سولتۇستىك كورەيا كيم چەن ىننىڭ قۇرمەتىنە جاڭا ءانۇراندى شىرقادى

استانا. KAZINFORM - سولتۇستىك كورەيا كوشباسشى كيم چەن ىندى «مەيىرىمدى اكە» جانە «ۇلى كوشباسشى» رەتىندە ماداقتايتىن جاڭا ءان شىعاردى. بۇل قادام - ونىڭ بەدەلىن ارتتىرۋعا باعىتتالعان ۇگىت- ناسيحات جۇمىستارىنىڭ ءبىر بولىگى، دەپ حابارلايدى Reuters.

«Friendly Father» (جارقىن ءجۇزدى اكە) انىنە تۇسىرىلگەن بەينەبايان سارسەنبى كۇنى مەملەكەت باقىلاۋىنداعى كورەيانىڭ ورتالىق تەلەارناسىندا كورسەتىلدى.

وندا بالالاردان باستاپ اسكەري جانە مەديتسينا قىزمەتكەرلەرىنە دەيىن «ءان ايتامىز، كيم چەن ىن ۇلى كوشباسشى» جانە «جارقىن ءجۇزدى اكە كيم چەن ىندى ماداقتايمىز» سياقتى ولەڭ شۋماقتارىن شىرقادى.

كيم تاماشالاعان وركەستردىڭ سۇيەمەلدەۋىمەن ءاننىڭ تىكەلەي ورىندالۋى مەملەكەتتىك تەلەارنادان دا كورسەتىلدى.

ءاننىڭ شىعۋىنا از ۋاقىت قالعاندا سولتۇستىك كورەيانىڭ مەملەكەتتىك ب ا ق ەلدىڭ نەگىزىن قالاۋشى كيم ير سەننىڭ تۋعان كۇنىنە ارنالعان مەرەكەنىڭ اتىن وزگەرتتى - جىل سايىنعى مەملەكەتتىك مەرەكەنى «كۇن كۇنى» دەپ اتاۋدىڭ ورنىنا، مەملەكەتتىك ب ا ق ونى نەگىزىنەن «ءساۋىر مەرەكەسى» دەپ اتاي باستادى.

مۇنداي وزگەرىستەر كيم چەن ىننىڭ وزىنەن بۇرىنعىلارعا سەنىم ارتپاستان ءوز اياعىمەن تۇرۋ ارەكەتىنىڭ ءبىر بولىگى بولۋى مۇمكىن، دەدى وڭتۇستىك كورەيانىڭ بىرلىك مينيسترلىگىنىڭ رەسمي وكىلى.

اۆتور
زارينا تۋعانبايەۆا