سولتۇستىك كورەيا گيپەردىبىستىق زىمىراندى ءساتتى سىناعانىن حابارلادى
استانا. KAZINFORM - پحەنياندا گيپەردىبىستىق قارۋدى جاساۋداعى جاڭا جەتىستىكتەر تۋرالى حابارلادى. ك ح د ر بيلىگىنىڭ حابارلاۋىنشا، گيپەردىبىستىق مانيەۆرلى باسقارىلاتىن وق تۇمسىعى بار ورتاشا قاشىقتىققا ۇشاتىن زىمىران سىناقتان ءساتتى ءوتتى. بۇل تۋرالى DW حابارلادى.
ءوزىن-ءوزى يادرولىق دەرجاۆا دەپ جاريالاعان سولتۇستىك كورەيا گيپەردىبىستىق وقتۇمسىعى بار ورتا قاشىقتىققا ۇشاتىن زىمىرانداردى جاساۋدا جاڭا پروگرەسس تۋرالى حابارلادى.
«جەكسەنبى كۇنى ك ح د ر-نىڭ زىمىران جاساپ شىعارۋ باس باسقارماسى گيپەردىبىستىق مانيەۆرلى باسقارىلاتىن وقتۇمسىعى بار قاتتى وتىندى ورتاشا- الىس راديۋستا ارەكەت ەتەتىن بالليستيكالىق زىمىراندى سىناقتان وتكىزدى. ۇشىرۋ ءساتتى ءوتتى»، - دەپ حابارلادى دۇيسەنبى، 15-قاڭتاردا سولتۇستىك كورەيانىڭ ب ا ق.
ك ح د ر-داعى زىمىران سىناقتارى وڭتۇستىك كورەيا مەن جاپونيادا تىركەلدى. وڭتۇستىك كورەيا اسكەريلەرىنىڭ مالىمەتىنشە، ورتاشا قاشىقتىققا ۇشاتىن زىمىران شامامەن مىڭ شاقىرىم ۇشىپ، جاپون تەڭىزىنە قۇلاعان. وڭتۇستىك كورەيا سىناقتى ايىپتاپ، ونى پحەنيانعا كەز كەلگەن قاشىقتىقتاعى بالليستيكالىق زىمىرانداردى سىناقتان وتكىزۋگە تىيىم سالاتىن ب ۇ ۇ قارارلارىن ايقىن بۇزۋ دەپ اتادى. مۇنداي زىمىراندار يادرولىق وق تۇمسىقتارمەن جابدىقتالۋى مۇمكىن.
وڭتۇستىك كورەيانىڭ «رەنحاپ» اقپارات اگەنتتىگىنىڭ حابارلاۋىنشا، پحەنيان وتكىزگەن جاڭا زىمىران سىناعى ك ح د ر ا ق ش-تىڭ قۇرلىقتىق ايماعىن سوعۋعا قابىلەتتى «حۆاسون-18» قاتتى وتىندى كونتينەنتارالىق زىمىرانىن سىناقتان وتكىزگەن 18-جەلتوقساننان كەيىن ءبىرىنشى سىناق بولىپ وتىر.
