سولتۇستىك كورەيا زەڭبىرەكپەن وق اتۋ وقۋ-جاتتىعۋىن وتكىزدى

КНДР
Фото:  Yonhap

  سولتۇستىك كورەيا جەكسەنبى كۇنى ەلدىڭ باتىس جاعالاۋىندا زەڭبىرەكپەن 90 عا جۋىق وق اتتى. Kazinform بۇل تۋرالى Yonhap اگەنتتىگىنە سىلتەمە جاساپ حابارلايدى.

كەشە وسى وڭىردە ءۇشىنشى كۇن قاتارىنان زەڭبىرەكپەن وق اتۋ وقۋ-جاتتىعۋ جيىنى ءوتتى.

وڭتۇستىك كورەيا شتاب باسشىلارى كوميتەتىنىڭ (JCS) حابارلاۋىنشا، ولار سولتۇستىك شەكارا سىزىعىنان سولتۇستىككە قاراي تەڭىز بۋفەرلى ايماعىندا ارتيللەريالىق اتىستار بولعانىن انىقتادى. بۋفەرلىك ايماق 2018-جىلعى كورەياارالىق اسكەري كەلىسىمگە سايكەس قۇرىلعان.

JCS وكىلى وڭتۇستىك كورەيا اسكەريلەرى مەن ازاماتتار زارداپ شەكپەگەنىن، جاۋاپ رەتىندە وقۋ جيىنىن وتكىزبەيتىنىن ايتتى.

جۇما كۇنى سولتۇستىك كورەيا وڭتۇستىك كورەيامەن شەكاراعا جاقىن ماڭعا 200 دەن استام ارتيللەريالىق سنارياد ۇشىردى، وڭتۇستىككورەيالىق ەكى ارال تۇرعىندارىنا ەۆاكۋاتسيالانۋ تۋرالى بۇيرىق بەرىلگەن بولاتىن.

بۇعان جاۋاپ رەتىندە وڭتۇستىككورەيالىق اسكەريلەر 400 سنارياد اتقىلاپ، ءوز مانيەۆرلەرىن جاسادى.

سەنبى كۇنى پحەنيان باتىس جاعالاۋىنان سارى تەڭىزگە قاراي تاعى دا 60 قا جۋىق سنارياد اتقىلادى.

سوڭعى جاڭالىقتار