سولتۇستىك كورەيا جاپونيادان 1945 -جىلى قازا تاپقانداردىڭ تۋىستارىنان كەشىرىم سۇراۋىن تالاپ ەتتى

استانا. KAZINFORM - ا ق ش-تىڭ جاپونيا استاناسىنا جاساعان اۋە شابۋىلىنان 10 مىڭعا جۋىق كورەي قازا تاپقان، دەپ جازادى انادولى.

سولتۇستىك كورەيا 1945 -جىلى 10-ناۋرىزدا ا ق ش-تىڭ توكيونى بومبالاۋى كەزىندە مىڭداعان كورەيلەردىڭ ولىمىنە قاتىستى كەشىرىم سۇراۋدى، وتەماقى تولەۋدى جانە تەرگەۋدى تالاپ ەتتى.

- 1945 -جىلعى «توكيوداعى جارىلىس» تۋرالى مالىمدەمەنى كورەي تۇبەگىندەگى جاپون وتارشىلدىعى كەزىندە جۇمىس ىستەۋگە ءماجبۇر بولعان كورەي جۇمىسشىلارى مەن ولاردىڭ وتباسىلارى قۇرعان سولتۇستىك كورەيا قاۋىمداستىعى جاسادى، دەپ حابارلايدى سولتۇستىك كورەيانىڭ ورتالىق اقپارات اگەنتتىگى (KCNA).

ماتىندە 1945 -جىلى 10-ناۋرىزدا امەريكا قۇراما شتاتتارىنىڭ توكيوعا جاپپاي اۋە سوققىسى جاسالعانى، ونىڭ بارىسىندا 275 B-29 بومبالاۋشى ۇشاقتارى قالاعا بومبا تاستاعانى اتاپ وتىلگەن.

- شابۋىل كەزىندە جاپون بيلىگى كورەيلەردى لاگەرلەردە ۇستاعان، وندا ولار قاتىگەزدىكپەن قورلانعان، قاۋىپتى جانە قيىن جاعدايلاردا ءماجبۇرلى ەڭبەككە جەگىلدى. وسىنىڭ سالدارىنان كوپتەگەن كورەيلەر قاشىپ قۇتىلا الماي، اۋە شابۋىلى كەزىندە قازا تاپتى، - دەلىنگەن حابارلامادا.

اۋە شابۋىلىنان قازا تاپقان 100000 ادامنىڭ 10 پايىزعا جۋىعى كورەيلەر ەكەنى حابارلاندى.
قايتىس بولعانداردىڭ جەكە باسى انىقتالماي، مايىتتەر ءتيىستى تەرگەۋ جۇرگىزىلمەي، ءار جەردە جەرلەنگەن. سونىمەن قاتار، قازا تاپقان كارىستەردىڭ قالدىقتارى كەيىنىرەك «ەكسپەريمەنتتەردە» قولدانىلعانى دا ايتىلدى.

وسىعان بايلانىستى سولتۇستىك كورەيا جاپونيادان قايتىس بولعان كارىستەردىڭ تۋىستارىنان رەسمي كەشىرىم سۇراپ، ولارعا وتەماقى تولەۋدى تالاپ ەتتى.

سونداي-اق كورەي تاراپى زارداپ شەككەندەردىڭ سۇيەگىن انىقتاۋ ءۇشىن تولىق تەرگەۋ جۇرگىزىپ، ناتيجەسىن جاريا ەتۋدى تالاپ ەتتى.

ايتا كەتەيىك، بۇعان دەيىن سولتۇستىك كورەيا سارى تەڭىزگە قاراي بىرنەشە بالليستيكالىق زىمىران ۇشىرعانىن جازدىق.

اۆتور

جاراسقان نۇرىبايەۆ