعا تۋرالى اقپاراتتى جاسىرىپ قالۋعا تىرىسقان بولۋى ىقتيمال.
بۇعان دەيىن، 2017-جىلدىڭ ناۋرىز ايىندا قىتايدىڭ وڭتۇستىك-شىعىسىنداعى تسزيانسۋ پروۆينتسياسى ماڭىندا دا سولتۇستىك كورەيانىڭ جۇك كەمەسى قىتاي كەمەسىمەن سوقتىعىسىپ، سۋعا باتقان بولاتىن.
