سولتۇستىك كورەيا تاعى دا جاپونياعا قاراي زىمىران ۇشىردى
استانا. KAZINFORM - سولتۇستىك كورەيا شىعىس/جاپون تەڭىزى باعىتىنا قاراي بىرنەشە بالليستيكالىق زىمىران ۇشىردى، - دەپ حابارلايدى NBC News باسىلىمى.
وڭتۇستىك كورەيانىڭ شتاب باستىقتارىنىڭ بىرىككەن كوميتەتىنىڭ مالىمەتىنشە، زىمىراندار تاڭەرتەڭ ك ح د ر- دىڭ شىعىس جاعالاۋىنداعى سينپو اۋدانىنان ۇشىرىلعان. سەۋل باقىلاۋدى كۇشەيتىپ، ا ق ش جانە جاپونيامەن تىعىز اقپارات الماسىپ جاتقانىن مالىمدەدى.
وڭتۇستىك كورەيا پرەزيدەنتىنىڭ اكىمشىلىگى ۇلتتىق قاۋىپسىزدىك كەڭەسى جاعدايدى تالقىلاۋ ءۇشىن شۇعىل وتىرىس وتكىزەتىنىن حابارلادى.
جاپونيا قورعانىس مينيسترلىگى دە زىمىرانداردىڭ ۇشىرىلعانىن راستادى. ۆەدومستۆو مالىمەتىنشە، زىمىراندار سولتۇستىك كورەيانىڭ شىعىس جاعالاۋىنداعى اكۆاتورياعا قۇلاعان بولۋى مۇمكىن.
توكيو پحەنيانعا قاتاڭ نارازىلىق ءبىلدىرىپ، مۇنداي ارەكەتتەر وڭىرلىك جانە حالىقارالىق قاۋىپسىزدىككە قاتەر توندىرەتىنىن، سونداي-اق، ك ح د ر- عا بالليستيكالىق زىمىرانداردى كەز كەلگەن سىناقتان وتكىزۋگە تىيىم سالاتىن ب ۇ ۇ قاۋىپسىزدىك كەڭەسىنىڭ رەزوليۋتسيالارىن بۇزاتىنىن مالىمدەدى.
بۇعان دەيىن سولتۇستىك كورەيا ليدەرى كيم چەن ىننىڭ اسكەري كەمەدەن زىمىرانداردى سىناۋدى جەكە ءوزى باسقارعانىن حابارلاعان بولاتىن. سىناق قورىتىندىسى بويىنشا ول ەلدىڭ يادرولىق الەۋەتىن «شەكسىز ارتتىرۋ» باعىتىن جالعاستىراتىنىن ايتىپ، يادرولىق سوققى بەرۋ جانە جەدەل ارەكەت ەتۋ مۇمكىندىكتەرىن كۇشەيتۋدى تاپسىردى.
